កម្ពុជា

ទិវា​សិទ្ធិ​មនុស្ស​១០​ធ្នូ អាជ្ញាធរ​អនុញ្ញាត​ឲ្យ​ប្រារព្ធ​នៅ​តាម​បណ្តា​ខេត្ត​ខ្លះ តែ​ហាម​ហែ​ក្បួន​នៅ​ភ្នំពេញ

អាជ្ញាធរក្រុងភ្នំពេញ បានហាមមិនឲ្យក្រុមអង្គការសង្គមស៊ីវិល (CHRAC) ជួបជុំគ្នានៅលើទីលានប្រជាធិបតេយ្យ ដើម្បីប្រារព្ធទិវាសិទ្ធិមនុស្សអន្តរជាតិ ១០ធ្នូ ខួប៦៨ឆ្នាំ
អាជ្ញាធរក្រុងភ្នំពេញ បានហាមមិនឲ្យក្រុមអង្គការសង្គមស៊ីវិល (CHRAC) ជួបជុំគ្នានៅលើទីលានប្រជាធិបតេយ្យ ដើម្បីប្រារព្ធទិវាសិទ្ធិមនុស្សអន្តរជាតិ ១០ធ្នូ ខួប៦៨ឆ្នាំ

អាជ្ញាធរ​ក្រុង​ភ្នំពេញ បាន​ហាម​មិន​ឲ្យ​ក្រុម​អង្គការ​សង្គម​ស៊ីវិល (CHRAC) ជួប​ជុំ​គ្នា​នៅ​លើ​ទីលាន​ប្រជាធិបតេយ្យ ដើម្បី​ប្រារព្ធ​ទិវា​សិទ្ធិ​មនុស្ស​អន្តរជាតិ​ ១០​ធ្នូ ខួប​៦៨​ឆ្នាំ នៅ​ថ្ងៃ​ស្អែក​នោះ​ទេ។ មូលហេតុ គឺ​បញ្ហា​សន្តិសុខ និង​សណ្តាប់​ធ្នាប់​នៅ​ក្នុង​ទីក្រុង។ លើស​ពី​នេះ​ អាជ្ញាធរ​ក៏​បាន​ហាម​ដាច់​ខាត ការ​ហែក្បួន​នៅ​តាម​មហា​វិថី​មួយ​ចំនួន​នៅ​ក្នុង​ទីក្រុង​ ខណៈ​នៅ​តាម​បណ្តា​ខេត្ត​មួយ​ចំនួន អាជ្ញាធរ​បាន​អនុញ្ញាត​ឲ្យ​មាន​ការ​ប្រារព្ធ​ទិវា​នេះ។ តែ​ទោះ​យ៉ាង​នេះ​ក្តី គណៈ​កម្មការ​រៀបចំ​ប្រារព្ធ​ទិវា​សិទ្ធិ​មនុស្ស ១០​ធ្នូ បាន​ប្រកាស​ជំហរ​ថា នឹង​បន្ត​ជួប​ជុំ​នៅ​ទីលាន​ប្រជាធិបតេយ្យ​ដដែល។

ផ្សាយពាណិជ្ជកម្ម

នៅ​ក្នុង​សេចក្តី​ប្រកាស​ចុះ​ថ្ងៃ​ទី​ ៦ ធ្នូ ឆ្នាំ​២០១៦ លោក ឃួង ស្រេង អភិបាល​រង​ក្រុង​ភ្នំពេញ​បាន​ព្រមាន​ថា ក្នុង​ករណី​មាន​ការ​ជួបជុំ​ឬ​ដង្ហែ​ក្បួន​នៅ​តាម​ដង​ផ្លូវ​មួយ​ចំនួន ដែល​ធ្វើ​ឲ្យ​ប៉ះ​ពាល់​ដល់​សន្តិសុខ សុវត្ថិភាព សណ្តាប់​ធ្នាប់ និង​របៀប​រៀបរយ​សាធារណៈ​នោះ អ្នក​រៀបចំ​កម្មវិ​ធីនេះ​នឹង​ត្រូវ​ទទួល​ខុស​ត្រូវ​ចំពោះ​មុខ​ច្បាប់។ ប៉ុន្តែ លោក យង់ គិមអេង ប្រធាន​គណៈកម្មការ​រៀបចំ​ប្រារព្ធ​ទិវា​សិទ្ធិ​មនុស្ស​អន្តរជាតិ ១​០ធ្នូ បា​នប្រកាន់​យក​ជំហរ​ថា​នឹង​ប្រារព្ធ​ទិវា​នេះ នៅ​លើ​ទីតាំង​ទី​លាន​ប្រជាធិបតេយ្យ​ដដែល។ ចំណែក​ការ​ហែ​ក្បួន​វិញ គឺ​គេ​រង​ចាំ​មើល​កាលៈទេសៈ​ជាក់​ស្តែង។

តាម​គម្រោង ក្រុម​អង្គការ​សង្គម​ស៊ីវិល​ ដែល​ហៅ​ថា សម្ព័ន្ធ​ភាព​ការពារ​សិទ្ធិ​មនុស្ស​កម្ពុជា (CHRAC) នឹង​ជួប​ជុំ​គ្នា​នៅ​មុខ​រដ្ឋសភា​ជាតិ​នៅ​វេលា​ម៉ោង​ ៦នឹង​៣០​នាទី​ព្រឹក ថ្ងៃ​ទី​១០​ធ្នូ រួច​បន្ត​ហែក្បួន​នៅ​តាម​ផ្លូវ​មួយ​ចំនួន តម្រង់​មក​កាន់​ទីលាន​ប្រជាធិតេយ្យ ដើម្បី​ប្រារព្ធ​ទិវា​សិទ្ធិ​មនុស្ស​អន្តរជាតិ ១០​ធ្នូ​នៅ​ទីនោះ​ពេញ​មួយ​ថ្ងៃ ក្រោម​ប្រធាន​បទ “លើក​កម្ពស់​សិទ្ធិ​សេរីភាព​បញ្ចេញ​មតិ និង​ការ​ប្រជុំ”។ ប៉ុន្តែ​នៅ​ក្នុង​សេចក្តី​សម្រេច​របស់​អាជ្ញាធរ​ក្រុង​ភ្នំពេញ បាន​ណែនាំ​ឲ្យ​ក្រុម​អង្គការ​សង្គម​ស៊ីវិល​ទាំង​នោះ បង្វែ​ទៅ​រៀប​ចំ​ទិវា​នេះ នៅ​ឯទីស្នាក់ការ​របស់​ខ្លួន ឬ​ក៏​ជួល​ទីតាំង​ឯកជន​ណា​មួយ​វិញ។

គួរ​ជម្រាប​ជូនថា ចាប់​ពីថ្ងៃ​ទី​០២​​ធ្នូមក ​​ប្រជាពលរដ្ឋ​រាប់​ពាន់​នាក់បានរៀបចំ​ព្រឹត្តិការណ៍​អបអរ​សាទរ​ខួប​៦៨ឆ្នាំ ទិវា​សិទ្ធិ​មនុស្ស​អន្តរជាតិ ១០ធ្នូ ជា​បន្ត​បន្ទាប់នៅ​លើ​ទីតាំង​ចំនួន​ ៣៥​កន្លែង​ស្ថិត​នៅ​ក្នុង​ខេត្ត​ក្រុង​ចំនួន​ ១៨​នៃ​ប្រទេស​កម្ពុជា មុន​ពេល​ពួក​គេ មក​ជួប​ជុំ​គ្នា​នៅ​ទីលាន​ប្រជាធិបតេយ្យ​ក្នុង​ទីក្រុង​ភ្នំពេញ។ ព្រឹត្តិការណ៍​ដែល​កំពុង​រៀបចំ​នៅ​តាម​បណ្តា​ខេត្ត ​រួម​បញ្ចូល​នូវ​សកម្មភាព​មួយ​ចំនួន ដូចជា​​ វេទិកា​សាធារណៈ​ដើម្បី​ជជែក​ពិភាក្សា​អំពី​បញ្ហា​សិទ្ធិ​មនុស្ស​ក្នុង​ពេល​បច្ចុប្បន្ន​, ការ​ដាក់​ញត្តិ​ជូន​ទៅ​អាជ្ញាធរ​មូលដ្ឋាន​ស្ដីពី​កង្វល់​នៃ​បញ្ហា​សិទ្ធិ​មនុស្ស​នៅ​ក្នុង​មូលដ្ឋាន​និង​នៅ​ថ្នាក់​ជាតិ​, ការ​រៀបចំ​ពិធី​បុណ្យ​បែប​ព្រះ​ពុទ្ធ​សាសនា​ដែល​ភ្ជាប់​ទៅ​នឹង​បញ្ហា​សិទ្ធិមនុស្ស​ និង​ការ​ដង្ហែ​ក្បួន​ឆ្លងកាត់​តាម​ស្រុក/ខណ្ឌ​ និង​ក្រុង​នៅ​តាម​ខេត្ត​មួយ​ចំនួន​។

ក្រៅ​ពី​អង្គការ​សង្គម​ស៊ីវិល​និង​ប្រជាពលរដ្ឋ​កំពុង​ប្រារព្ធ​ទិវា​នេះ គណបក្ស​ប្រឆាំង​នៅ​ក្នុង​ប្រទេស​កម្ពុជា ក៏​បាន​ប្រកាស​ត្រៀម​ប្រារព្ធ​ទិវា​នេះ​នៅ​ទី​ស្នាក់ការ​បក្ស​ដែរ ក្រោម​ប្រធាន​បទ “សិទ្ធិ​ក្នុង​ការ​បោះឆ្នោត”៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI