កម្ពុជា-ច្បាប់

មន្ត្រីជាន់ខ្ពស់ក្រសួងការពារជាតិច្រានចោលព័ត៌មានទំលាក់សក្តិពីនាយទាហាន

ចុះផ្សាយនៅថ្ងៃ៖ 02/05/2019 - 08:36

ដោយ៖ ញឹម សុផល

មន្ត្រីជាន់ខ្ពស់ក្រសួងការពារជាតិ បានបដិសេធចំពោះពាក្យចចាមអារាម ចំពោះព័ត៌មាន ដែលថាក្រសួងគ្រោងទំលាក់សក្តិពីនាយទាហាន។ ការលើកឡើងរបស់មន្ត្រីជាន់ខ្ពស់ក្រសួងការពារជាតិដូច្នេះ ធ្វើឡើងខណៈដែលមានកិច្ចប្រជុំបូកសរុបលទ្ធផលការងារប្រចាំខែមេសា និងទិសដៅការងារខែឧសភាឆ្នាំ២០១៩ នាព្រឹកថ្ងៃទី០២ខែឧសភានេះ។

ផ្សាយពាណិជ្ជកម្ម

នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ បានបញ្ជាក់ និងបដិសេធ ចំពោះពាក្យចចាមអារាម ដែលថាក្រសួងការពារជាតិ មានគម្រោងទម្លាក់សក្តិនាយទាហាន ដែលព័ត៌មាននេះមិនមែនជាការពិតទេ។ នេះបើតាមការឲ្យដឹងពីនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ នៅលើបណ្តាញសង្គមហ្វេសប៊ុកផ្លូវការរបស់លោក។

នៅក្នុងកិច្ចប្រជុំប្រចាំខែ លោកនាង ផាត បានស្នើសុំឱ្យនាយទាហានទាំងអស់ កុំមានការភ្ញាក់ផ្អើល តាមការបកស្រាយខុសគោលបំណងរបស់រាជរដ្ឋាភិបាលកម្ពុជា ក្នុងផែនការកែទម្រង់កងយោពលខេមភូមិន្ទ រយៈពេល៥ឆ្នាំ ២០១៥-២០១៩។

ការកែទម្រង់ឋានន្តសក្តិ ក្នុងកងយោធពលខេមភូមិន្ទ មានផែនការណ៍យុទ្ធសាស្រ្តយូរអង្វែង ជាជំហានៗ ដើម្បីកសាងកងទ័ពមួយមានគុណភាព និង ប្រសិទ្ធភាពដឹកនាំ បញ្ជាឱ្យសមស្របតាមការវិវឌ្ឍន៍ នៃសភាពការណ៍ជាតិ និងអន្តជាតិ មិនមែនកាត់ ឬទម្លាក់សក្តិ ដូចការបកស្រាយភាន់ច្រឡំនោះទេ។ នេះបើតាមនាយឧត្តមសេនីយ៍ នាង ផាត។

សូមរំលឹកថា កាលពីសប្តាហ៍មុន ដំណឹងនៃការកាត់បន្ថយសក្តិពីកងកម្លាំង រួមមានយោធា និងប៉ូលីស ត្រូវបានប្រព័ន្ធផ្សព្វផ្សាយក្នុងស្រុកនានា លើកឡើងព្រោងព្រាធ។ នៅក្នុងការផ្សព្វផ្សាយទាំងនោះ ការដកស្រង់ប្រសាសន៍លើកឡើងរបស់លោកនាយករដ្ឋមន្ត្រី ហ៊ុន សែន ស្តីពីការរក្សាទុកនាយឧត្តមសេនីយ៍ផ្កាយ៤ តែ២រូប រួមមានរដ្ឋមន្ត្រី ក្រសួងការពារជាតិ និងអគ្គបញ្ជាការកងទ័ព បានទាក់ទាញយ៉ាងខ្លាំងជាសាធារណៈ។

កាលពីថ្ងៃអាទិត្យកន្លងទៅ លោកឧត្តមសេនីយ៍ឯក ហ៊ុន ម៉ាណែត ក៏បានបញ្ជាក់នៅក្នុងពិធីបូកសរុបការងារមួយឯកងពលធំអន្តរាគមន៍លេខ២ដែរថា គោលការណ៍នៃការធ្វើកំណែទម្រង់របស់រាជរដ្ឋាភិបាលចំពោះវិស័យកងទ័ព មិនមែនពេលនេះទេ គឺមានជំហានច្បាស់លាស់ នាយទាហាន ដែលឡើងខ្ពស់ហើយ មិនអាចកាត់ទម្លាក់មកវិញបានទេ។ លោកថា ការដំឡើងឋានន្តរស័ក្តិចំពោះនាយទាហាន ដែលមានការតស៊ូជំនាន់មុនមិនខុសទេ ព្រោះការធ្វើកំណែទម្រង់នេះ គឺជាការលើកទឹកចិត្តចំពោះនាយទាហាន ដែលបានតស៊ូពីជំនាន់មុន ហើយកំណែទម្រង់របស់រដ្ឋាភិបាល គឺមានជាជំហានៗនៅពេលក្រោយ៕