កម្ពុជា-សង្គម

លោក ​ហ៊ុន សែន​ ព្រមាន​ដក​នាយ​ទាហាន​ដែល​ចាក់​ដី​ចូល​សមុទ្រ​ ចេញ​ពី​ក្រប​ខណ្ឌ​យោធា​

លោក​នាយករដ្ឋ​មន្ត្រី ​ហ៊ុន ​សែន ​ក្នុង​ពិធី​បើក​បុណ្យស​មុទ្រ​លើក​ទី​០៨​ ជុំទី​០២ ​ខេត្ត​កំពត​ កាល​ពី​ថ្ងៃទី ​២១​ ធ្នូ ​ឆ្នាំ ​២០១៩​​។​
លោក​នាយករដ្ឋ​មន្ត្រី ​ហ៊ុន ​សែន ​ក្នុង​ពិធី​បើក​បុណ្យស​មុទ្រ​លើក​ទី​០៨​ ជុំទី​០២ ​ខេត្ត​កំពត​ កាល​ពី​ថ្ងៃទី ​២១​ ធ្នូ ​ឆ្នាំ ​២០១៩​​។​ @សហការី

លោក​នាយករដ្ឋ​មន្ត្រី​បាន​ព្រមាន​ធ្ងន់ៗ​ថា ​ប្រសិន​បើ​ជា​រក​ឃើញ​ថា ​នាយ​ទាហាន​រូប​ណាពា​ក់​ព័ន្ធ​នឹង​​ករណី​​ចាក់​ដី​ចូល​សមុទ្រ​នៅ​ក្នុង​ខេត្ត​កោះកុង​ នោះ​លោក​នឹង​មិន​អនុញ្ញាត​ឲ្យ​នាយ​ទាហាន​ទាំង​អស់​នោះ ​ស្ថិត​នៅ​ក្នុង​ក្រប​ខណ្ឌ​ជា​កង​យោធពលភូមិន្ទ​កម្ពុជា​បន្ត​ទៀត​នោះ​ទេ​។​ ការ​លើក​ឡើង​របស់​លោក​នាយ​ក​រដ្ឋ​មន្ត្រី ​ហ៊ុន សែន​ បាន​ធ្វើ​ឡើង​ក្នុង​ពេល​ដែល​លោក​បាន​ចូល​រួម​បើក​ពិធី​បុណ្យ​សមុទ្រ​លើក​ទី​០៨​​ជុំទី​២ ​នៅ​ក្នុ​ង​ខេត្ត​កំពត​ កាល​ពី​យប់​មិញ​នេះ ​ដោយ​បាន​បញ្ជា​ឲ្យ​លោក​ឧបនាយករដ្ឋ​មន្ត្រី ​ជា ​សុផា​រ៉ា ​រដ្ឋ​មន្ត្រី​ក្រសួង​រៀបចំ​ដែន​ដី​ នគរូប​នីយ​កម្ម ​និង​សំណង់ ​និង​ជា​ប្រធាន​គណៈ​កម្មាធិការ​ជាតិ​គ្រប់​​គ្រង ​និង​អភិវឌ្ឍន៍​តំបន់​ឆ្នេរ​សមុទ្រ​កម្ពុជា ​និង​លោក​ស្រី ​មិថុនា ​ភូថង ​អភិបាល​ខេត្ត​កោះកុង ​ចុះ​ពិនិត្យ​​និង​ស្រាវ​ជ្រាវ​ជា​បន្ទាន់​។​ 

ផ្សាយពាណិជ្ជកម្ម

សូម​បញ្ជាក់​ថា ​នេះ​មិន​មែន​ជា​លើក​ទី​០១​ទេ ​ដែល​ប្រមុខ​រដ្ឋាភិបាល​កម្ពុជា​បាន​ចេញ​បទ​បញ្ជា​បែប​នេះ ​ខណៈ​មួយ​រយៈ​ពេល​ចុង​ក្រោយ​នេះ ​ករណី​ចាក់​ដី​ចូល​សមុទ្រ​ ដើម្បី​ធ្វើ​ជា​កម្ម​សិទ្ធិ​ផ្ទាល់​ខ្លួន​ បាន​កើត​ឡើង​ជា​បន្ត​បន្ទាប់​ដូច​នៅខេ​ត្ត​ព្រះសីហនុនិងខេត្ត​កោះកុងនេះ​ជា​​ដើម​​។​ ​បន្ថែម​​​លើ​​នេះ ​​លោក​នាយក​រដ្ឋ​មន្ត្រី ​ហ៊ុន​ សែន​ ក៏​បាន​បញ្ជា​ឱ្យ​រដ្ឋបាល​ខេត្ត​ទាំង​អស់​ដែល​នៅ​ជាប់​តំបន់​ឆ្នេរ​សមុទ្រ ​ត្រូវ​ការពារ​តំបន់​ឆ្នេរ​សមុទ្រ ​ដើម្បី​ឱ្យ​ឆ្នេរ​សមុទ្រ​កម្ពុជា​ បន្ត​ស្ថិត​នៅជា​ឆ្នេរ​ដែល​ស្អាត​បំផុត ​នៅ​ក្នុង​ក្រប​ខណ្ឌ​ពិភព​លោក ​និង​ដើម្បី​កុំ​ឱ្យ​ឆ្នេរ​សមុទ្រ​របស់​កម្ពុជា​ត្រូវ​បាន​ដក​ហូត​ចេញ​ពី​សមាជិក​ក្លិប​ឆ្នេរ​សមុទ្រ​ស្អាត​បំផុត​នៅ​ក្នុង​ពិភព​លោក​។​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI