កម្ពុជា-សង្គម

​តំបន់​ទេសចរណ៍​សំខាន់ៗ​បី​របស់​កម្ពុជា​ក្លាយ​ជា​គោល​ដៅ​ជួប​ជុំ​គ្នា​ទទួល​ឆ្នាំ​ថ្មី​នៅ​យប់​នេះ​

ទីក្រុងភ្នំពេញ
ទីក្រុងភ្នំពេញ @Internet

នៅ​យប់​រំលង​អធ្រាត​ថ្ងៃទី​៣១ធ្នូ ឈាន​ចូល​ថ្ងៃទី០១ ខែមករា ឆ្នាំ២០២០នេះ ប្រជា​ពល​រដ្ឋ​នៅ​ជុំវិញ​ពិភព​លោក និង​ប្រជា​ពល​រដ្ឋ​កម្ពុជា​ផង​នឹង​ជួប​ជុំ​គ្នា ដើម្បី​ធ្វើ​ពិធីឆ្លងឆ្នាំចាស់​ចូល​ឆ្នាំ​ថ្មី​។ សម្រាប់​កម្ពុជា តំបន់ទេស​ចរណ៍​សំខាន់ៗ​បី គឺរាជធានីភ្នំពេញ ខេត្តសៀមរាប និង ខេត្តព្រះសីហនុ គឺជា​គោលដៅ​ដ៏​ចម្បង​នៃ​ការ​ជួប​ជុំ​គ្នា​របស់​ភ្ញៀវ​ទេសចរ​ជាតិ និង អន្តរ​ជាតិ​នៅ​រាត្រី​នេះ​។ 

ផ្សាយពាណិជ្ជកម្ម

ដូចជា​រៀងរាល់ឆ្នាំដែរ នៅរា​ជធានីភ្នំពេញនៅ​រាត្រីឆ្លងឆ្នាំចាស់​ចូលឆ្នាំថ្មីនេះ គឺ​មានការប្រគុំតន្រ្តី​មួយចំនួនដែលរៀ​បចំឡើងដោយ​វិស័យឯកជ​នសហការ​ជាមួយអាជ្ញាធរក្រុ​ងភ្នំពេញ។ នេះ​បើតាមកា​របញ្ជាក់ឱ្យដឹ​ងរបស់លោកម៉េត មាសភក្តី អ្នកនាំពាក្យសា​លារាជធានីភ្នំ​ពេញ ហើយលោ​កក៏បានបញ្ជា​ក់ឱ្យដឹងបន្ថែម​ទៀតថា នៅរាត្រីនេះ ក៏នឹងមាន​ការរៀបចំឱ្យមានការបាញ់​កាំជ្រួច​នៅទីតាំងសំខាន់ៗមួ​យចំនួនដែរ ដើម្បី​អបអរសាទរឆ្នាំថ្មី។ បើតាម​អ្នកនាំពាក្យរូបនេះ នៅមុខ​សណ្ឋាគារ និង កាស៊ីណូណា​ហ្គាវើលក៏នឹ​ងមានការរៀប​ចំជួបជុំគ្នា ដើម្បីរា​ប់ថយក្រោ​យ(Count Down)ផងដែរ។ សម្រា​ប់ផ្នែកសន្តិ​សុខវិញ លោកម៉េត មាសភក្តី បានគូស​បញ្ជាក់ថា អាជ្ញាធរនឹងបង្កើន​ការប្រុងប្រយ័ត្នខ្លាំងជាង​មុននៅរាត្រីនេះ​ ដើម្បីការពារសន្តិសុខ សុវត្ថិ​ភាពជូនដល់​ប្រជា​ពលរដ្ឋ។

ចំណែក នៅខេត្តសៀ​មរាបនៃទឹកអ​ង្គរឯណោះវិញ ក៏​មិនខុសគ្នានឹងរាជធា​នីភ្នំពេញដែរ គឺមាន​ការរៀបចំ និងតុបតែង​ភ្លើងលម្អជាច្រើនកន្លែង ដើម្បី​ទទួលស្វាគម​ន៍ឆ្នាំថ្មីនៅរាត្រីនេះ។ លោកលី សំរិទ្ធ អភិបាលរងខេត្តសៀមរាបបា​នអះអាងប្រា​ប់វិទ្យុបារាំងអន្តរ​ជាតិថា នៅយប់នេះ សាលាខេត្តបា​នរៀបចំឆាក​ប្រគុំតន្រ្តីធំមួយនៅតំបន់​ព្រះរាជដំណាក់ ដើម្បីផ្តល់កា​រកម្សាន្តសប្បា​យ និង រាប់ថយ​ក្រោយជុំគ្នា​ទទួលឆ្នាំថ្មី។ រីឯ ផ្នែកសន្តិសុខវិញ ក៏ត្រូវ​បានពង្រឹងខ្លាំងជា​ងថ្ងៃធម្មតាផង​ដែរ។ សម្រា​ប់ចុងឆ្នាំនេះ លោកលី សំរិទ្ធ សង្កេត​ឃើញថា នៅខេ​ត្តសៀមរាបមានភ្ញៀ​វទេសចរជាតិ និង អន្តរជាតិ​បានទៅជួបជុំឆ្លងឆ្នាំ​ជុំគ្នាច្រើនជាងឆ្នាំ​មុនៗ។

ដោយឡែក សម្រាប់ខេត្ត​ព្រះសីហនុជាប់មាត់​សមុទ្រវិញ ក៏ជាគោ​លដៅសម្រា​ប់ទៅលេងកម្សា​ន្ត និង ជួបជុំរបស់ភ្ញៀ​វទេសចរជាតិ និង អន្តរជាតិដែរ។ អភិបាលក្រុងព្រះ​សីហនុ លោកអ៊ី សុខឡេង បានលើ​កឡើងថា នៅរាត្រីនេះ គោលដៅ​សំខាន់នៃកា​រជួបជុំរបស់ភ្ញៀវ​ទេសចរជាតិ និង អន្តរជាតិ គឺនៅតាមប​ណ្តាញឆ្នេរសមុទ្រ ដ្បិតនៅក្នុងក្រុងមិន​មានរៀបចំកម្ម​វិធីអ្វីមួយពិសេ​សឡើយ។ និយាយពី​បញ្ហាសន្តិសុ​ខវិញ ខេត្តព្រះសីហនុ ក៏មិនខុសគ្នាពីរាជធានីភ្នំពេញ និង សៀមរាបនោះ​ដែរ។ សាលាខេត្តព្រះ​សីហនុ បាន​អះអាងឱ្យដឹងថា នៅរាត្រីនេះ អាជ្ញាធរខេត្ត​នឹងពង្រឹ​ងសន្តិសុខ សណ្តាប់ ដើម្បីកា​រងារសន្តិសុខ និង សុ​វត្ថិភាពជូនភ្ញៀបទេសចរជាតិ និង អន្តរជា​តិដែលទៅលេ​ងកម្សាន្តនៅក្នុងខេត្តព្រះសីហនុ​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI