អានតួអត្ថបទ
កម្ពុជា

ពិព័រណ៍​ភូមិ​១​ផលិតផល​១​នឹង​ត្រូវ​ធ្វើ​ឡើង​រយៈពេល​បី​ថ្ងៃ​ដើម​ខែ​ឧសភា​ខាង​មុខ​នេះ!

ដោយ៖ ប្រាក់ ធីតា
១៥ នាទី

ពិព័រណ៍​ផលិតផល​ក្នុង​ស្រុក ​ភូមិ​១​ផលិតផល​១ ​លើក​ទី​៥ ​នឹង​ត្រូវ​ធ្វើ​ឡើង​រយៈពេល​បី​ថ្ងៃ​ចាប់​ពី​ថ្ងៃ​ទី​១ ​ដល់​ថ្ងៃ​ទី​៣​ឧសភា​ខាង​មុខ​នេះ​ នៅ​ខាង​មុខ​វត្តបុទមវត្តី។​ ពិព័រណ៍​នេះ​នឹង​មាន​ការ​ចូលរួម​ពី​ក្រុម​អាជីវករ​ សិប្បករ​ និង​ផលិតករ​ក្នុង​ស្រុក​ចំនួន​ជាង​ ៨០ស្តង់ ​ដែល​មក​ពី​តាម​បណ្តា​ខេត្ត​ និង​រាជធានី​ទាំង​២៥​របស់​កម្ពុជា។ ​នេះ​បើ​តាម​ការ​បញ្ជាក់​របស់​អគ្គលេខាធិការ​រង​នៃ​គណៈ​កម្មាធិការ​ជាតិ​ជម្រុញ​ចលនា​ភូមិ​១​ផលិតផល​១ ​នៅ​ក្នុង​សន្និសីទ​កាសែត​នៅ​ព្រឹក​ថ្ងៃ​ទី​២៣​មេសា​នេះ ​នៅ​ទីស្តីការ​គណៈរដ្ឋមន្ត្រី​កម្ពុជា។

ផ្សាយពាណិជ្ជកម្ម

នេះ​គឺជា​លើក​ទី​៥​ហើយ​ ដែល​គណៈកម្មាធិការ​ជាតិ​ជំរុញ​ចលនា​ភូមិ​១​ផលិតផល​១ ​បាន​រៀបចំ​ឲ្យ​មាន​ការ​តាំង​ពិព័រណ៍​ភូមិ​១​ផលិតផល​១​ នៅ​ដើម​ខែ​ឧសភា​ខាង​មុខ​នេះ។ ​នៅ​ក្នុង​ឱកាស​តាំង​ពិព័រណ៍​នេះ ​នឹង​មាន​ផលិតករ​ សិប្បករ​ អាជីវករ​ចំនួន​ជាង​៨០ស្តង់​ មក​ចូលរួម​តាំង​បង្ហាញ​និង​លក់​ផលិតផល​របស់​ខ្លួន ​ដែល​មាន​ដូចជា​ភេសជ្ជៈ​ទឹកមាត់​ត្រចៀក​កាំ​ ប្រហិត​ខ្មែរ​ ទឹកផ្លែ​ឈើ​ខ្មែរ​ បន្លែ​សរីរាង្គ​ គ្រឿង​អលង្កា ​ចម្លាក់​ប្រាក់​និង​ឈើ ​ផលិតផល​ឬស្សី ​សូត្រខ្មែរ​ ម្ហូបខ្មែរ​និង​ផលិតផល​ជា​ច្រើន​ផ្សេង​ទៀត​ ដែល​សរុប​មាន​ជាង​៧០មុខ។

លោក​ផល សុជាតិ ​អគ្គលេខាធិការ​រង​នៃ​គណៈកម្មាធិការ​ជាតិ​ជំរុញ​ចលនា​ភូមិ​១​ផលិតផល​១ ​បាន​បញ្ជាក់​នៅ​ក្នុង​ឱកាស​សន្និសីត​កាសែត​ថា​ រដ្ឋាភិបាល​កម្ពុជា​បាន​រៀបចំ​យុទ្ធសាស្ត្រ​ចំនួន​បី​ដើម្បី​ជួយ​ដល់​ផលិតករ​ខ្មែរ​ក្នុងការ​ពង្រីក​អាជីវកម្ម​របស់​ពួកគាត់។ ​យុទ្ធសាស្ត្រ​ទាំងបី​នោះ​រួមមាន​៖ ទី១ ផ្តល់​ការ​គាំទ្រ​បច្ចេកទេស​ ដោយ​ផ្តល់ជា​ការ​បណ្តុះ​បណ្តាល​ដល់​ពួកគាត់​ដើម្បី​ពង្រឹង​គុណភាព​ផលិតផល។ ទី២ ​លើក​ទឹកចិត្ត​ផលិត​ករ​ ដែល​មាន​ដូចជា​ការ​ចងក្រង​ជា​ក្រុម​ ឬ​សហគមន៍​ នឹង​រៀបចំ​ឲ្យ​មាន​ការ​ប្រកួតប្រជែង​ និង​ផ្តល់​រង្វាន់​ជាដើម។ ​និង​ទី៣​ ជួយ​ស្វែងរក​ទីផ្សារ​ទាំង​នៅ​ក្នុង​ស្រុក​ និង​បរទេស​ឲ្យ​ផលិតផល​របស់​ពួកគាត់។

លោក​ផល សុជាតិ​បាន​ទទួល​ស្គាល់​ថា​ការ​តាំង​ពិរព័រណ៍​ភូមិ​១​ផលិត​១ ​ត្រូវ​បាន​ធ្វើ​ឡើង​ចំនួន​៥​លើក​មក​ហើយ​ ក៏​ប៉ុន្តែ​មាន​ការ​រីកចម្រើន​បន្តិច​បន្តួច​តែ​ប៉ុណ្ណោះ​ ដោយសារ​តែ​ចំនួន​ផលិតករ​ និង​ការ​យល់ដឹង​របស់​ពួកគាត់​នៅ​មាន​កម្រិត។ ហើយ​ម្យ៉ាងទៀត​រដ្ឋាភិបាល​កម្ពុជា​ក៏​នៅ​មិន​ទាន់​មាន​កញ្ចប់​ថវិកា​ជាក់លាក់​ណាមួយ​ដើម្បី​ជួយ​ទ្រទ្រង់​ដល់​ការ​តាំង​ពិព័រណ៍​នេះ​ដែរ។ ​លោក​អគ្គលេខាធិការ​រង​បាន​បញ្ជាក់​ថា​ អគ្គលេខាធិការដ្ឋាន​តែងតែ​គៀងគរ​រក​វិស័យ​ឯកជន​ឲ្យ​ជួយ​គាំទ្រ​ដល់​ដំណើរ​ការ​នៃ​ការ​តាំង​ពិព័រណ៍​នេះ។

នៅ​ក្នុង​ឱកាស​នៃ​ការ​តាំង​ពិព័រណ៍​ភូមិ​១​ផលិតផល​១​នៅ​ថ្ងៃ​ទី​១​ដល់​ថ្ងៃ​ទី​៣​ឧសភា​ខាង​មុខ​នេះ​លោក​ផល សុជាតិ​បាន​សំណូមពរ​ឲ្យ​ប្រជាជនខ្មែរ​ ទៅ​ចូលរួម​នឹង​គាំទ្រ​ការ​ប្រើប្រាស់​ផលិតផល​ខ្មែរ​ឲ្យ​បាន​ច្រើន​កុះករ​ផង​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ