កម្ពុជា

EU ចាត់​ទុក​បញ្ហា​បម្រែ​បម្រួល​អាកាស​ធាតុ នៅ​តែ​ជា​បញ្ហា​អាទិភាព​ដែល​ត្រូវ​ដោះ​ស្រាយ

ការ​ផ្សព្វផ្សាយ​ពី​បំរែ​បម្រួល​អាកាស​ធាតុ ​នា​ពេល​កន្លង​មក។​
ការ​ផ្សព្វផ្សាយ​ពី​បំរែ​បម្រួល​អាកាស​ធាតុ ​នា​ពេល​កន្លង​មក។​ @European Union in Cambodia

សហ​ភាព​អឺរ៉ុប នៅថ្ងៃទី ២១ សីហា នេះ​បាន​ប្រកាស​ថា នឹង​ដាក់​ឲ្យ​ដំណើរ​ការ «ការ​រាប់​ថយ​ក្រោយ​សន្និសីទ​លើក​ទី ២១ ស្តី​ពី​ការ​ប្រែប្រួល​អាកាសធាតុ» ។ ជា​សន្និសីទ ដែល​បង្កើត​ឡើង​ ក្នុង​គោល​បំណង​បង្កើន​ការ​យល់​ដឹង​ពី​បញ្ហា​បម្រែ​បម្រួល​អាកាសធាតុ​ ដែល​ជា​បញ្ហា​ប្រឈម​របស់​ពិភពលោក​ទាំង​មូល និង ទម្លាយ​នូវ​ភាព​ទាល់​ច្រក​តាម​រយៈ​យុទ្ធនាការ​ប្រឆាំង​នឹង​ការ​ប្រែប្រួល​អាកាស​ធាតុ។

ផ្សាយពាណិជ្ជកម្ម

លោក Alain Vandersmissen ភារធារី​នៃ​ប្រតិភូ​សហភាព​អឺរ៉ុប​ប្រចាំ​ប្រទេស​កម្ពុជា នៅ​ថ្ងៃ​ទី​ ២១​ សីហា នេះ បាន​ធ្វើ​ការ​ផ្តល់​នូវ​ដំណឹង​ជា​មុន ពី​ការ​ដាក់​ឲ្យ​ដំណើរ​ការ​នៅ​ នៃ« ការ​រាប់​ថយ​ក្រោយ​ដើម្បី​សន្និសីទ​លើក​ទី​២១ នៃ​ភាគីហត្ថលេខី​ស្តីពី​ការ​ប្រែប្រួល​អាកាស​ធាតុ» ដែល​នឹង​ប្រព្រឹត្ត​ទៅ​ខែ​កញ្ញា ខាង​មុខ​នេះ។

យ៉ាង​ណាមិញ បើ​ទោះបី​ជា​បញ្ហា​បម្រែ​បម្រួល​អាកាស​ធាតុ​ជា​បញ្ហា​មួយ​ដែល​កំពុង​តែ​គំរាម​គំហែង​ដល់​ពិភព​លោក រួម​ទាំង​ប្រទេស​កម្ពុជា ផង​នោះ សហភាពអឺរ៉ុប នៅ​តែ​រំពឹង​ថា​នឹង​សម្រេច​ឲ្យ​បាន​នូវ​ភាព​ទាល់​ច្រក​ ក្នុង​ការ​យុទ្ធនាការ​ជា​សកល ប្រឆាំង​នឹង​ការ​ប្រែប្រួល​អាកាសធាតុ​ តាម​រយៈ​ការ​ចង​ក្រង​ច្បាប់ និង​កិច្ច​ព្រម​ព្រៀង​ជា​សកល​ស្តី​ពី​អាកាស​ធាតុ​ដោយ​គ្រប់​ប្រជាជាតិ​ទាំង​អស់។

ជារ​ការ​កត់​សំគាល់ សហភាព​អឺរ៉ុប គឺ​ជា​ដៃ​គូ​ឈាន​មុខ​គេ​ក្នុង​ការ​គាំទ្រ​ដល់​រាជរដ្ឋាភិបាល​កម្ពុជា​ ដើម្បី​ប្រយុទ្ធ​ប្រឆាំង​នឹង​ការ​ប្រែប្រួល​អាកាស​ធាតុ និង​កាត់​បន្ថយ​គ្រោះ​មហន្តរាយ​នៅ​កម្ពុជា។

ជាក់​ស្តែង សហភាព​អ៊ឺរ៉ុប​បាន​ទទួល​ការ​អនុញ្ញាត ក្នុង​ការ​បង្កើត​កម្មវិធី​សម្រាប់​ទូរស័ព្ទ​ចល័ត​ ដែល​មាន​ឈ្មោះ​ថា​ «ចាប់​ផ្តើម​ឥឡូវ​នេះ» ។ ជា​កម្មវិធី​ទូរស័ព្ទ ដែល​នឹង​បញ្ជូន​សារ​ជា​រៀង​រាល់​ថ្ងៃ​ ស្តីពី​ការ​ប្រែប្រួល​អាកាស​ធាតុ ពត៌មាន​ស្តី​ពី​ការ​ចរចា​ជា​សកល ការ​បង្កើត​ថ្មី​ និង​គម្រោង​ការ​បន្សាំ​នៅ​ក្នុង​ប្រទេស​កម្ពុជា ទៅ​ដល់​អ្នក​ដែល​ទាញ​យក​កម្មវិធី​នេះ។

បន្ថែម​លើ​នេះ នៅ​ថ្ងៃ​ទី​២១ សីហា នេះ សហភាពអ៊ឺរ៉ុប ក៏​បាន​រៀបចំ​ពិធី​ប្រគល់​រង្វាន់ ដល់​បេក្ខជន​ជ័យ​លាភី​ចំនួន​បី​រូប ក្នុង​ចំណោម​បេក្ខជន ៥០០នាក់ ពី​ការ​ប្រឡង​រូប​ថត​ស្តី​ពី​ ការ​ប្រែប្រួល​អាកាស​ធាតុ។ កម្មវិធី​ប្រកួត​ប្រជែង​រូបថត​ស្តី​ពី​ការ​ប្រែប្រួល​អាកាស​ធាតុ​នេះ ផង​ដែរ បង្កើត​ឡើង​ក្នុង​គោល​បំណង លើក​កម្ពស់​ការ​យល់​ដឹង​ពាក់​ព័ន្ធ​នឹង​បញ្ហា​បម្រែ​បម្រួល​អាកាស​ធាតុ ឲ្យ​កាន់​តែ​ទូលំ​ទូលាយ នៅ​ក្នុង​ចំណោម​ប្រជាជន​កម្ពុជា។

សូម​បញ្ជាក់​ថា កាល​ពី​ពេល​ថ្មី​ៗ​កន្លង​ទៅ​នេះ​វេទិកា​នៃ​អង្គការ​មិន​មែន​រដ្ឋាភិបាល​ស្តី​ពី​កម្ពុជា រួម​ជាមួយ​នឹង​មន្រ្តី​នៃ​ក្រសួង​បរិស្ថាន ក៏​បាន​ធ្វើ សិក្ខាសាលា​ថ្នាក់​តំបន់​ស្តី​អំពី«ការ​បន្សុំា​នឹង​បម្រែ​បម្រួល​អាកាស​ធាតុ»។ ជា​សិក្ខាសាលា ដើម្បី​លើក​កម្ពស់​ការ​យល់​ដឹង និង​ការ​អប់រំ​អំពី​ការ​បន្សុំា​នឹង​បម្រែ​បម្រួល​អាកាស​ធាតុ ព្រម​ទាំង ការ​បន្ថយ​នូវ​ហានិភ័យ​នៃ​គ្រោះ​ធម្មជាតិ ពិសេស​គឺ​ស្វែង​រក​ដំណោះ​ស្រាយ​សមស្រប​ដើម្បី​ឆ្លើយ​តប​នឹង​បញ្ហា​ទាំង​នោះ៕

អត្តបទដោយ៖ សរ ពិសី

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI