ការបរិច្ចាកថវិកាសម្រាប់ទ្រទ្រង់សកម្មភាពកាកបាទក្រហមកម្ពុជា កើនឡើងជាងឆ្នាំទៅជាង២លានដុល្លា
ចុះផ្សាយនៅថ្ងៃ៖
សមាគមកាកបាទក្រហមកម្ពុជា នៅថ្ងៃពុធនេះ បានទទួលថវិកាឧបត្ថម្ភពីសប្បុរសនានា សរុបចំនួនជាង២០,៧លានដុល្លារ គឺកើនលើសឆ្នាំកន្លងទៅ ដែលមានចំនួន១៨លានដុល្លារ។ ការទទួលបានថវិកាដ៏ច្រើនសន្ធឹកសន្ធាប់ពីសប្បុរសជននេះ ធ្វើឡើងនៅក្នុងឱកាសប្រារព្ធពិធីអបអរសាទរខួប១៥៦ឆ្នាំ នៃទិវាកាកបាទក្រហម អឌ្ឍចន្ទក្រហម ៨ឧសភា ឆ្នាំ២០១៩នេះ នៅទីស្នាក់ការកណ្តាលកាកបាទក្រហមកម្ពុជា។
ក្រោមប្រធានបទ«ខ្ញុំស្រលាញ់កាកបាទក្រហមកម្ពុជា» លោកនាយករដ្ឋមន្ត្រី ហ៊ុន សែន និងភរិយា គឺលោកស្រី ប៊ុន រ៉ានី ហ៊ុន សែន ដែលជាប្រធានកាកបាទក្រហមកម្ពុជា បានចំណាយពេលស្ទើរ១ព្រឹក ឈរនៅលើវិទិកាប្រារព្ធពិធី ទទួលស្រោមសំបុត្រពីសប្បរសជន បន្តបន្ទាប់គ្នា ដើម្បីចូលថវិកាជួយទ្រទ្រង់ដល់សកម្មភាពកាកបាទក្រហមកម្ពុជា។ សប្បរសជនដែលបានបរិច្ចាកថវិកាសម្រាប់កាកបាទក្រហមនៅឆ្នាំនេះ រួមមានព្រះមហាក្សត្រ និងសម្តេចម៉ែ មន្ត្រីជាន់ខ្ពស់រដ្ឋាភិបាល មន្ត្រីរាជការសាធារណៈ អ្នកជំនួញ និងឧកញ៉ា ដែលកំពុងធ្វើអាជីវកម្មនៅក្នុងប្រទេសកម្ពុជា។
ទីបំផុតថវិកាចំនួនជាង ២០លានដុល្លារ ត្រូវបានផ្តល់ជូនដល់កាកបាទក្រហមកម្ពុជាសរុប ដោយកើនលើសពីឆ្នាំទៅជាង២លានដុល្លារ។ សប្បរសជនដែលបរិច្ចាកថវិកាច្រើនជាងគេ គឺលោកឧកញ៉ា ហុង ពីវ ប្រធានក្រុមហ៊ុនបុរីពិភពថ្មី គឺចំនួនជិត១,៣លានដុល្លារ។
តាមរយៈថវិកាសប្បរសធម៌ទាំងនេះ លោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានលើកឡើងថាកាលពីឆ្នាំ២០១៨ និង៤ខែ ដើមឆ្នាំ២០១៩នេះ កាកបាទក្រហមកម្ពុជា ដែលមានសាខានៅតាមរាជធានី-ខេត្ត ទាំង២៥ បានសម្រេចនូវសមិទ្ធផលធំៗជាច្រើន រួមមានប្រជាពលរដ្ឋតាមជនបទដាច់ស្រយាលជិត ៣ម៉ឺនគ្រួសារ ទទួលបានអណ្ដូងទឹកស្អាតចំនួន១៣៩ មនុស្សចាស់គ្មានទីពឹង គ្រួសារពិការភាព ស្ត្រីមេម៉ាយ ចំនួន១៦៧គ្រួសារ ទទួលបានផ្ទះថ្មី។
ប្រធានកាកបាទក្រហមកម្ពុជាបន្តថា ប្រជាពលរដ្ឋតាមជនបទចំនួន៤៥៣គ្រួសារ ទទួលបានបង្គន់អនាម័យ គ្រួសាររងគ្រោះដោយគ្រោះធម្មជាតិ និងមនុស្សចាស់ឥតទីពឹង កុមារកំព្រាគ្រួសារមានជំងឺរ៉ាំរ៉ៃ ស្ត្រីមេម៉ាយចំនួនជាង១៤ម៉ឺនគ្រួសារ ទទួលបានអំណោយជាស្បៀង សម្ភារៈ ប្រជាពលរដ្ឋរស់នៅតំបន់ប្រឈមជំងឺគ្រុនចាញ់គ្រុនឈាមចំនួន២ម៉ឺនគ្រួសារ ទទួលបានអំណោយជាមុងសុវត្ថិភាព ជនពិការជើងចំនួន៩៥៦នាក់ ទទួលបានរទេះពិការ ប្រជាពលរដ្ឋរស់នៅតាមតំបន់ព្រំដែនរាប់រយគ្រួសារ ទទួលបានប្រាក់កម្ចី សម្រាប់ធ្វើដើមទុនប្រកបរបរចិញ្ចឹមជីវិត។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ