អានតួអត្ថបទ
ទស្សនៈព្រឹត្តិការណ៍ខ្មែរ

ប័ណ្ណ​បើកបរ​ជា​ប្រធាន​រឿង​ដ៏​ចំរូង​ចំរាស់​ ខណៈ​ប៉ូលិស​រឹត​បន្តឹង​ច្បាប់​ចាប់​ពី​ថ្ងៃ​១​មករា​ឆ្នាំ​២០១៦

សំឡេង ០៥:០០
@HEAM Chetra
ដោយ៖ ញឹម សុផល
៣០ នាទី

ការ​ផ្អាក​ការ​ធ្វើ​ប័ណ្ណ​បើកបរ​របស់​រដ្ឋាភិបាល​អាច​ជួយ​បន្ថយ​ភាព​ជ្រួល​ច្របល់​របស់​ប្រជា​ពលរដ្ឋ​ដែល​ប្រើប្រាស់​យានយន្ត​គ្រប់​ប្រភេទ ហើយ​មិន​ទាន់​មាន​ប័ណ្ណ​បើកបរ​ឬ​ប័ណ្ណ​បើកបរ​ហួស​សុពលភាព។ ជាមួយ​គ្នា​នេះ ការ​សម្រួល​ស្ថានការណ៍​ជុំវិញ​ការ​ធ្វើ​ប័ណ្ណ​បើកបរ​នេះ​គួរ​ មាន​ការ​កែ​សម្រួល​តម្លៃ រដ្ឋ​គួរ​ធ្វើ​ការងារ​នេះ​ជាមួយ​ប្រជាពលរដ្ឋ​ដោយ​ផ្ទាល់ ចៀស​វាង​ប្រជា​ពលរដ្ឋ​មាន​ការ​ខាត​បង់​បន្ថែម​ទៀត​ពី​ការ​ធ្វើ​ប័ណ្ណ​បើកបរ​តាម​រយៈ​អ្នក​រត់​ការ។

ផ្សាយពាណិជ្ជកម្ម

 

នៅ​សល់​តែ​១​ថ្ងៃ​ទៀត​ប៉ុណ្ណោះ​ច្បាប់​ចរាចរណ៍​ជើង​គោក​ថ្មី​នឹង​ត្រូវ​ដាក់​ឲ្យ​អនុវត្ត ក្រោម​ការ​ត្រួត​ពិនិត្យ​យ៉ាង​ម៉ត់ចត់​ពី​ប៉ូលិស​ចរាចរណ៍​នៅ​ទូទាំង​ប្រទេស។ មាន​ន័យ​ថា ប៉ូលិស និង​ភ្នាក់ងារ​ពាក់​ព័ន្ធ​របស់​រដ្ឋ​ដទៃ​ទៀត បាន​ត្រៀម​លក្ខណៈ​រួច​រាល់​អស់​ហើយ​ក្នុង​ការ​នាំ​ពលរដ្ឋ​ខ្មែរ​ដែល​មាន​ភារកិច្ច​បើកបរ​នៅ​តាម​ដង​ផ្លូវ​ឲ្យ​គោរព​ច្បាប់​ទាំង​អស់​គ្នា។

ផ្ទុយ​ពី​ប៉ូលិស អ្នក​បើកបរ​យានយន្ត​និង​ម៉ូតូ នៅ​មិន​ទាន់​បាន​ត្រៀម​លក្ខណៈ​បាន​ច្រើន​គ្នា​នៅ​ឡើយ។ បើ​ដូច្នោះ​ការ​អនុវត្ត​ចរាចរណ៍​នឹង​ប្រព្រឹត្ត​ទៅ​ដោយ​រលូន​ទេ? ប្រហែល​ជា​មិន​អាច​ទេ។ មិន​អាច​ដោយសារ​តែ​មិន​ចាំបាច់​សម្លឹង​ទៅ​មើល​អ្វី​វែង​ឆ្ងាយ​ទេ គឺ​គ្រាន់​តែ​លើក​យក​បញ្ហា​ប័ណ្ណ​បើកបរ​តែ​មួយ​មុខ​មក​និយាយ ក៏​គេ​គិត​ថា​ជា​ផ្នែក​មួយ​នៃ​ឧបសគ្គ​ក្នុង​ការ​អនុវត្ត​ច្បាប់​ទៅ​ហើយ។

ជា​ការ​ពិត មន្ត្រី​នៃ​ក្រសួង​សាធារណៈ​ការ​និង​ដឹក​ជញ្ជូន បាន​បង្ហើប​ប្រាប់​ប្រព័ន្ធ​ផ្សព្វផ្សាយ​ថា​យាន​យន្ត​គ្រប់​ប្រភេទ​ដែល​បាន​ចុះ​បញ្ជី​ត្រឹមត្រូវ​មក​ទល់​ចុង​ឆ្នាំ​២០១៥​នេះ មាន​ប្រមាណ​ជាង​៣លាន​គ្រឿង ដោយ​ឡែក​ប័ណ្ណ​បើកបរ​ទំាំង​ឡាន​និង​ម៉ូតូ​ដែល​ចេញ​ដោយ​ក្រសួង​ដឹក​ជញ្ជូន​មាន​ប្រមាណ​មិន​ដល់​១​លាន​គ្រឿង​ផង។ ភាគ​ច្រើន​នៃ​អ្នក​បើកបរ​ម៉ូតូ​នៅ​មិន​ទាន់​មាន​ប័ណ្ណ​បើកបរ​ទេ ក្នុង​ចំណោម​ម៉ូតូ​ដែល​បាន​ចុះ​បញ្ជី​ជាង​២,៦លាន​គ្រឿង។

ហេតុ​ដូច្នេះ​ហើយ​ ការ​ផ្សព្វ​ផ្សាយ​យ៉ាង​សន្ធាប់​ប្រមាណ​ជា​១​ខែ​ចុង​ក្រោយ​នេះ​ស្តី​ពី​ការ​រឹត​បន្តឹង​ច្បាប់​ចរាចរណ៍ បាន​ធ្វើ​ឲ្យ​ពលរដ្ឋ​ខ្មែរ​ដ៏​ច្រើន​លើស​លុប ដែល​ចាំបាច់​មាន​ការ​បើកបរ​រថយន្ត​និង​ម៉ូតូ​ជា​រៀង​រាល់​ថ្ងៃ​សម្រុក​ទៅ​ធ្វើ​ប័ណ្ណ​បើកបរ​នៅ​តាម​មន្ទីរ​សាធារណៈ​ការ​រាជធានី -ខេត្ត និង​នៅ​តាម​សាលា​បង្រៀន​បើកបរ​ឯកជន​នានា។

ការ​សម្រុក​ទៅ​ធ្វើ​ប័ណ្ណ​បើកបរ​របស់​ពលរដ្ឋ​ខ្មែរ ប្រៀប​បាន​នឹង​ហេតុការណ៍​ចលាចល​មួយ​ ខណៈ​ដែល​ប៉ូលិស​ចរាចរណ៍​ព្រមាន​ថា​នឹង​មិន​មាន​ការ​លើក​លែង​ទៀត​ទេ ក្នុង​ការ​អនុវត្ត​ច្បាប់​ចរាចរណ៍​លើក​នេះ។ ភាព​រំជើប​រំជួល​នៃ​ការ​ដណ្តើម​គ្នា​ធ្វើ​ប័ណ្ណ​បើកបរ​នេះ បង្កើត​ជា​ឱកាស​មួយ​យ៉ាង​ងាយ​ស្រួល ទៅ​ដល់​មន្ត្រី​និង​ផ្នែក​ពាក់ព័ន្ធ​មួយ​ចំនួន​ទៀត ដូចជា​តាម​រយៈ​សាលា​បង្រៀន​បើកបរ​ជា​ដើម​ទទួល​បាន​ផល​ចំណេញ​ពី​សេវាកម្ម​ធ្វើ​ប័ណ្ណ​បើកបរ។ មាន​តម្លៃ​ចាប់​ពី​៣០​ដុល្លារ​ទៅ​ដល់​រាប់​សិប​ដុល្លារ ការ​ធ្វើ​ប័ណ្ណ​បើកបរ និង​ពន្យា​ប័ណ្ណ​បើកបរ ដែល​មិន​ដល់​ទី​ កន្លែង​ដោយ​ផ្ទាល់ បាន​ធ្វើ​ឲ្យ​ប៉ះពាល់​ដល់​ជីវភាព​ប្រជាពលរដ្ឋ​យ៉ាង​ខ្លាំង។ បើ​មិន​ធ្វើ​ប្រឈម​នឹង​ប៉ូលិស​ផាក​ពិន័យ ហើយ​បើ​ធ្វើ​អស់​លុយ​ច្រើន ពិសេស​ចំពោះ​អ្នក​មាន​ជីវភាព​ក្រីក្រ គឺ​មិន​ខុស​អ្វី​ពី​ស្ថានភាព«ចុះ​ទឹក​ក្រពើ ឡើង​លើ​ខ្លា​នោះ​ទេ»។

មក​ដល់​ចំណុច​នេះ មាន​សំណួរ​សួរ​ថា ហេតុអ្វី​បានជា​យូរ​ណាស់​ហើយ​ មិន​នាំ​គ្នា​ទៅ​ធ្វើ​ប័ណ្ណ​បើក​បរ ទើប​តែ​ទឹក​ដល់​ច្រមុះ​បាន​នាំ​គ្នា​ប្រជ្រៀត​គ្នា​ធ្វើ​ដូច្នេះ? តាម​ពិត​ពលរដ្ឋ​ខ្មែរ​មួយ​ចំនួន​ដែល​មាន​ភារកិច្ច​ធ្វើ​ដំណើរ​តាម​ដង​ផ្លូវ​ក៏​មាន​កំហុស​ដែរ។ ក៏​ប៉ុន្តែ​រឿង​នេះ​រាល​ដាល​ត​ៗ​គ្នា​ ដោយសារ​កន្លង​មក​ការ​អនុវត្ត​ច្បាប់​ចរាចរណ៍​មិន​មាន​លក្ខណៈ​ច្បាស់​លាស់។ មន្ត្រី​អនុវត្ត​ច្បាប់​មិន​ហ៊ាន​ជាមួយ​អ្នក​មាន​ធនធាន​និង​អ្នក​មាន​បុណ្យ​សក្តិ​មួយ​ចំនួន។ ការ​សម្រួល​គ្នា​ក្រៅ​ច្បាប់​ចាប់​ពី​មន្ត្រី​ប៉ូលិស​ចរាចរណ៍​ទៅ​ដល់​ប្រព័ន្ធ​យុត្តិធម៌ ដែល​មាន​ភាព​មិន​រឹងម៉ាំ។ល។ ហេតុ​ផល​ទាំង​អស់​នេះ​ហើយ​ ដែល​អ្នក​ខ្លះ​យល់​ថា​ច្បាប់​ត្រូវ​បាន​អនុវត្ត​ដោយ​ផ្តល់​ផល​ប្រយោជន៍​ទៅ​លើ​មន្ត្រី​អនុវត្ត​ច្បាប់ ដូច្នេះ​គេ​មិន​ចាំ​បាច់​ធ្វើ​ប័ណ្ណ​បើកបរ​ក៏​អាច​បើកបរ​ដោយ​សេរី​បាន​ដែរ។

ទោះ​យ៉ាង​នេះ​ក្តី គេ​អាច​និយាយ​ថា​កិច្ច​អន្តរាគមន៍​របស់​ប្រមុខ​រដ្ឋាភិបាល និង​ក្រសួង​ដឹក​ជញ្ជូន ទាន់​ពេល​វេលា​កាល​ពី​ម្សិល​មិញ ដោយ​មាន​ផ្អាក​ការ​ធ្វើ​ប័ណ្ណ​បើកបរ​ជា​បណ្តោះ​អាសន្ន​សិន រង់ចាំ​សិក្សា​ពី​តម្លៃ ដែល​គ្រប់គ្នា​រអ៊ូ​រទាំ​ថា​ខ្ពស់​ពេក​នោះ គឺ​ជា​ការ​ចាំបាច់។ ចាំ​បាច់​ដោយ​ហេតុ​ថា ប្រសិន​ជា​បណ្តោយ​ឲ្យ​ច្របូក​ច្របល់​បែប​នេះ​ទៀត​នោះ ជា​បន្ទុក​ធ្ងន់​ទៅ​លើ​អ្នក​បើកបរ​ដែល​មាន​ជីវភាព​ក្រលំបាក ដែល​គ្រួសារ​ខ្លះ​មាន​ម៉ូតូ​ចាស់​មួយ​គ្រឿង​សម្រាប់​សមាជិក​៣-៤​នាក់។

ដូចនេះ​ដើម្បី​សម្រួល​ដល់​ស្ថានការណ៍​នេះ គប្បី​មាន​ការ​បញ្ចុះ​តម្លៃ​ធ្វើ​ប័ណ្ណ​បើកបរ​ឲ្យ​ទាប​ជាង​មុន និង​ទុក​ពេល​យ៉ាង​ហោច​ណាស់​ពី​កន្លះ​ឆ្នាំ​ទៅ​១​ឆ្នាំ​ដែរ ដោយសារ​ចំនួន​អ្នក​បើកបរ​ដែល​មិន​ទាន់​បាន​ធ្វើ​ប័ណ្ណ​មាន​ចំនួន​ច្រើន​លើស​លុប។ ម៉្យាង​ទៀត ការ​ដែល​អាច​ធ្វើ​ប័ណ្ណ​បើកបរ​បាន​លុះត្រា​តែ​មាន​អត្តសញ្ញាណ​ប័ណ្ណ ក៏​ប៉ុន្តែ​បើ​អត្តសញ្ញាណ​ប័ណ្ណ​នៅ​ជា​បញ្ហា​នៅ​ឡើយ វា​ជា​ចំណោទ​មួយ រួម​ចំណែក ក្នុង​ការ​ខកខាន​ធ្វើ​ប័ណ្ណ​បើកបរ ក្នុង​ចំណោម​ប្រជាពលរដ្ឋ។

មួយ​វិញ​ទៀត​រដ្ឋ​គួរ​តែ​បង្កើត​កន្លែង​ធ្វើ​ប័ណ្ណ​បើកបរ​ឲ្យ​បាន​ច្រើន​និង​កន្លែង​ប្រឡង​យក​ប័ណ្ណ​គួរ​តែ​មាន​ទីធ្លា​ទូលាយ។ យក​ល្អ​គួរ​សម្រួល​កន្លែង​ធ្វើ​ប័ណ្ណ​បើកបរ​ឲ្យ​ទៅ​ដល់​មូលដ្ឋាន​ប្រជាពលរដ្ឋ​រស់នៅ​ដូច​ជា​ឃុំ-សង្កាត់​ជា​ដើម បើ​អាច​ធ្វើ​ទៅ​បាន ចៀសវាង​ដាក់​នៅ​កន្លែង​ឆ្ងាយ​ធ្វើ​ឲ្យ​ប្រជាពលរដ្ឋ​នៅ​តំបន់​ខ្លះ​ត្រូវ​ឡើង​ចំងាយ​រាប់​សិប​គីឡូ​ទៅ​ដើម្បី​ធ្វើ​ប័ណ្ណ​បើកបរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ