កម្ពុជា

ខ្សែ​ភាពយន្ត​ «មុនដំបូង​គេ​សម្លាប់​ប៉ា​របស់​ខ្ញុំ» នឹង​​បញ្ចាំង​ជា​លើក​ដំបូង​នៅ​សៀមរាប​ក្នុង​ខែ​កុម្ភៈ

តួ​អង្គ​នៅ​ក្នុងខ្សែ​ភាពយន្ត មុន​ដំបូង​ខ្មែរ​ក្រហម​សម្លាប់​ប៉ា​របស់​ខ្ញុំ ថត​នៅ​មុខ​ប្រាសាទ​អង្គរ​វត្ត ក្នុង​ខេត្ត​សៀមរាប។
តួ​អង្គ​នៅ​ក្នុងខ្សែ​ភាពយន្ត មុន​ដំបូង​ខ្មែរ​ក្រហម​សម្លាប់​ប៉ា​របស់​ខ្ញុំ ថត​នៅ​មុខ​ប្រាសាទ​អង្គរ​វត្ត ក្នុង​ខេត្ត​សៀមរាប។ រូបថត​ដោយ Pax Jolie-Pitt
ដោយ៖ អ៊ឹម រចនា
១២ នាទី

ខ្សែ​ភាពយន្ត​ដែល​មាន​ចំណង​ជើង​ថា មុន​ដំបូង​ខ្មែរ​ក្រហម​​សម្លាប់​ប៉ា​របស់​ខ្ញុំ ផលិត​ដោយ​តារាហូលីវូត អេនជេលីណា ជូលី គ្រោង​ចាក់​បញ្ចាំង​ជា​លើក​ដំបូង​នៅខេត្ត​​សៀមរាប​ នា​ថ្ងៃ​ទី​១៨​​ខែ​កុម្ភៈ​ខាង​មុខ​។ តារា​ហូលីវូត អេនជេលីណា ជូលី ដែល​ជា​អ្នក​ដឹក​នាំ​រឿង​នេះ នឹង​ត្រឡប់​មក​កាន់​កម្ពុជា​ជា​ថ្មី​ម្ដង​ទៀតសម្រាប់​ការ​ចាក់​បញ្ចាំង​នេះ ដោយ​គ្រោង​នឹង​ជួប​សន្ទនា​ជាមួយ​អ្នក​ទស្សនានៅ​តាម​រោងភាពយន្ត​ថែម​ទៀត​ផង​។

ផ្សាយពាណិជ្ជកម្ម

នៅ​ទី​បំផុត ខ្សែ​ភាពយន្ត​រឿង មុន​ដំបូង​ខ្មែរ​ក្រហម​សម្លាប់​ប៉ា​របស់​ខ្ញុំ ដែល​ថត​នៅ​ខេត្ត​បាត់ដំបង​និង​សៀមរាប​នៃ​កម្ពុជា​កាល​ពី​ឆ្នាំ​មុន បាន​ផលិត​សម្រេច​ចេញ​ជា​រូបរាង​ហើយ​។ តារា​ហូលីវូត​សញ្ជាតិ​ខ្មែរ លោក​ស្រី អេនជេលីណា ជូលី នឹង​យក​រឿង​នេះ​មក​ចាក់​បញ្ជាំង​នៅ​ស្រុក​ខ្មែរ​ជា​លើក​ដំបូង​បង្អស់។ បើ​តាម​គម្រោង ពិធី​សម្ពោធ​ចាក់​បញ្ជាំង​រឿង​នេះ នឹង​ត្រូវ​រៀបចំ​ធ្វើ​នា​ថ្ងៃ​ទី​១៨ ខែ​កុម្ភៈ ក្នុង​ខេត្ត​សៀមរាប​។

 
នៅ​ក្នុង​បទ​សម្ភាស​ជាមួយ​សារព័ត៌មាន The Guardian របស់​អង់គ្លេស លោក​ស្រី ជូលី ចង់​រៀបចំ​ការ​ចាក់​បញ្ចាំង​តូច​ៗ​នៅ​កម្ពុជា ជា​ពិសេស​នៅ​តាម​វត្ត​អារាម និង​តំបន់​ដាច់​ស្រយាល​។ ក៏​មាន​ផង​ដែរ ការ​ចាក់​បញ្ចាំង​នៅ​តាម​រោង​ភាពយន្ត ដែល​អ្នក​ដឹក​នាំ​រឿង​រូប​នេះ នឹង​ចូល​រួម​ឆ្លើយ​សំណួរ​ទស្សនិកជន ជាមួយ​នឹង​អ្នក​សម្ដែង​សំខាន់​ៗ​នៅ​ក្នុងរឿង​​។

សូម​រំលឹក​ជូន​ថា ខ្សែ​ភាពយន្ត មុន​ដំបូង​ខ្មែរ​ក្រហម​សម្លាប់​ប៉ា​របស់​ខ្ញុំ ត្រូវ​បាន​ផលិត​ឡើង​ដោយ​ផ្អែក​លើ​សៀវភៅ​របស់​លោក​ស្រី លឿង អ៊ឹង​។ ជា​សៀវភៅ​សរសេរ​រៀបរាប់​ពី​ការ​ចងចាំ​របស់​កុមារី​តូច​ម្នាក់​ អំពី​សង្គ្រាម ​និង​ការ​ព្រាត់​ប្រាស​នៅ​ក្នុង​របប​ប្រល័យ​ពូជ​សាសន៍​ខ្មែរ​ក្រហម​។

 
បើ​ទោះ​បី​ជា​ត្រូវ​បាន​ថត​ជា​ភាសា​ខ្មែរ​ទាំង​ស្រុង និង​មាន​តួ​សម្ដែង​ជា​ជន​ជាតិ​ខ្មែរ​ក៏​ពិត​មែន ប៉ុន្តែ​ភាពយន្ត មុន​ដំបូង​ខ្មែរ​ក្រហម​សម្លាប់​ប៉ា​របស់​ខ្ញុំ នឹង​ត្រូវ​ចាក់​បញ្ចាំង​នៅ​ទូទាំង​ពិភពលោក​ផង​ដែរ តាម​រយៈគេហទំព័រ​​បញ្ជាំង​ខ្សែ​ភាពយន្ត​ដ៏​ល្បី​ល្បាញ​ឈ្មោះ Netflix។ Netflix គ្រោង​ចាក់​បញ្ចាំង​ភាពយន្ត​នេះ នៅ​ថ្ងៃ​ទី​១៥​ខែ​កញ្ញា​ខាង​មុខ​។ ពោល​គឺ​៧​ខែ​ ក្រោយ​ការ​ចាក់​បញ្ចាំង​នៅ​ប្រទេស​កម្ពុជា​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI