កម្ពុជា-អឺរ៉ុប

ទិវាអឺរ៉ុប​ទី៦០​ចង់​ទាក់ទាញ​អារម្មណ៍​សិស្ស​និង​និស្សិត​ខ្មែរ

៩ ឧសភា ១៩៥០ ត្រូវបាន​គេ​កំណត់​យក​ជា​​​ទិវា​សហភាពអឺរ៉ុប
៩ ឧសភា ១៩៥០ ត្រូវបាន​គេ​កំណត់​យក​ជា​​​ទិវា​សហភាពអឺរ៉ុប ©រក្សាសិទ្ធិ

គណៈប្រតិភូ​សហភាព​អឺរ៉ុប ​​រួមទាំង​ស្ថានទូត​នៃ​រដ្ឋ​ជា​សមាជិក​សហភាព​អឺរ៉ុប​ ប្រចាំ​​ប្រទេស​កម្ពុជា​​ បាន​ជ្រើស​រើស​យក​ដំណើរ​ទស្សនកិច្ច​ទៅ​កាន់​វិទ្យាល័យ​​ និង​​សាកល​​វិទ្យាល័យ​ចំនួន​៥ ​​ដើម្បី​អបអរសាទរ​ទិវា​អឺរ៉ុប​លើក​ទី​៦០ ​ថ្ងៃ​ទី ៩​ឧសភា​ ១៩៥០​​៩-​៩ឧសភា ​​២០១០។ ​​គោលដៅ​នៃ​ដំណើរ​ទស្សនកិច្ច​នេះ​ គឺ​ដើម្បី​ធ្វើ​បទ​បង្ហាញ​ដល់​សិស្ស​​និង​​និស្សិត​ខ្មែរ ​អំពី​សហភាព​អឺរ៉ុប ​ដែល​គេ​អួត​សរសើរ​ថា​​ជា​ប្រទេស​​សន្តិភាព ​​វិបុលសុខ​​ និង​ការ​អភិវឌ្ឍន៍​សេដ្ឋកិច្ច។​​ សហភាព​អឺរ៉ុប​ក៏​ចង់​បង្ហាញ​ថា​​ ពួកគេ​មិន​បាន​ភ្លេច​ប្រទេស​កម្ពុជា​ទេ។

ផ្សាយពាណិជ្ជកម្ម

 

សេចក្តីរាយការណ៍​របស់ ប៉ែន បូណា ពីភ្នំពេញ

ការ​ផ្សព្វផ្សាយ​អំពី​សហភាព​អឺរ៉ុប ​នៅ​ក្នុង​ចំណោម​សិស្ស​​និង​និស្សិត​ខ្មែរ​​ គឺ​ជា​​ប្រធានបទ​ ដែល​សហភាព​អឺរ៉ុប​បាន​ជ្រើស​រើស​យក​​ សម្រាប់​ការ​ប្រារព្ធ​ទិវា​អឺរ៉ុប​ លើក​​ទី៦០​​ ដែល​នឹង​ឈាន​មក​ដល់​នៅ​ថ្ងៃ​ទី​៩​ឧសភា​ស្អែក​នេះ។ ​​វិទ្យាល័យ​ព្រះស៊ីសុវត្ថិ​​ សាកលវិទ្យាល័យ​បៀលប្រាយ​​ សាកលវិទ្យាល័យ​ជាតិ​គ្រប់គ្រង​​ សាកលវិទ្យាល័យ​​ន័រតុន​​ និង​សាកលវិទ្យាល័យ​វិទ្យាសាស្រ្ត​សុខាភិបាល​​ គឺជា​គោលដៅ​នៃ​ដំណើរ​​ទស្សនកិច្ច​របស់​គណៈប្រតិភូ​សហភាព​អឺរ៉ុប។

​លោក​ Rafael Dochao Moreno ​ភារធារី​នៃ​ប្រតិភូ​គណៈកម្មការ​អឺរ៉ុប​ នៅ​កម្ពុជា​​ បាន​ពន្យល់​ថា​​ ការ​ធ្វើ​បទ​បង្ហាញ​ អំពី​សហភាព​អឺរ៉ុប​ដល់​សិស្ស​​និង​​និស្សិត​ខ្មែរ​ គឺ​​ដើម្បី​​ឲ្យ​ពួកគេ​បាន​យល់ដឹង​ អំពី​សហភាព​អឺរ៉ុប ​​ដែល​លោក​ហៅ​ថា​​ជា​ប្រទេស​ដែល​មាន​​សន្តិភាព​​ វិបុលសុខ ​​និង​ការ​អភិវឌ្ឍន៍​ជឿនលឿន​ផ្នែក​សេដ្ឋកិច្ច។​ ប៉ុន្តែ​​មន្ត្រីរូប​នេះ​​អះអាង​ថា ​​សហភាព​អឺរ៉ុប​មិន​បាន​ភ្លេច​ប្រទេស​កម្ពុជា​ឡើយ។

សហភាព​អឺរ៉ុប​ក៏ជា​ម្ចាស់​ជំនួយ​ដ៏ធំ​មួយ​ សម្រាប់​កម្ពុជា​ដែរ។​​ ជំនួយ​របស់​​អឺរ៉ុប​គឺ​ផ្តោត​សំខាន់​ទៅ​លើ​វិស័យ​អប់រំ​​ ប្រជាធិបតេយ្យ​​ និង​ការ​គោរព​សិទ្ធិ​មនុស្ស។​ កាលពី​ខែ​មុន​នេះ ​សហភាព​អឺរ៉ុប​​បាន​ប្រកាស​រក​ដៃគូ ដែល​ធ្វើការ​ផ្នែក​សិទ្ធិ​មនុស្ស​នៅ​​កម្ពុជា ​ដើម្បី​ដាក់​ពាក្យ​សុំ​ជំនួយ​ហិរញ្ញវត្ថុ ​ដែល​មាន​​ទឹកប្រាក់​សរុប​ជិត​២​លាន​ដុល្លារ​អាមេរិក។​​ ប្រាក់​នេះ​នឹង​ត្រូវ​បែង​ចែង​ដល់​អង្គការ​​ និង​សមាគម​ការពារ​សិទ្ធិ​មនុស្ស​ក្នុង​​ស្រុក​ ដែល​ត្រូវ​បាន​គេជ្រើស​រើស។

គួរ​កត់សម្គាល់​ផងដែរ​ថា ​​ប្រទេស​កម្ពុជា​ហាក់​កំពុង​ក្លាយ​ជា​ប៉ូល​មួយ​ នៃ​ការ​ចាប់​​អារម្មណ៍​ ពី​សំណាក់​មហា​អំណាច​ធំៗ​លើ​ពិភពលោក។ ​​មហា​អំណាច​ចិន​បាន​និង​កំពុង​​រឹត​ចំណង​ការទូត​ជាមួយ​កម្ពុជា​កាន់តែ​រឹងមាំ​ ពី​មួយ​ថ្ងៃ​ទៅ​មួយ​ថ្ងៃ។​ ក្រោយ​ពី​បាន​ទទួល​​ជំនួយ​យោធា​ពី​ប្រទេស​ចិន​ កាល​ពី​សប្តាហ៍​មុន​​ រដ្ឋសភា​កម្ពុជា​ទើបតែ​បាន​អនុម័ត​ក្នុង​​សប្តាហ៍​នេះ ​នូវ​អនុសញ្ញា​ ស្តីពី​កុងស៊ុល​រវាង​កម្ពុជា​ និង​​ចិន។​ អនុសញ្ញា​នេះ​​នឹង​អនុញ្ញាត​ឲ្យ​​ប្រទេស​ទាំងពីរ​បង្កើន​ស្ថាន​អគ្គកុងស៊ុល​ថ្មីៗ​ទៀត​ បន្ថែម​ពីលើ​ស្ថាន​ឯកអគ្គ​រាជទូត ​​និង​រដ្ឋទូត ​​ដែល​មាន​ស្រាប់។

សហរដ្ឋ​អាមេរិក ​​ថ្វី​បើ​បាន​ប្រកាស​ព្យួរ​ជំនួយ​យោធា​មួយ​រយៈ​ក្តី​​ ក៏នៅ​តែ​មាន​​ទំនាក់ទំនង​យ៉ាង​ល្អ​ជាមួយ​កម្ពុជា​ ក្នុង​វិស័យ​ផ្សេង​ទៀត​ដែរ។ ​​ជារឿយៗ ​​ប្រទេស​ទាំងពីរ​​តែង​អួត​សរសើរ​ អំពី​ទំនាក់ទំនង​កាន់តែ​ល្អ​ជាមួយ​គ្នា។ ​​ក្នុង​ឱកាស​ខួប​ទិវា​អឺរ៉ុប​លើក​ទី​​៦០​នេះ​​ សហភាព​អឺរ៉ុប​ក៏បាន​ម្នីម្នា​ខ្លាំង​ណាស់​ដែរ ​ក្នុង​ការ​​បញ្ជ្រាប​ឥទ្ធិពល​របស់​ខ្លួន​ ទៅ​ក្នុង​សិស្ស-​​និស្សិត​​ ដែល​ជា​សសរ​ទ្រូង​របស់​កម្ពុជា​៕​​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI