កម្ពុជា

គជប​៖​ សម្ភារៈ​សម្រាប់​បម្រើ​ឲ្យ​ការ​បោះឆ្នោត ​បាន​ទៅ​ដល់​គោល​ដៅ​ហើយ​

រថយន្ត​ដឹក​សម្ភារៈ​សម្រាប់​បម្រើ​ឲ្យ​ការ​បោះ​ឆ្នោត​ឃុំ​សង្កាត់​ ត្រូវ​បាន​នាំ​មុខ​ដោយ​រថយន្តប៉ូលីស​កាល​ពី​​ថ្ងៃ​ទី​ ២៦ ​ឧសភា។​​
រថយន្ត​ដឹក​សម្ភារៈ​សម្រាប់​បម្រើ​ឲ្យ​ការ​បោះ​ឆ្នោត​ឃុំ​សង្កាត់​ ត្រូវ​បាន​នាំ​មុខ​ដោយ​រថយន្តប៉ូលីស​កាល​ពី​​ថ្ងៃ​ទី​ ២៦ ​ឧសភា។​​ @NEC

សម្ភារៈ​សម្រាប់​ប្រើប្រាស់​ក្នុងការ​បោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ រួមទាំង​សន្លឹក​ឆ្នោត​​ផង ត្រូវបាន​គណៈកម្មាធិកា​រ​ជាតិ​រៀបចំ​ការបោះឆ្នោត ដឹកជញ្ជូន​ទៅដល់​ការិយា​ល័យ​​ថ្នាក់ឃុំ​សង្កាត់​រួចរាល់​ហើយ គិត​ចាប់តាំងពី​ថ្ងៃទី២៣ឧសភា​មក។ ហើយ​នៅក្នុង​ការ​បោះ​ឆ្នោត​​ខាងមុខនេះ គ.ជ.ប ក៏បាន​ត្រៀម​ឧ​ត្ថ​ម្ភា​គ​ចក្រ​ចំនួន២គ្រឿង ដើម្បី​ត្រៀម​ដឹក​ជញ្ជូន​​សម្ភារៈ ទៅកាន់​ការិយាល័យ​បោះឆ្នោត​ណា ដែល​នៅ​ឆ្ងាយ​និង​ពេល​ចាំបាច់។

ផ្សាយពាណិជ្ជកម្ម

តាំងពីព្រឹក​ថ្ងៃទី២៣ខែឧសភា​មក នាយកដ្ឋាន​ប្រតិបត្តិការ នៃ គ.ជ.ប បាន​ប្រើប្រាស់​រថយន្ត ដើម្បី​​ដឹកជញ្ជូន​សម្ភារៈ​បោះឆ្នោត​ទៅ​តាម​បណ្តាល​ខេត្ត​នានា សម្រាប់​ការបោះឆ្នោត​ក្រុម​ប្រឹក្សា​ឃុំ​/​សង្កាត់ អាណត្តិ​ទី៤ ឆ្នាំ២០១៧នេះ។ សម្ភារៈ​ទាំងនោះ​ដែលមាន​ដូចជា សន្លឹកឆ្នោត ទឹក​ខ្មៅ ត្រា​សម្ងាត់ បញ្ជី​ឈ្មោះ​បោះឆ្នោត បន្ទប់សំងាត់ និង​សម្ភារៈផ្សេងៗទៀត។ សម្ភារៈ​ទាំង​នោះ ត្រូវបាន​រក្សាទុក និង​ការពារ​យ៉ាង​ត្រឹមត្រូវ​នៅឯ​គណៈកម្មាធិការ​រៀប​ចំការ​បោះ​ឆ្នោត​​ថ្នាក់​ស្រុក មុនពេល​ត្រូវបាន​បញ្ជូនបន្ត​ទៅកាន់​ការិយាល័យ​បោះឆ្នោត​នៅ​ថ្នាក់ឃុំ​និង​សង្កាត់​​នៅ​​ថ្ងៃ​បោះឆ្នោត​ខាងមុខ។ នេះ​បើតាម​ការបញ្ជាក់​ពី​លោក ហង្ស ពុទ្ធា អ្នកនាំពាក្យ​គណៈ​កម្មាធិការ​ជាតិ​រៀបចំ​ការបោះឆ្នោត។

សូមបញ្ជាក់ថា នៅក្នុង​ការបោះឆ្នោត​ឃុំ​សង្កាត់​អាណត្តិ​ទី៤នេះ គជប បាន​បង្កើត​ការិយាល័យ​បោះឆ្នោត​ដល់​ទៅ ២២១៤៨ ការិយាល័យ​នៅ​ទូទាំងប្រទេស ដែល​ចំនួន​នេះ បាន​កើនឡើង​បើ​ធៀប​នឹង​ការបោះឆ្នោតជាតិ​កាលពី​ឆ្នាំ២០១៣ និង​បាន​ប្រើប្រាស់​បុគ្គលិក​សរុប​ជាង​១៣​ម៉ឺន​២​ពាន់​​នាក់។ បន្ថែម​លើ​នេះ គជប បាន​ត្រៀម​ជួល​ឧ​ត្ថ​ម្ភា​គ​ចក្រ​ក្រុមហ៊ុន​ឯកជន​ចំនួន២គ្រឿង​ទៀត​​សម្រាប់​បម្រើ​ឲ្យ​ការដឹកជញ្ជូន​សម្ភារៈ​បោះ​ឆ្នោត និង​ការបោះឆ្នោត​នៅពេល​មានការ​ចាំ​បាច់​​ណាមួយ។ ឧ​ត្ថ​ម្ភា​គ​ចក្រ​នេះ នឹងត្រូវ​បញ្ឈរជើង២៤ម៉ោង​លើ២៤ម៉ោង នៅឯ​ព្រលាន​យន្ត​ហោះ​អន្តរជាតិ​ភ្នំពេញ។

សូមបញ្ជាក់​ឡើងវិញ​ថា ការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់​អាណត្តិ​ទី៤ នឹង​ប្រព្រឹត្ត​ទៅ​នៅ​ថ្ងៃ អាទិត្យ ទី៤ ខែមិថុនា ខាងមុខ​ដោយមាន​គណបក្សនយោបាយ​ចំនួន​១២​ចូលរួម​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI