កម្ពុជា

លោក​ហ៊ុន សែន​ចាត់​តាំង​លោក​ សៅ សុខា ជា​អ្នកដឹក​នាំ​ការ​បង្ក្រាប​ក្រុម​ឈ្មួញ​រត់​ពន្ធ​ឈើ​ទៅ​ប្រទេស​វៀតណាម

ព្រៃឈើ​នៅក្នុង​តំបន់​សហគមន៍​ជនជាតិ​ដើមភាគ​តិច​ក្នុង​ភូមិ​ពូ​គង់ ​ឃុំស្រែ​ព្រះ​ ស្រុក​កែវសីម៉ា ខេត្ត​មណ្ឌល​គិរី​រង​ការ​កាប់​ផ្លាញ​។
ព្រៃឈើ​នៅក្នុង​តំបន់​សហគមន៍​ជនជាតិ​ដើមភាគ​តិច​ក្នុង​ភូមិ​ពូ​គង់ ​ឃុំស្រែ​ព្រះ​ ស្រុក​កែវសីម៉ា ខេត្ត​មណ្ឌល​គិរី​រង​ការ​កាប់​ផ្លាញ​។ @NGO Forom

លោក​នាយក​រដ្ឋ​មន្ត្រីហ៊ុន សែន បាន​ដាក់​បញ្ជា​ឲ្យ​មាន​ការ​បង្ក្រាប​ក្រុម​ឈ្មួញ​រត់​ពន្ធ​ឈើ​ទៅ​ប្រទេស​វៀតណាម នៅ​ក្នុង​កិច្ច​ប្រជុំ​គណៈ​រដ្ឋមន្ត្រី នៅ​ទីស្តីការ​គណៈ​រដ្ឋមន្ត្រី នៅ​ព្រឹក​ថ្ងៃ​សុក្រ ទី​១៥ មករា​នេះ។ បើ​តាម​ទំព័រ​ហ្វេសប៊ុក​ផ្លូវ​ការ​របស់​លោក​ផៃ ស៊ីផាន អ្នក​នាំ​ពាក្យ​ទីស្តីការ​គណៈ​រដ្ឋមន្ត្រី បាន​បញ្ជាក់​ឲ្យ​ដឹង​ថា លោក​ហ៊ុនសែន​ បាន​ចាត់​តាំង​លោក​សៅ សុខា ឲ្យ​ធ្វើ​ជា​ប្រធាន​ដឹកនាំ​ការ​បង្ក្រាប​នេះ​ផង​ដែរ។

ផ្សាយពាណិជ្ជកម្ម

នៅ​ក្នុង​កិច្ច​ប្រជុំ​គណៈ​រដ្ឋ​មន្ត្រី​នៅ​ព្រឹក​មិញ​នេះ លោក​នាយក​រដ្ឋ​មន្ត្រីហ៊ុន សែន​បាន​ព្រមាន​ធ្ងន់​ៗ ដល់​ចៅហ្វាយ​ខេត្ត​ ចៅហា្វយ​ស្រុក មន្ត្រី​នគរបាល កង​រាជ​អាវុធ​ហត្ថ មន្ត្រី​រដ្ឋបាល​ព្រៃឈើ និង​មន្ត្រី​ពាក់ព័ន្ធ​ដទៃ​ទៀត លើ​បញ្ហា​​ឈ្មួញ​ឈើ ​ដែល​ត្រូវ​បាន​គេ​ស្គាល់​ថា​ជា​លោក​ឧកញ៉ា លឹម ប៊ុនណា ហៅខ្នា និងលោកឧកញ៉ា លឹម សំអុល ដែល​ធ្វើ​ការ​កាប់ ឬ​ដឹក​ឈើ​ទៅ​កាន់​ប្រទេស​វៀតណាម។ នេះ​គឺ​ជា​ការ​លើក​ឡើង​នៅ​ក្នុង​ទំព័រ​ហ្វេស​ប៊ុក​ផ្លូវ​ការ​របស់​លោកផៃ ស៊ីផាន។

លោក​ផៃ ស៊ីផាន បាន​សរសេរ​ឲ្យ​ដឹង​ទៀត​ថា លោក​នាយក​រដ្ឋ​មន្ត្រី​មិន​ត្រឹម​តែ​ព្រមាន​ធ្ងន់​ៗ​នោះ​ទេ ប៉ុន្តែ​ថែម​ទាំង​មាន​វិធាន​ការ​ដក​ហូត​មុខ​តំណែង និង​ចាត់​តាំង​ឲ្យ​លោក​សៅ សុខា មេ​បញ្ជាការ​រង​កង​យោធពលខេមរភូមិន្ទ និង​ជា​មេ​បញ្ជាការ​កង​រាជ​អាវុធ​ហត្ថ​លើ​ផ្ទៃ​ប្រទេស​ធ្វើ​ជា​ប្រធាន​ដឹក​នាំ​ការ​បង្ក្រាប​នេះ ដោយ​រួម​មាន​ទាំង​ការ​ផ្តល់​ឧទ្ធម្ភាកចក្រ​យោធា​ពីរ​គ្រឿង ក្នុង​ការ​អនុវត្ត​នៃ​ការងារ​បង្ក្រាប​នេះ រហូត​ដល់​អនុញ្ញាត​ឲ្យ​មាន​ការ​វាយ​ប្រហារ​ពី​លើ​អាកាស​ប្រឆាំង​ និង​ការ​ដឹក​ជញ្ជូន​ឈើ​ខុស​ច្បាប់​នេះ​ផង​ដែរ។

សូម​បញ្ជាក់​ថា ព្រៃឈើ​កម្ពុជា​ត្រូវ​បាន​គេ​ដឹង​ថា​រង​នូវ​ការ​កាប់​បំផ្លាញ​នៅ​ប៉ុន្មាន​ឆ្នាំ​ចុង​ក្រោយ​នេះ យ៉ាង​អនាធិបតេយ្យ។ ហើយ​បើ​គេ​ធ្វើ​ដំណើរ​ទៅ​កាន់​តំបន់​ភ្នំ​និង​ព្រៃឈើ​នៅ​ក្នុង​ខេត្ត​មណ្ឌល​គិរី រតនៈ​គិរី និង​ស្ទឹងត្រែង​ជា​ដើម​នោះ គេ​នឹង​ឃើញ​មាន​រថយន្ត​ធំ​ៗ ​ចូល​ព្រៃ​កាប់​ឈើ ហើយ​មាន​រថយន្ត​ធំ​ៗ​ជា​ច្រើន​តំរៀប​គ្នា​នៅ​រង់ចាំ​ទទួល​ឈើ​នៅ​តាម​ដងផ្លូវ​ក្នុង​តំបន់​ព្រៃ​នោះ។ សកម្មភាព​ដឹក​ឈើ​នេះ​ក៏​បន្ត​មាន​រហូត​ដល់​ម៉ូតូ​តូច​ៗ​ផងដែរ ដែល​អ្នក​ធ្វើ​ដំណើរ​ឆ្លង​កាត់​ខេត្ត​ទាំង​អស់​នោះ ប្រទះ​ឃើញ​មិន​ដែល​ដាច់​ខាន​ឡើយ។ ព្រៃឈើ​កម្ពុជា​ត្រូវ​បាន​គេ​ដឹង​ថា​នាំ​ចេញ​ទៅ​កាន់​ប្រទេស​ចិន​ច្រើន​ជាង​គេ​បំផុត និង​បន្ទាប់​មក​ទៀត​គឺ​ប្រទេស​វៀតណាម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI