អានតួអត្ថបទ
ទស្សនៈព្រឹត្តិការណ៍ខ្មែរ

ឥទ្ធិពល​​ប្រព័ន្ធ​ផ្សព្វផ្សាយ​​ក្នុង​ការ​ប្រយុទ្ធ​ប្រឆាំង​នឹង​គ្រោះថ្នាក់​ចរាចរណ៍​

សំឡេង ០៥:៥៥
ចរាចរណ៍​ណែនណាន់តាន់តាប់​ដោយគ្មានការគោរពច្បាប់ធ្វើឲ្យ​ស្ទះផ្លូវនៅក្នុងរាជធានី​ភ្នំពេញ
ចរាចរណ៍​ណែនណាន់តាន់តាប់​ដោយគ្មានការគោរពច្បាប់ធ្វើឲ្យ​ស្ទះផ្លូវនៅក្នុងរាជធានី​ភ្នំពេញ RFI/Siv Channa
ដោយ៖ អ៊ឹម រចនា
៣៨ នាទី

ប្រព័ន្ធ​ផ្សព្វផ្សាយ​​កំពុង​តែ​មាន​ឥទ្ធិពល​យ៉ាង​ខ្លាំង នៅ​ក្នុង​ជីវភាព​រស់​នៅ​ប្រចាំ​ថ្ងៃ​របស់​ប្រជាពលរដ្ឋ​កម្ពុជា​។ យ៉ាង​ណា​ក៏​ដោយ ប្រព័ន្ធ​ផ្សព្វផ្សាយ​ ទាំង​កាសែត វិទ្យុ និង​ទូរទស្សន៍ព្រម​ទាំង​គេហទំព័រ​ព័ត៌មាន​ផង ហាក់​ដូច​ជា​មិន​ទាន់​បាន​ប្រើ​ប្រាស់​ឥទ្ធិពល​ដែល​ខ្លួន​មាន​ឲ្យ​បាន​គ្រប់​គ្រាន់ ដើម្បី​រួម​ចំណែក​ប្រយុទ្ធ​ប្រឆាំង​នឹង​បញ្ហា​​គ្រោះ​ថ្នាក់​ចរាចរណ៍​នៅ​កម្ពុជា​នៅ​ឡើយ​​។ ​គ្រោះ​ថ្នាក់​ចរាចរណ៍​ដែល​សព្វ​ថ្ងៃ​នេះ បាន​ក្លាយ​ទៅ​ជា​បញ្ហា​ប្រឈម​ធ្ងន់ធ្ងរ​ ​ដោយ​​បាន​សម្លាប់​មនុស្ស​ខ្មែរ​ច្រើន​ឡើង​ៗ​ជា​រៀង​រាល់​ថ្ងៃ។

ផ្សាយពាណិជ្ជកម្ម

របាយការណ៍​ពី​ក្រុម​ការងារ​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវ​គោក​បាន​បង្ហាញ​ថា មាន​មនុស្ស​ចំនួន​២​ពាន់​​២២៦​នាក់ បាន​ស្លាប់​ដោយ​សារ​គ្រោះ​ថ្នាក់​ចរាចរណ៍​នៅ​ទូទាំង​ប្រទេស​កម្ពុជា ​ក្នុង​ឆ្នាំ​២០១៤​កន្លង​ទៅ​។ ចំនួន​នេះ កើន​ឡើង​ជាង​២០០​នាក់ បើ​ធៀប​ទៅ​នឹង​ឆ្នាំ​២០១៣​ និង​កើន​ឡើង​ជាង​៣០០​នាក់ បើ​ធៀប​ទៅ​នឹង​ឆ្នាំ​២០១២​។ ឆ្នាំ​២០១៣ ដែល​មាន​មនុស្ស​ស្លាប់​ដោយ​សារ​គ្រោះ​ថ្នាក់​​ចរាចរណ៍​ចំនួន​១៩៥០​នាក់ និង​ឆ្នាំ​២០១២ ដែល​មាន​មនុស្ស​ស្លាប់​ចំនួន​១៩០៩​នាក់​។

តាម​រយៈ​ទិន្នន័យ​របស់​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវ​គោក​នេះ គេ​សង្កេត​ឃើញ​ថាចំនួន​មនុស្ស​ស្លាប់​ដោយ​សារ​គ្រោះ​ថ្នាក់​ចរាចរណ៍​មិន​ថយ​ចុះ​ទេ​។ ផ្ទុយ​ទៅ​វិញ វា​មាន​តែ​កើន​ឡើង​ជា​លំដាប់​ ពី​មួយ​ឆ្នាំ​ទៅ​មួយ​ឆ្នាំ​។ ​ក្រៅ​ពី​ចំនួន​កើន​ឡើង លក្ខណៈ​នៃ​ការ​ស្លាប់​នៅ​លើ​ដង​ផ្លូវ ក៏​កាន់​តែ​សាហាវ​ឡើង​ៗ​ផង​ដែរ​។

នៅ​ក្នុង​បរិបទ​យ៉ាង​ដូច្នេះ ប្រព័ន្ធ​ផ្សព្វផ្សាយ​​ជា​ពិសេស​ទូរទស្សន៍​ ហាក់​ដូច​ជា​កំពុង​តែ​សប្បាយរីក​រាយក្នុង​ការ​ផ្សព្វផ្សាយ​ព័ត៌មាន​គ្រោះ​ថ្នាក់​ចរាចរណ៍​ទាំង​នេះ​ខ្លាំង​ណាស់​។ នៅតាម​ប៉ុស្តិ៍​ខ្លះ គ្រាន់​តែ​ព័ត៌មាន​គ្រោះ​ថ្នាក់​ចរាចរណ៍​មួយ ពិធីករ​ធ្វើ​អត្ថាធិប្បាយ​ក្លែម​ចុះ​ក្លែមឡើង​មួយ​ព្រឹក​មិន​ចប់​។ ការ​ផ្សព្វផ្សាយ​ពី​ព័ត៌មាន​គ្រោះ​ថ្នាក់​ចរាចរណ៍​មិន​មាន​អ្វី​ទាស់​ខុស​ទេប៉ុន្តែ​ក្រៅ​ពី​ការ​អត្ថាធិប្បាយ​ទៅ​មក​ដដែល​ៗ​ដើម្បី​តែ​បន្លាច​អ្នក​មើល និង​ចែក​គ្នា​​ហួស​ចិត្តសារព័ត៌មាន​ហាក់​ដូច​ជា​មិនទាន់​​​​ធ្វើ​សកម្មភាព​គ្រប់​គ្រាន់​នៅ​ឡើយទេ ដើម្បី​រួម​ចំណែក​ប្រយុទ្ធ​ប្រឆាំង​នឹង​គ្រោះ​ថ្នាក់​ចរាចរណ៍​នៅ​កម្ពុជា ដែល​កាន់​តែ​ធ្ងន់ធ្ងរ​ឡើង​ដូច​សព្វ​ថ្ងៃ​នេះ​។

មែន​ទែន​ទៅ បើ​និយាយ​ដល់​គ្រោះ​ថ្នាក់​ចរាចរណ៍ គេ​មិន​អាច​មិន​និយាយ​បាន​ទេ អំពី​ការ​បើក​បរ​ក្នុង​ពេល​ស្រវឹង​។ នៅ​ក្នុង​ការងារ​នេះ សារ​ក្រើន​រំលឹក​មួយ​ចំនួន ត្រូវ​បាន​ផ្សព្វផ្សាយ​តាម​​វិទ្យុ និង​​ទូរទស្សន៍​ជា​ហូហែរ​។ សារ​ក្រើន​រំលឹក​ដែល​គេ​ឃើញ​ញឹក​ញាប់​រួម​មាន ពេល​ស្រវឹង​កុំបើក​បរ ការពារ​ជីវិត​អ្នក​ពាក់​មួយក​សុវត្ថិភាព​ឲ្យ​បាន​ត្រឹម​ត្រូវ និង​ថ្ងៃ​នេះ​ថ្ងៃ​ស្អែក​កុំ​ឲ្យ​មាន​គ្រោះ​ថ្នាក់​ចរាចរាណ៍​ជា​ដើម​។

ជា​ការ​ពិត សារ​ខ្លី​ៗ​ទាំង​នេះ គឺ​ពិត​ជា​អាច​ពញ្ញាក់​ស្មារតី​របស់​ពលរដ្ឋ​ទូទៅ​បាន​​។ ប៉ុន្តែ​សួរ​ថា​តើ​វា​អាច​ដាស់​ស្មារតី​ប្រុង​ប្រយ័ត្ន​បាន​កម្រិត​ណា នៅ​ពេល​ដែល​ការ​ផ្សព្វផ្សាយ​ពី​ស្រា​បៀរ​មាន​នៅ​គ្រប់​ពេល​វេលា និង​គ្រប់​ទី​កន្លែង​ដូច​សព្វ​ថ្ងៃ​នេះ​? ទន្ទឹម​នឹង​ការ​ទទួល​បាន​ប្រាក់​ចំណូល​ពី​ការ​ផ្សាយ​ពាណិជ្ជកម្ម​ស្រាបៀរ សួរ​ថា​តើ​ប្រព័ន្ធ​ផ្សព្វផ្សាយ​បាន​ប្រើ​ប្រាស់​ឥទ្ធិពល​របស់​ខ្លួន​គ្រប់​គ្រាន់​ហើយ​ឬ​នៅ ដើម្បី​លើក​កម្ពស់​ការ​យល់​ដឹង​ជា​សារធារណៈ​អំពី​សុវត្ថិភាព​នៅ​តាម​ផ្លូវ​ថ្នល់​?

ជា​ការ​ពិត មុន​នឹង​សួរ​ថា​តើ​ប្រព័ន្ធ​ផ្សព្វផ្សាយ​អាច​ធ្វើ​អ្វី​បាន​ខ្លះ ដើម្បី​ប្រយុទ្ធ​ប្រឆាំង​នឹង​គ្រោះ​ថ្នាក់​ចរាចរណ៍ ជា​ដំបូង ប្រព័ន្ធ​ផ្សព្វផ្សាយ​ព័ត៌មាន​ត្រូវ​តែ​ទទួល​ស្គាល់​នូវ​ការ​ពិត​មួយ​ចំនួន​ជា​មុន​សិន​។ ប្រព័ន្ធ​ផ្សព្វផ្សាយ​ត្រូវ​ទទួល​ស្គាល់​ពី​ឥទ្ធិពល​របស់​ខ្លួន​នៅ​ក្នុង​សង្គម គឺ​ត្រូវ​តែ​ទទួល​ស្គាល់​ថា រាល់​ការ​ផ្សព្វផ្សាយ​របស់​ខ្លួន តិច​ឬ​ច្រើន គឺ​ជះ​ឥទ្ធិពល​ទៅ​លើ​​ការ​សម្រេច​ចិត្ត​របស់​អ្នក​ស្ដាប់​និង​អ្នក​ទស្សនា​នៅ​ក្នុង​ជីវភាព​រស់​នៅ​ប្រចាំ​ថ្ងៃ​​​។ ហើយ​ប្រព័ន្ធ​ផ្សព្វផ្សាយ​​​ដដែល​នេះ ត្រូវ​តែ​ជឿជាក់​ថា ខ្លួន​អាច​ធ្វើ​ឲ្យ​មាន​ការ​ផ្លាស់​ប្ដូរ​ជា​វិជ្ជមាន​មួយ នៅ​ក្នុង​សង្គម​ផង​ដែរ​។

បន្ទាប់​ពី​ទទួល​ស្គាល់​និង​ជឿ​ជាក់​ដូច្នេះ​ហើយ ប្រព័ន្ធ​ផ្សព្វផ្សាយ​នឹង​អាច​ផ្លាស់​ប្ដូរ​ខ្លួន​ឯង ដើម្បីឈាន​ទៅ​ផ្លាស់​ប្ដូរ​សង្គម​បាន​។ ជា​ឧទាហរណ៍​៖ ជា​ជាង​ធ្វើ​អត្ថាធិប្បាយ​ថែម​ល្បោយ​​ពីព័ត៌មាន​ឡាន​ទំនើប​បើក​បុក​ម៉ូតូ​ដែល​ជិះ​បញ្ច្រាស់​ផ្លូវ  ប្រព័ន្ធ​ផ្សព្វផ្សាយ​គួរ​តែ​បញ្ជ្រាប​ការ​យល់​ដឹង​ផង​ដែរ​ថា ការ​ជិះ​បញ្ច្រាស់​ផ្លូវ គឺ​ខុស​ច្បាប់​ចរាចរណ៍ ហើយ​ប្រជាពលរដ្ឋ​គួរ​តែ​ចៀសវាង​ទង្វើ​ខុស​ឆ្គង​យ៉ាង​ដូច្នេះ​។

ជា​ជាង​ផ្សព្វផ្សាយ​ព័ត៌មានភ័យ​រន្ធត់​​ដដែល​ៗ​ថា កុងទីន័រ​ចុះ​ពីលើ​ស្ពាន​ដាច់​ហ្វ្រាំង​បុក​រះ​រថយន្ត​ម៉ូតូ​បួន​ដប់​គ្រឿង ប្រព័ន្ធ​ផ្សព្វផ្សាយ​គួរ​តែ​សួរ​នាំ​ទៅ​កាន់​ស្ថាប័ន​ពាក់ព័ន្ធ ពី​វិធានការ​ដែល​​​បាន​ធ្វើ​ឬ​នឹង​ធ្វើដើម្បី​ចៀសវាងគ្រោះថ្នាក់យ៉ាងដូច្នេះ​។ ស្ថាប័ន​ពាក់ព័ន្ធ បើ​ទោះ​ជា​មិន​ទាន់​មាន​វិធាការ​ណា​មួយ​ច្បាស់​លាស់​ក៏​ដោយ ចង់​មិន​ចង់​ក៏ត្រូវ​ធ្វើ​សកម្មភាព​អ្វី​មួយ​ដែរ នៅ​ចំពោះ​មុខ​សំណួរ​របស់​អ្នក​កាសែត​។

និយាយ​ពី​សារ​ក្រើន​រំលឹក ដែល​គេ​ឧស្សាហ៍​ប្រទះ​ឃើញ​នៅ​តាម​ប្រព័ន្ធ​ផ្សព្វផ្សាយ​ខ្មែរ​។ សារ​ខ្លី​ៗ​អស់​ទាំង​នេះ ថ្វី​ត្បិត​តែ​អាច​ពញ្ញាក់​ស្មារតី​អ្នក​ស្ដាប់​និង​ទស្សនា​បាន​ខ្លះ ប៉ុន្តែ​វា​មិន​ទាន់​គ្រប់​គ្រាន់​ទេ ហើយ​សារ​ទាំង​នេះ ក៏​មិន​អាច​កាត់​បន្ថយ​គ្រោះ​ថ្នាក់​ចរាចរណ៍​ប្រកប​ដោយ​ប្រសិទ្ធភាព​ដែរ​។ ជាក់​ស្ដែង សារ​ស្ដី​ពី​ការ​ពាក់​មួក​សុវត្ថិភាព​។

ការ​បើក​បរ​ពាក់​មួក​សុវត្ថិភាព មិន​មែន​មាន​សុវត្ថិភាព​ទាំង​ស្រុង​ទេ ប្រសិន​ខ្វះ​ការ​គោរព​ច្បាប់​ចរាចរណ៍​។ ដូច​គ្នា​ដែរ​តើ​សារ​ដាស់​តឿន​កុំ​ឲ្យ​បើកបរ​ពេល​ស្រវឹង​ប៉ុន្មាន​វិនាទី​មាន​ប្រសិទ្ធ​ភាព​​កម្រិត​ណា ខណៈ​ដែល​ស្ប៉ត​ផ្សព្វផ្សាយ​ពី​ស្រា​បៀរ​គិត​នាទី​​មាន​នៅ​សឹង​តែ​គ្រប់​ប៉ុស្តិ៍​យ៉ាងដូច្នេះ​?

ជា​ថ្មី​ម្ដង​ទៀត សារ​ខ្លី​ៗ​អំពី​ចរាចរណ៍​ដែល​ត្រូវ​បាន​ផ្សព្វផ្សាយ​សព្វ​ថ្ងៃ​នេះ នៅ​មិន​ទាន់​គ្រប់​គ្រាន់​ទេ​។ បន្ថែម​ពី​លើ​សារ​អប់រំ​ទាំង​នេះ ប្រព័ន្ធ​ផ្សព្វផ្សាយ​គួរ​តែ​បង្កើន​​ការ​ផ្សព្វផ្សាយ​ពី​ច្បាប់​ចរាចរណ៍​។ ច្បាប់​ចរាចរណ៍ គឺ​បង្កើត​ឡើង​ដើម្បី​ផ្ដល់​សុវត្ថិភាព​។ ដូច្នេះ នៅ​ពេល​ពលរដ្ឋ​គោរព​ច្បាប់​ចរាចរណ៍​ទាំង​អស់​គ្នា ​សុវត្ថិភាព​លើ​ដង​ផ្លូវ​នឹង​កើត​ឡើង​យ៉ាង​ពិត​ប្រាកដ​​​។

សរុប​មក​វិញ ប្រព័ន្ធ​ផ្សព្វផ្សាយ​មាន​ឥទ្ធិពល និង​អាច​រួម​ចំណែក​ដើម្បី​ផល​​ប្រយោជន៍​​​សង្គម ច្រើន​ជាង​អ្វី​ដែល​កំពុង​ធ្វើ​សព្វ​ថ្ងៃ ដោយ​មិន​ខាត​បង់​ប្រាក់​ចំណូល​របស់​ខ្លួន​ទៀត​ផង​។ ការ​ចូល​រួម​របស់​ប្រព័ន្ធ​ផ្សព្វផ្សាយ​តាម​រយៈ​កម្មវិធី​យល់​ដឹង​ពី​ច្បាប់​ចរាចរណ៍ សំខាន់​ខ្លាំង​ណាស់​ នៅ​ក្នុង​​ការ​ប្រយុទ្ធ​ប្រឆាំង​នឹង​គ្រោះ​ថ្នាក់​ចរាចរណ៍​​។

ទន្ទឹម​គ្នា​នេះ ស្ថាប័ន​ពាក់ព័ន្ធ​ក៏​មិន​ត្រូវ​ព្រងើយ​កន្តើយ​នឹង​ការ​អនុវត្ត​ច្បាប់​ចរាចរណ៍​ផង​ដែរ ព្រោះ​ថា ប្រសិន​បើ​គ្មាន​ការ​អនុវត្ត​ទេ សុវត្ថិភាព​ចរាចរណ៍​ក៏​គ្មាន​ដែរ បើ​ទោះ​បី​ជា​កម្ពុជា​មាន​ច្បាប់​ចរាចរណ៍​ផ្លូវ​គោក​ថ្មី​ដែល​ល្អ​ប្រសើរ​ជាង​មុន​យ៉ាង​ណា​ក៏​ដោយ។ ចំណែក​ប្រជាពលរដ្ឋ​ទូទៅ ក៏ត្រូវ​បង្កើន​ស្មារតី​គោរព​ច្បាប់​ចរាចរណ៍​របស់​ខ្លួន​ផង​ដែរ​ ព្រោះ​បញ្ហា​គ្រោះ​ថ្នាក់​ចរាចរណ៍​នេះ ជា​បញ្ហា​ប្រឈម​របស់​មនុស្ស​គ្រប់​គ្នា មិន​មែន​របស់​នរណា​ម្នាក់​ដោយ​ចំពោះ​នោះ​ឡើយ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ