រោងចក្រកាត់ដេរមួយចំនួននឹងត្រូវព្យូរការងារនៅខែក្រោយដោយសារខ្វះវត្ថុធាតុដើមពីចិន
ចុះផ្សាយនៅថ្ងៃ៖
ក្រសួងការងារ បានឲ្យដឹងថា ចាប់ពីខែមីនាខាងមុខតទៅ រោងចក្រកាត់ដេរមួយចំនួននៅកម្ពុជា នឹងត្រូវព្យួរការងារកម្មករ ដោយសារខ្វះក្រណាត់ដេរ ខណៈចិនបិទរោងចក្រផលិតក្រណាត់ ព្រោះតែការផ្ទុះឡើងនៃមេរោគកូរ៉ូណា។ បើតាមក្រសួងដដែលនេះ រោងចក្រផលិតសម្លៀកបំពាក់ គឺប្រឈមនឹងការព្យួរការងារកម្មករច្រើនជាងគេ តែពីខាងរោងចក្រផលិតស្បែកជើងវិញនៅមិនទាន់មានសញ្ញាប្រឈមខ្លាំងនៅឡើយ។
លោក ហេង សួរ អ្នកនាំពាក្យក្រសួងការងារបានបញ្ជាក់តាមរយៈតេឡេក្រាមកាលពីថ្ងៃអាទិត្យថា ការព្យួរការងាររបស់កម្មករនៅតាមរោងចក្រមួយចំនួននាពេលខាងមុខគឺមិនមែនមកពីរងឥទ្ធិពលពីប្រព័ន្ធអនុគ្រោះពន្ធ EBA របស់សហភាពអឺរ៉ុបឡើយ។ ប៉ុន្តែដោយសារអស់ក្រណាត់ដែលជាវត្ថុធាតុដើមនាំមកពីចិនទើបបង្ខំឱ្យរោងចក្រកាត់ដេរនៅកម្ពុជាមួយចំនួនត្រូវផ្អាកសង្វាក់ផលិតកម្មរបស់ខ្លួនមួយរយៈ។
បើតាមក្រសួងការងារ រោងចក្រផលិតសម្លៀកបំពាក់ និងស្បែកជើង នៅកម្ពុជា មានជិត១ពាន់កន្លែងបានផ្តល់ការងារដល់កម្មករ ជាង៨១ ម៉ឺននាក់នាពេលបច្ចុប្បន្ន។ ប៉ុន្តែមានរោងចក្រកាត់ដេរពី១០ទៅ១៥រោងចក្រប៉ុណ្ណោះនឹងត្រូវបិទទ្វារ ដែលធ្វើឲ្យកម្មករពី៦ពាន់ទៅ៨ពាន់នាក់អស់ការងារធ្វើ ខណៈ៩៥%នៃរោងចក្រនៅសល់ក្រណាត់ដេរតែត្រឹមសប្ដាហ៍ទី ២ នៃខែមីនា និង ៩០ភាគរយទៀត អាចដំណើការដល់ដំណាច់ខែមីនា។
ចាប់តាំងពីមានការផ្ទុះវីរុសកូរ៉ូណានៅប្រទេសចិនមក រោងចក្រជាច្រើននៅក្នុងប្រទេសមហាអំណាចសេដ្ឋកិច្ចមួយនេះ ត្រូវបានបិទទ្វារ ហើយមិនទាន់ដឹងថាត្រូវដំណើរការវិញនៅពេលណាទេ។បញ្ហានេះជាហេតុធ្វើឲ្យមានផលប៉ះពាល់ដល់ដំណើរការរោងចក្រជាច្រើននៅប្រទេសបណ្តាប្រទេសជាច្រើនរាប់ទាំងសហរដ្ឋអាមេរិកផងដែរ។ នេះជាការគូសបញ្ជាក់របស់ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៅរាជបណ្ឌិតសភាកម្ពុជា។
ដើម្បីឆ្លើយតបនឹងបញ្ហាបិទរោងចក្រមួយចំនួននាពេលខាងមុខ បណ្ឌិត គី សេរីវឌ្ឍន៍ លើកឡើងថា រដ្ឋាភិបាលគួរចេញប្រាក់៥០% និងថៅកែរោងចក្រត្រូវចេញបង្គ្រប់៥០%ទៀត ដើម្បីបើកប្រាក់ឈ្នួលឲ្យកម្មករនៅពេលរោងចក្រព្យួរការងារ បើពុំដូចនោះទេបញ្ហានឹងកើតឡើង ពីព្រោះតែកម្មករភាគច្រើនជាប់បំណុលមីក្រូហិរញ្ញវត្ថុ។
យ៉ាងណាក៏ដោយអ្នកសេដ្ឋកិច្ចរូបនេះបានអះអាងថា ផលវិបាកដែលកើតឡើងទៅលើកម្មកររោងចក្រនៅពេលខាងមុខនេះមិនមែនមកពីបញ្ហាEBAរបស់សហភាពអឺរ៉ុបនោះទេ តែជាបញ្ហាដែលកើតចេញពីប្រទេសចិន ដោយសារតែការផ្ទុះឡើងនូវមេរោគកូរ៉ូណា ដែលធ្វើឲ្យប៉ះពាល់ដល់សេដ្ឋកិច្ចពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ