កម្ពុជាឆ្លើយតបជាវិជ្ជមាន៣ចំណុច លើកឡើងដោយអង្គការសហប្រជាជាតិប្រចាំកម្ពុជា
ចុះផ្សាយនៅថ្ងៃ៖
លោកនាយករដ្ឋមន្ត្រី ហ៊ុន សែន និងមន្ត្រីនៃទីភ្នាក់ងារអង្គការសហប្រជាជាតិប្រចាំនៅកម្ពុជា ដឹកនាំដោយលោកស្រី Poline Tamesis អ្នកសម្របសម្រួលអង្គការសហប្រជាជាតិ នៅព្រឹកថ្ងៃចន្ទនេះ បានជួបប្រជុំគ្នាប្រចាំឆ្នាំលើកទី៥ នៅវិមានសន្តិភាព។ គឺជាកិច្ចប្រជុំ ដែលអង្គការសហប្រជាជាតិ បានលើកឡើងនូវចំណុចចំនួន៣ ដែលពាក់ព័ន្ធនឹងកិច្ចគាំពារសង្គមទិន្នន័យសម្រាប់ការអភិវឌ្ឍដោយចីរភាពនិងការចូលរួមពិនិត្យរបាយការណ៍ថ្នាក់ជាតិលើការអនុវត្តគោលដៅអភិវឌ្ឍន៍ដោយចីរភាព នៅក្នុងទីក្រុងញូយ៉កខាងមុខ។
ដោយសំដែងការអបអរសាទរ ចំពោះការងារដែលបានអនុវត្តក្នុងឆ្នាំកន្លងមក លោកស្រី Poline Tamesis ប្រធានប្រតិភូទីភ្នាក់ងារអង្គការសហប្រជាជាតិប្រចាំកម្ពុជា បានលើកឡើង ពាក់ព័ន្ធនឹងចំណុចទី១ ស្តីពីកិច្ចគាំពារសង្គម ដោយចែកចេញជា៣ចំណុចតូចៗផ្សេងទៀតនោះគឺទី១ ការសម្របសម្រួលរវាងស្ថាប័ន និងហេដ្ឋារចនាសម្ព័ន្ធ ក្នុងការកសាងសមត្ថភាព ទី២ គឺការគាំពារសង្គម និងហិរញ្ញវត្ថុ និងទី៣ ការងារគាំពារសង្គមនិង ការអនុវត្តប្រកបដោយសមភាព។
លោក អ៊ាង សុផល្លែត ជំនួយការផ្ទាល់លោកនាយករដ្ឋមន្ត្រី ហ៊ុន សែន ឲ្យអ្នកកាសែតដឹងថា លោកនាយករដ្ឋមន្ត្រី បានប្រាប់ទៅទីភ្នាក់ងារអង្គការសហប្រជាជាតិដែរថា កម្ពុជាកាលពីដើមឡើយ គឺមានភាពក្រីក្ររហូតដល់១០០% ហើយក៏មានការចាប់ផ្ដើមឡើងនូវការផ្ដល់ការគាំពារសង្គម ទៅដល់ស្ត្រីមានផ្ទៃពោះ ដល់ស្ត្រីដែលធ្វើការនៅតាមរោងចក្រ ស្ត្រីក្រីក្រ ហើយក៏បានធ្វើការមួយចំនួនថែមទៀត រួមទាំងការកាត់បន្ថយតម្លៃអគ្គិសនី ការកសាងហេដ្ឋារចនាសម្ព័ន្ធ ការជីកអណ្តូងទឹក ស្រះទឹកជាដើម។
ពាក់ព័ន្ធនឹងទិន្នន័យសម្រាប់ការអភិវឌ្ឍ ដែលករណីនេះ លោក ហ៊ុន សែន បានអនុញ្ញាតឲ្យក្រសួង៤ ធ្វើការបកស្រាយរួមមានក្រសួងផែនការ ក្រសួងហិរញ្ញវត្ថុ ក្រសួងកិច្ចការនារី និងក្រសួងអប់រំ។ ជុំវិញការស្នើឲ្យបង្កើននូវថវិកាជាតិ និងពង្រឹងសមត្ថភាព សម្រាប់ការងារទិន្នន័យ សម្រាប់ការអភិវឌ្ឍ លោក ហ៊ុន សែន បានធ្វើការបកស្រាយថា កន្លងមករាជរដ្ឋាភិបាលកម្ពុជាបានជំរុញឲ្យមានការផ្ដល់ថវិកាជាតិជាប្រចាំ ហើយឯកភាពនឹងបង្កើនថវិកាថែមទៀត ដល់ការងារទិន្នន័យសម្រាប់ការអភិវឌ្ឍនេះ។
ដោយឡែកពាក់ព័ន្ធនឹងការពង្រឹងសមត្ថភាព លោក ហ៊ុន សែន ក៏បានធ្វើការណែនាំដែរ គឺធ្វើយ៉ាងណា ជំរុញឲ្យមានការសិក្សានៅថ្នាក់ឧត្តមសិក្សា ដោយកន្លងមក លោក ហង់ ជួនណារ៉ុន រដ្ឋមន្ត្រីក្រសួងអប់រំ ក៏បានណែនាំ ទៅដល់សាកលវិទ្យាល័យនានា ដើម្បីជំរុញការអប់រំរហូតដល់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ពាក់ព័ន្ធនឹងកម្មវិធីទិន្នន័យសម្រាប់ការអប់រំពង្រឹងសមត្ថភាពនេះ។
ទាក់ទងទៅនឹងចំណុចទី៣ ស្តីពីគោលដៅអភិវឌ្ឍន៍ដោយចីរភាព ដែលលើកឡើងដោយតំណាងទីភ្នាក់ងារអង្គការសហប្រជាជាតិ លោកនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជាបានត្រៀមខ្លួនចូលរួមប្រជុំនៅខែកក្កដាខាងមុខនេះ នៅទីក្រុងញូយ៉ក។ នេះបើតាមលោក អ៊ាង សុផល្លែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ