កម្ពុជា

លោកហ៊ុនសែនចាត់​ទុក​ទីលាន​ប្រជាធិបតេយ្យ​ជា​កន្លែង​បង្ក​ភាព​រញ៉េរញ៉ៃហើយ​លោក​បញ្ជា​ឲ្យ​យក​ទៅ​ដាក់​ក្រៅ​ក្រុង!

រូបភាពចាស់៖ ទិដ្ឋភាពនៅទីលានប្រជាធិបតេយ្យ
រូបភាពចាស់៖ ទិដ្ឋភាពនៅទីលានប្រជាធិបតេយ្យ RFI/វឌ្ឍនា

នៅ​ថ្ងៃ​អបអរ​សាទរ​ទិវា​ជនពិការ​ថ្ងៃទី​៦ធ្នូ​នេះ, លោក​នាយក​រដ្ឋ​មន្ត្រីបាន​ឆ្លៀត​ឱកាសថ្លែង​ថារដ្ឋាភិបាល​​កំពុង​ចាត់​ចែង​ប្តូរ​​ទីតាំង​ទីលាន​ប្រជាធិបតេយ្យ​ចេញទៅដាក់​នៅ​​ក្រៅ​ក្រុង​។លោក​ហ៊ុនសែនថែមទាំង​បាន​ចាត់ទុក​ទីលាន​ប្រជាធិបតេយ្យ​ថា​ជាក​ន្លែង​បង្កភាព​រញ៉េរញ៉ៃទៀត​ផង​។

ផ្សាយពាណិជ្ជកម្ម

ក្រៅពី​ចាត់ទុក​ថា​ទីលាន​ប្រជាធិបតេយ្យដែល​ធ្លាប់​តែជាកន្លែង​បញ្ចេញ​មតិ​របស់​ពលរដ្ឋ​គ្រប់​ខេត្ត​ក្រុង​ថា​ជា​កន្លែងបង្ក​ភាព​​រញ៉េរញ៉ៃហើយ​នោះ​លោកនាយករដ្ឋមន្ត្រី​បានបញ្ជាក់​​ថាក្រសួង​មហាផ្ទៃ​នឹង​ប្តូរទីតាំង​ទីលានប្រជាធិបតេយ្យ​នេះទៅ​កាន់​ផ្លូវ​ជាតិ​លេខ៥វិញគឺ​ត្រង់​ម្តុំ​គីឡូម៉ែត្រ​លេខ​៦​។បើ​តាមប្រមុខ​រដ្ឋភិបាល​, អាជ្ញាធរ​​មាន​សិទ្ធិចាត់​ការ​​ក្នុង​រឿងនេះព្រោះជាកិច្ច​ការ​របស់​រដ្ឋ​អំណាច។ហើយ​តាម​ការ​ពន្យល់​របស់​​លោកហ៊ុនសែន, ការសម្តែង​មតិ​នៅ​ទីណាក៏បា​ដែរ ​មិន​សំខាន់​ទេគឺ​សំខាន់​ការ​ផ្សាយ​បន្ត​ផ្ទាល់​ Live ឲ្យ​គេ​មើល​តាម​ហ្វែសបុក​ទេតើ។​

ទន្ទឹម​នឹង​នេះលោកនាយករដ្ឋមន្ត្រីថែម​ទាំង​ថ្លែង​បែប​ឌឺដង​ថាបើ​នៅតែ​មាន​ការ​ជំទាស់ចំពោះ​ការ​ផ្លាស់ប្តូរ​នេះ​ពីសំណាក់​ក្រុម​អង្គការ​​សង្គម​ស៊ីវិលដែល​ភាគច្រើន​គាំទ្រ​ដោយ​សហរដ្ឋអាមេរិកទៀត​នោះលោកថាគួរតែ​យកសួន​ច្បារ​មុខ​ស្ថានទូត​អាមេរិកធ្វើ​ជា​ទីលាន​ប្រជា​ធិបតេយ្យ​​តែម្តង​ទៅ។

គួរ​រម្លឹក​ថាការ​ឌឺដង​ដាក់​សហរដ្ឋអាមេរិក​បែប​នេះ​បាន​ធ្វើ​ឡើង​ជា​បន្ត​បន្ទាប់។ពោលគឺនៅ​ថ្ងៃ​ទី​៤ធ្នូក្នុង​ពិធី​សម្ពោធ​រោង​ចក្រ​ភេជ្ជៈមួយ​លោកហ៊ុនសែន​និយាយ​នៅ​ចំពោះ​មុខ​ឯក​អគ្គរដ្ឋទូត​​អាមេរិក​​តែម្តង​ដោយ​បាន​ចំអក​ដល់​អាមេរិក​ដែល​ជា​ដែន​ដី​បិតាប្រជាធិបតេយ្យ​និង​មាតា​សិទ្ធិមនុស្ស​ជុំវិញ​ការ​ប្រៀបធៀបពី​បាតុកម្ម​ក្រោយ​ការ​បោះឆ្នោត​នៅ​​​អាមេរិកនិង​បាតុកម្មមិនទទួល​ស្គាល់​ការ​លទ្ធផល​បោះឆ្នោត​​នៅ​ស្រុក​ខ្មែរ​។ចំណែក​លោក​ឯកអគ្គ​រដ្ឋ​ទូត​អាមេរិក​នៅ​កម្ពុជាវិញគ្មាន​ឱកាស​ឆ្លើយ​តបបា​នត្រឹមតែ​សើច​ញឹមៗ​តែប៉ុណ្ណោះ។​

សូម​បញ្ជាក់ថា​ទីលានប្រជាធិបតេយ្យ​នាពេល​បច្ចុប្បន្ន​គឺមានទីតាំងនៅកណ្តាល​ក្រុង​ភ្នំពេញក្បែរ​រមណីយដ្ឋាន​វត្តភ្នំនិង​ក្រោយ​ស្ថានទូត​អាមេរិក។គេ​កត់​សម្គាល់​ឃើញថាក្រោយ​ពី​ព្រឹត្តការណ៍​នៃ​មហាបាតុកម្ម​របស់បក្ស​ប្រឆាំងមិន​ទទួល​ស្គាល់​លទ្ធផល​​បោះឆ្នោតឆ្នាំ​២០១៣​បាន​ផុត​រលត់ទៅ, ទីលានប្រជាធិបតេយ្យ​ហាក់​មិន​សូវ​បាន​ស្វាគមន៍​ឲ្យ​មាន​ការ​សម្តែង​​មតិ​ច្រើនផុស​ផុល​​ប៉ុន្មាន​ទេហើយ​​​​សព្វថ្ងៃ​នេះគឺ​កំពុង​តែ​ហ៊ុំព័ទ្ធ​ដោយ​ចំណត​ឡាន​ និង​ជា​កន្លែងផ្ញើកង់​​ម៉ូតូ​ព្រម​ទាំង​ជា​កន្លែង​លេង​បាល់​និង​លេង​ឈូ​ស​ស៊ីលុយ​ជា​ដើម​។

ចំពោះ​សង្គម​ស៊ីវិល​មួយ​ចំនួនការ​ប្តូរ​កន្លែងទីលានប្រជាធិតេយ្យ​ទៅក្រៅក្រុងនោះគឺ​នឹង​កាន់​តែ​បង្ក​​ការ​លំបាក​ក្នុង​ការ​ប្រមូល​ផ្តុំ​មនុស្ស​ទៅ​សម្តែង​មតិហើយ​សម្រែក​​ពួក​គេ​ហាក់​មិន​សូវ​បាន​ឮកង​រំពង​ដូច​ពីមុន​ទេ។ទោះ​យ៉ាង​ណា​ក្តីលោកនាយករដ្ឋមន្ត្រី​បាន​ស្នើ​ថាគួរ​មាន​ការ​យោគយល់​ទុក​កន្លែង​នេះជា​កន្លែង​សម្រាប់​អ្នក​ការ​ទូតអ្នក​រាជការនិង​ជា​កន្លែង​ទេសចរណ៍​ចុះព្រោះ​ជិត​រមណីយដ្ឋាន​វត្ត​ភ្នំស្រាប់ហើយ​កុំ​ទៅ​បង្ក​ភាព​រញ៉ែរញ៉ៃ​នៅទី​នោះអី៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI