កម្ពុជា

ទីលាន​ប្រជាធិបតេយ្យ​ចាស់៖ អាជ្ញាធរ​ព្រមាន​ស្ទូច​រថយន្ត​ឬ​ម៉ូតូ​ដែល​ចត​អាណាធិបតេយ្យ ចាប់​ពី​ថ្ងៃ​ចន្ទ​សប្ដាហ៍​ក្រោយ

ផ្លូវ​ជុំ​វិញ​ទីលាន​ប្រជាធិបតេយ្យ​ចាស់ ដែល​ធ្លាប់​ត្រូវ​បាន​ពលរដ្ឋ​រំលោភ​យក​ទៅ​ចត​យានយន្ត​អាណាធិបតេយ្យ
ផ្លូវ​ជុំ​វិញ​ទីលាន​ប្រជាធិបតេយ្យ​ចាស់ ដែល​ធ្លាប់​ត្រូវ​បាន​ពលរដ្ឋ​រំលោភ​យក​ទៅ​ចត​យានយន្ត​អាណាធិបតេយ្យ រូបភាព​ឯកសារ

លោក សុខ ពេញវុធ អភិបាល​ខណ្ឌ​ដូន​ពេញ បាន​ដាក់​ឱសាន​វាទ​ត្រឹម​ថ្ងៃ​ចន្ទ​ទី​២៨​សីហា ឲ្យ​ប្រជាពលរដ្ឋ​ឈប់​លក់​ដូរ​និង​ចត​ឡាន​ម៉ូតូ​នៅ​ជុំ​វិញ​ទីលាន​ប្រជាធិបតេយ្យ​ចាស់​។ បើ​ពុំ​ដូច្នេះ​ទេ អាជ្ញាធរ​នឹង​ស្ទូច​រថយន្ត​និង​ម៉ូតូ​ដែល​ចត​នៅ​លើ​ទ្រូង​ផ្លូវ​ទាំង​អស់​នោះ ទៅ​ទុក​នៅ​រដ្ឋបាល​ខណ្ឌ ដោយ​គ្មាន​ការ​ដោះ​ស្រាយ​ភ្លាម​ៗ​ទេ​។ លោក​អភិបាល​ខណ្ឌ បាន​ព្រមាន​យ៉ាង​ដូច្នេះ នៅ​ព្រឹក​ថ្ងៃ​សៅរ៍​នេះ​។ អត្ថបទ​ដោយ ជក់ សុភា

ផ្សាយពាណិជ្ជកម្ម

ក្នុង​ពេល​ចុះ​ពិនិត្យ​ស្ថានភាព​នៅ​ជុំ​វិញ​ទីលាន​ប្រជាធិបតេយ្យ​ចាស់ នៅ​ព្រឹក​ថ្ងៃ​សៅរ៍​នេះ លោក សុខ ពេញវុធ បាន​អះអាង​ថា រដ្ឋបាល​ខណ្ឌ​បាន​ផ្សព្វផ្សាយ​ពី​វិធានការបោស​សម្អាត​ការ​ចតយានយន្ត ទៅ​កាន់​ប្រជាពលរដ្ឋ​អស់​រយៈ​ពេល​៧​ថ្ងៃមក​ហើយ​។ ពោល​គឺ​ចាប់​តាំង​ពី​ថ្ងៃ​ទី​១៩​សីហា​មក​ម្ល៉េះ​។ ប៉ុន្តែ​ប្រជាពលរដ្ឋ​នៅ​តែ​សំណូមពរ​ឲ្យ​ខណ្ឌ​ពន្យារ​ពេល​។

ឆ្លើយ​តប​ទៅ​នឹង​សំណូមពរ​នេះ ខណ្ឌ​បាន​សម្រេច​ទុក​ពេល​ឲ្យ​ពីរ​ថ្ងៃ​ទៀត​។ ​ហើយ​ចាប់​ពី​ថ្ងៃ​ចន្ទ ទី​២៨​សីហា​ត​ទៅ អាជ្ញាធរ​ខណ្ឌ​នឹង​ចាត់​វិធានការ​ស្ទូច​យានយន្ត​ណា​ដែល​នៅ​តែ​បន្ត​ចត​អាណាធិបតេយ្យ​លើ​ទ្រូង​ផ្លូវ​ជុំ​វិញទីលាន​ប្រជាធិបតេយ្យចាស់ យក​ទៅ​រក្សា​ទុក​នៅ​រដ្ឋបាល​ខណ្ឌ ដោយ​គ្មាន​ការ​ដោះ​ស្រាយ​ភ្លាម​ៗ​ឡើយ​។

អភិបាល​ខណ្ឌ​រូប​នេះ បាន​បញ្ជាក់​បន្ថែម​យ៉ាង​ដាច់​អហង្ការ​ថា គ្មាន​ទៀត​ឡើយ ការ​វិល​ត្រឡប់​ទៅ​ចត​យានយន្ត​យ៉ាង​អាណាធិបតេយ្យ​នៅជុំ​វិញ​អតីត​ទីលាន​ប្រជាធិបតេយ្យ​ដូច​មុន​។ បើ​តាម​លោក សុខ ពេញវុធ សាលា​ខណ្ឌ​នឹង​ដាក់​កម្លាំង​ប្រចាំ​ការ​ព្រឹក​ល្ងាច នៅលើ​ផ្លូវ​១០៦ និង​១០៨ ស្រប​តាមបណ្ដោយទីលាន​ប្រជាធិបតេយ្យ​ចាស់ ដើម្បីឃ្លាំ​មើល​ជាប់​ជា​ប្រចាំ​។ កម្លាំង​ប្រចាំការ​នោះ មាន​សមាសភាព​តាំង​ពី អភិបាល​រង​ខណ្ឌ​ នគរបាល កង​រាជអាវុធហត្ថ ប្រជាការពារ​ខណ្ឌ និង​ចៅ​សង្កាត់​ជា​ដើម។

ក្រៅ​ពី​នោះ សាលា​ខណ្ឌ​ក៏​នឹង​ស្នើ​សុំ​ទៅ​អភិបាល​ក្រុង​និង​មន្ទីរ​សាធារណការ​ផង​ដែរ ឲ្យ​លុប​គំនូស​ពណ៌​ស ដែល​ពលរដ្ឋ​គូស​វាស​សម្រាប់​ចត​យានយន្ត​ពីមុន​ចេញ ដើម្បី​កុំ​ឲ្យ​យល់​ច្រឡំ​ថា ជា​ទីតាំង​ចត​យានយន្ត​។

លោក សុខ ពេញវុធ មាន​ប្រសាសន៍​ថា ការ​រៀប​ចំ​សណ្តាប់​ធ្នាប់​នេះ បាន​សាទរ​ពី​ប្រជាពលរដ្ឋ​ក្នុង​មូលដ្ឋាន ព្រោះ​ពួក​គាត់​មាន​ចំណត​ចេញ​ចូល​ក្នុង​ផ្ទះ​របស់​ខ្លួន​វិញ រួម​ទាំង​បញ្ហា​សណ្តាប់ធ្នាប់ អនាម័យ និង​សន្តិសុខ​ផង​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI