អានតួអត្ថបទ
កម្ពុជា-នយោបាយ

ជិត​ដាច់​ឆ្នាំ ​លោក​ហ៊ុន សែន ​ផ្ញើសារ​សុំ​ឲ្យ​អាមេរិក​លុបចោល​បំណុល​ដែល​កម្ពុជា​ជំពាក់​ជាង​៣០០​លាន​ដុល្លារ​

លោក​​នាយករដ្ឋមន្រ្តី​ ហ៊ុន សែន​ ក្នុង​ពេល​ចូលរួម​ពិធី​បើក​បុណ្យ​សមុទ្រ​នៅ​ខេត្ត​​ព្រះសីហនុ ​កាល​ពី​ថ្ងៃទី​ ២៤​ ធ្នូ ​ឆ្នាំ ​២០១៦។​
លោក​​នាយករដ្ឋមន្រ្តី​ ហ៊ុន សែន​ ក្នុង​ពេល​ចូលរួម​ពិធី​បើក​បុណ្យ​សមុទ្រ​នៅ​ខេត្ត​​ព្រះសីហនុ ​កាល​ពី​ថ្ងៃទី​ ២៤​ ធ្នូ ​ឆ្នាំ ​២០១៦។​ @facebook
ដោយ៖ វ៉ា សំណព្វ
1 នាទី

លោកនាយក​រដ្ឋមន្ត្រី ហ៊ុន សែន បាន​ផ្ញើ​សារ​ពី​ខេត្ត​ព្រះសីហនុ​កាលពី​យប់មិញ ជាទី​ដែល​លោក​​បាន​ចូលរួម​បើក​ពិធីបុណ្យ​សមុទ្រ ដោយបាន​អំពាវនាវ​ឲ្យ​រដ្ឋាភិបាល​ថ្មី​របស់​អាមេរិក ពិចារណា​​លុប​ចោល​បំណុល​ដែល​កម្ពុជា​ជំពាក់ ក្នុងសម័យ​សាធារណរដ្ឋ​ខ្មែរ​ជាង​៣០០​លាន​​ដុល្លារ​អាមេរិក។ បន្ថែម​លើ​នេះ លោក ហ៊ុន សែន ដែល​កាន់អំណាច​យូ​នៅ​កម្ពុជា ក៏​បាន​​ស្តីបន្ទោស​ទៅលើ​រដ្ឋាភិបាល​អាមេរិក និង​សម្ព័ន្ធមិត្ត ដែល​បាន​ប្រៀបប្រដូច​វិនាសកម្ម​នៅ​​ម​ជ្ឈឹ​ម​បូព៌ា​ពេលនេះ ទៅនឹង​វិនាសកម្ម​នៅ​កម្ពុជា ដែល​បណ្តាលមកពី​រដ្ឋ​ប្រហារ​ទម្លាក់​សម្តេច​ព្រះ នរោត្តម សីហនុ នៅ​ឆ្នាំ១៩៧០។

ផ្សាយពាណិជ្ជកម្ម

ដោយបាន​ថ្លែង​នៅក្នុង​ពិធី​បើក​បុណ្យ​សមុទ្រ​នៅ​ខេត្ត​ព្រះសីហនុ កាលពី​យប់​ថ្ងៃទី២៤ ខែធ្នូ ឆ្នាំ២០១៦នេះ លោកនាយក​រដ្ឋមន្ត្រី ហ៊ុន សែន បាន​ដំឡើង​វោហា​ស័ព្ទខ្លាំងៗថា កាលណោះ​អាមេរិក គឺជា​អ្នកជំរុញ​ឱ្យ មាន​រដ្ឋប្រហារ​ទម្លាក់​សម្តេច នរោត្តម សីហនុ នៅក្នុង​ប្រទេស​កម្ពុជា ដែល​រដ្ឋប្រហារ​នេះហើយ បាន​បង្កើតជា​សង្គ្រាម​នៅក្នុង​ប្រទេស​កម្ពុជា និង​បង្កើត​របប​ខ្មែរក្រហម ទើប​មាន​វិនាសកម្ម​ធ្ងន់ធ្ងរ​ដល់​ប្រទេស​កម្ពុជា។ ដូច្នេះ​សហរដ្ឋអាមេរិក ត្រូវតែ​ប៉ះប៉ូវ​សង​ដល់​កម្ពុជា​វិញ តាមរយៈ​ការលុបចោល​បំណុល​សម្រាប់​សង​ដល់​វិនាស​កម្មនេះ។ លោកនាយក​រដ្ឋមន្ត្រី បាន​ចាត់ទុកថា បំណុល​ដែល​កម្ពុជា​ជំពាក់​ជំនាន់​នោះ គឺជា​បំណុល​កង្វក់។

ក្រៅពី​ករណីនេះ លោកនាយក​រដ្ឋមន្ត្រី ហ៊ុន សែន ក៏បាន​ស្តីបន្ទោស​ទៅលើ​សម្ព័ន្ធមិត្ត​អាមេរិក ដែល​គាំទ្រ​ឲ្យ​មាន​បដិវត្តន៍​ពណ៌​ផ្តួលរំលំ​រដ្ឋាភិបាល​នៅក្នុង​ប្រទេសមួយ​ចំនួន​នៅលើ​ពិភពលោក ហើយ​បណ្តាល​ឲ្យ​មាន​ភ្លើងសង្គ្រាម និង​ជនភាសខ្លួន​រាប់សិប​ម៉ឺន​នាក់​ផងដែរ។

គួរ​ជំរាបជូន​ថា កម្ពុជា​បាន​ជំពាក់​បំណុល​អាមេរិក​ប្រមាណ​ជា៣០០លាន​ដុល្លា​អាមេរិក នៅ​ចន្លោះ​ឆ្នាំ១៩៧២ដល់​ឆ្នាំ១៩៧៤ នៅ​ក្នុងសម័យ​សាធារណរដ្ឋ​ខ្មែរ របស់លោក​សេនាប្រមុខ​លន់ ណ​ល់។ បើទោះបីជា មិនមាន​សង្ឃឹម​ច្រើន ប៉ុន្តែ​លោកនាយក​រដ្ឋមន្ត្រី​ហ៊ុន សែន សង្ឃឹម​ខ្លះ​ថា តាមរយៈ​ស្ថានទូត​អាមេរិក​ប្រចាំ​នៅ​ទីក្រុង​ភ្នំពេញ នឹង​ប្រាប់​ទៅ​ប្រធានាធិបតី​ថ្មី​របស់​អាមេរិក​លោក ដូ​ណា​ល់​ត្រាំ ដែល​នឹង​ស្បថ​ចូលកាន់​តំណែង​ជា​ផ្លូវការ​នៅ​ចុងខែ​មករា ឆ្នាំ២០១៧ខាងមុខនេះ ដើម្បី​លើកយក​សំណើរ​របស់លោក​ទៅ​ពិចារណា នឹងធ្វើ​សេចក្តី​សម្រេច​ចិត្ត​ដោយ​ទទួលខុសត្រូវ​យ៉ាងហោចណាស់​ក្នុង​ផ្នែក​សីលធម៌​មួយ ក្នុងនាម​ជា​ប្រទេស​​មហាអំណាច។

សូមបញ្ជាក់ថា នេះ​មិនមែនជា​លើកទីមួយ​ទេ ដែល​រដ្ឋាភិបាល​កម្ពុជា​បានស្នើ​សុំ​ឲ្យ​រដ្ឋា​ភិបាល​​​អាមេរិក​លុបចោល​បំណុល​ដែល​កម្ពុជា​ជំពាក់​ក្នុងសម័យ​លន់ ណុល នេះ។  កាល​ពី​ពេល​កន្លងទៅ រដ្ឋបាល​របស់លោក​នាយ​ក​រដ្ឋមន្ត្រី ហ៊ុន សែន ក៏​ធ្លាប់បាន​ស្នើសុំ​ឲ្យ​អាមេរិក​បង្វែ​បំណុល​ដែល​កម្ពុជា​ជំពាក់​ជាង៣០០លាន​ដុល្លារ​អាមេរិក​នេះ ទៅជា​ជំនួយ​មនុស្សធម៌​វិញ។
ក្រៅពីនេះ លោកនាយក​រដ្ឋមន្ត្រី ហ៊ុន សែន ក៏បាន​ព្រមាន​ពី​ការផ្លាស់ប្តូរ​ណាមួយ ដោយ​កុំ​ឲ្យ​ប្រទេស​ធ្លាក់​ទៅក្នុង​ភ្លើងសង្គ្រាម៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ