កម្ពុជា

មេឃុំ-ចៅ​សង្កាត់​អាណត្តិ​ទី​៤ ចាប់​ផ្តើម​ប្រកាស​សុពលភាព​ហើយ​ចាប់​ពី​ថ្ងៃ​ចន្ទ​នេះ

លោកខៀវ សុភ័ក្រអ្នកនាំពាក្យក្រសួងមហាផ្ទៃ
លោកខៀវ សុភ័ក្រអ្នកនាំពាក្យក្រសួងមហាផ្ទៃ

ជាង​មួយ​សប្តាហ៍​បន្ទាប់​ពី​ប្រកាស​លទ្ធផល​បោះ​ឆ្នោត​ក្រុម​ប្រឹក្សា​ឃុំ-សង្កាត់ អាណត្តិ​ទី​៤ ពិធី​ប្រកាស​សុពលភាព ឬ​ក៏​ការ​ផ្ទេរ​ដំណែង​មេឃុំ-ចៅ​សង្កាត់ រួម​ទាំង​ក្រុម​ប្រឹក្សា ត្រូវ​បាន​ប្រារព្ធ​ធ្វើ​ហើយ​ចាប់​ពី​ថ្ងៃ​ទី​៣​កក្កដា​នេះ។ ក្រសួង​មហាផ្ទៃ​បាន​ឲ្យ​ដឹង​ថា ពីធី​ប្រកាស​សុពលភាព​នេះ នឹង​ត្រូវ​ធ្វើ​ឲ្យ​រួច​រាល់​ក្នុង​អំឡុង​ពេល​១៤​ថ្ងៃ​ក្រោយ​ពី​ការ​ប្រកាស​លទ្ធផល​ឆ្នោត។

ផ្សាយពាណិជ្ជកម្ម

«សម្លេង សាំង ស៊ីណា»

តាម​រយៈ​ការ​ប្រកាស​នេះ​បង្ហាញ​ថា​ពិធី​ប្រកាស​សុពលភាព ឬ​ហៅ​សាមញ្ញ​ថា​ពិធី​ផ្ទេរ​តំណែង​ដល់​មេឃុំ​-ចៅ​សង្កាត់​ថ្មី អាណត្តិ​ទី​៤ បាន​ចាប់​ផ្តើម​ធ្វើ​ហើយ។ លោក សាំង ស៊ីណា បេក្ខជន​លំដាប់​ទៅ​១​មក​ពី​គណបក្ស​សង្គ្រោះ​ជាតិ​បាន​ក្លាយ​ជា​ចៅ​សង្កាត់​ស្ទឹង​មាន​ជ័យ​៣ ជាមួយ​នឹង​ការ​ប្តេជ្ញា​ចិត្ត​នៅ​បំពេញ​ការងារ​បំរើ​ប្រជាពលរដ្ឋ​នៅ​មូលដ្ឋាន​នោះ តាម​អ្វី​ដែល​ជា​គោលការណ៍​និង​ពាក្យ​ស្លោក​ដែល​បាន​បន្លឺ​ឡើង​មុន​ការ​បោះ​ឆ្នោត។ នៅ​ថ្ងៃ​នេះ​ដែរ ឃុំ-សង្កាត់​ជា​ច្រើន​ទៀត ក៏​ត្រូវ​បាន​ធ្វើ​ពិធី​ដូច​គ្នា​នេះ ខ្លះ​ពេល​ព្រឹក ខ្លះ​ពេល​ល្ងាច ក្រោម​ការ​ចូល​រួម​ពី​តំណាង​គណបក្ស​នយោបាយ​ដែល​បាន​ជាប់​ឆ្នោត និង​ប្រជាពលរដ្ឋ។

ជាមួយ​គ្នា​នេះ អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ បាន​បញ្ជាក់​ប្រាប់​វិទ្យុ​បារាំង​អន្តរជាតិ RFI ថា ពិធី​ប្រកាស​សុពលភាព​ដល់​មេឃុំ-ចៅ​សង្កាត់​ថ្មី រួម​ទាំង​ជំទប់​ទី​១ ជំទប់​ទី​២ ត្រូវ​ចាប់​ផ្តើម​អនុវត្ត​ពី​ថ្ងៃ​នេះ​ត​ទៅ​សម្រាប់​ឃុំ-សង្កាត់ មួយ​ចំនួន ហើយ​ឃុំ-សង្កាត់​មួយ​ចំនួន​ទៀត នឹង​ត្រូវ​អនុវត្ត​ជា​បន្ត​បន្ទាប់​យោង​ទៅ​តាម​កាល​វិភាគ​និង​ពេល​វេលា​របស់​គណៈអធិបតី។

សូម​បញ្ជាក់​ថា​ ប្រទេស​កម្ពុជា​បាន​រៀប​ចំ​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ-សង្កាត់ អាណត្តិ​ទី​៤​នេះ កាល​ពី​ថ្ងៃ​ទី​៤​ខែ​មិថុនា ហើយ​ប្រកាស​លទ្ធផល​ផ្លូវ​ការ​នៅ​ថ្ងៃ​ទី​២៥​មិថុនា​កន្លង​ទៅ។ គណបក្ស​ដែល​ទទូល​បាន​កៅអី​ជា​មេឃុំ-ចៅ​សង្កាត់ និង​ក្រុម​ប្រឹក្សា មាន​ចំនួន​៧។ ក្នុង​ចំណោម​ឃុំ-សង្កាត់​សរុប​ចំនួន​១៦៤៦ គណបក្ស​ប្រជាជន​កម្ពុជា​ទទួល​បាន​អាសនៈ​ក្រុម​ប្រឹក្សា​សរុប ៦៥០៣​អាសនៈ និង​បាន​ឈ្នះ​ជា​មេឃុំ-ចៅ​សង្កាត់​ចំនួន​១១៥៦។ គណបក្ស​សង្គ្រោះ​ជាតិ​ទទួល​បាន​អាសនៈ​ក្រុម​ប្រឹក្សា​ឃុំ-សង្កាត់​ចំនួន ៥០០៧​និង​ឈ្នះ​ជា​មេឃុំ-ចៅ​សង្កាត់ ៤៨៩៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI