កម្ពុជា

អង្គការសង្គមស៊ីវិលជាង១០០ ទទូច​ឲ្យស៊ើបអង្កេត​ឃាតកម្ម កែម ឡី ឡើងវិញ​ ដោយ​មាន​អ្នក​ជំនាញ​អន្តរជាតិ​ចូលរួម​

លោក​ កែម ឡី
លោក​ កែម ឡី @HEAM Chetra

បាំងតែ១​ថ្ងៃទៀតទេ គឺ​ជាថ្ងៃ​គម្រប់​ខួប​១ឆ្នាំ នៃ​អំពើ​ឃាតកម្ម​លើ​បណ្ឌិត កែម ឡី អ្នក​វិភាគ​នយោបាយ​និង​សង្គម​ខ្មែរ។ នៅថ្ងៃនេះ ក្រុម​សមាគមនិង​អង្គការសង្គមស៊ីវិល ចំនួន​ជាង​១០០ស្ថាប័ន បាន​មូរ​មាត់​គ្នា​ថា​ ការ​ស៊ើបអង្កេត​ចំពោះ​ការ​បាញ់​សម្លាប់លោក កែម ឡី គឺគ្មាន​តម្លាភាព និង​មាន​មន្ទិល​សង្ស័យ​ច្រើន​។ ពួក​គេ​ទាំងនោះ ស្នើ​ឲ្យ​បើក​ការ​ស៊ើប​អង្កេត​ ​ឯករាជ្យជាថ្មីម្តងទៀត​។

ផ្សាយពាណិជ្ជកម្ម

ក្រៅពី​ចាត់ទុកថា ដំណើរ​ការ​ស៊ើប​អង្កេត និង​ការ​ស្រាវជ្រាវរាវរកមុខ​ឃាតករ​​របស់ប្រព័ន្ធ​តុលាការ​ខ្មែរ​ ក្នុងករណី​បាញ់​សម្លាប់​បណ្ឌិត កែម ឡី ថា​គ្មាន​តម្លាភាព, ក្រុមសង្គមស៊ីវិល និង​​សមាគម ជាង​១០០អង្គការ ថែមទាំង​​ទទូច​ចង់​ឲ្យ​មាន​ការ​ស៊ើប​អង្កេត​ជាថ្មី ដែល​មាន​ការ​ចូលរួម​ពី​សំណាក់​អ្នក​ជំនាញ​អន្តរជាតិ​។

ការទទូច​ស្នើ​សុំ​ដូច្នេះ គឺ​ដោយសារតែ​ពួក​គេ​យល់ឃើញថា សំណុំ​រឿង​បាញ់​សម្លាប់​បណ្ឌិត​ម្នាក់​​កណ្តាល​ទីក្រុង​ភ្នំពេញ​មួយនេះ គឺ​កំពុង​តែ​មាន​លក្ខណៈ​ស្ងៀម​ស្ងាត់។ ស្ងៀម​ស្ងាត់​ក៏ព្រោះថា គេ​នៅ​តែ​ពុំ​ទាន់​អាច​វែក​មុខ​រកឃើញ​អ្នក​សម​គំនិត​ជាប់​ពាក់ព័ន្ធ ហើយ​សាលា​ជម្រះក្តី​ ​បា​នត្រឹម​តែ​ផ្តន្ទាទោស​ជន​សង្ស័យ​តែម្នាក់គត់។ ការ​សម្រេច​កាត់ទោស​ជន​​សង្ស័យ​តែម្នាក់​នេះទៀត គឺគ្មាន​ការ​ជជីក​សួរ​ដេញ​ដោល​ ហើយ​ក៏​គ្មាន​ការ​ស៊ើប​អង្កេតឲ្យ​បាន​ស៊ី​ជម្រៅ​អ្វី​នោះដែរ។ នេះ​បើ​តាម​សេចក្តីថ្លែងការ​ណ៍​រួម​ ដែល​មាន​រាយ​ឈ្មោះ​អង្គការ​សមាគម​ ចំនួន​១០៧ស្ថាប័ន​​។​

​តាម​មតិ​យោបល់​របស់ក្រុម​សមាគម​អង្គការ​ទាំងនេះ, បើទោះបី​បាន​កាត់​ទោសមនុស្ស​ម្នាក់​ហើយក្តី ប៉ុន្តែ​យុត្តិធម៌​សម្រាប់​មរណភាព​របស់​បញ្ញវ័ន្ត​ កែម ឡី គឺនៅ​មិនទាន់​​មាន​​ នៅឡើយ​ទេ។​ ដូច្នេះចំពោះករណី​ឃាតកម្ម​មួយ​នេះ​ បើ​អំពើ​និទ្ទណ្ឌភាព​នៅតែ​បន្ត​មាន​ ហើយ​ជន​​ពាក់ព័ន្ធសមគំនិត​នៅតែ​បន្ត​មាន​សេរីភាព នោះ​ប្រជាពលរដ្ឋ​ខ្មែរ ច្បាស់​ជា​បាត់​បង់​ទំនុក​ចិត្ត​ទៅលើ​ប្រព័ន្ធ​យុត្តិធម៌​នៅ​កម្ពុជា​ ជាក់​ជាពុំ​ខាន។​ នេះ​បើ​តាម​សេចក្តីថ្លែងការ​ណ៍​ដដែល។​

គួរ​រម្លឹក​ជូនថា កាលពីឆ្នាំមុន​ ពេល​កំពុង​ផឹក​កាហ្វេ បណ្ឌិត កែម ឡី​ ត្រូវ​ខ្មាន់​កាំភ្លើង​លួច​បាញ់​សម្លាប់ ចំនួន​២គ្រាប់ ១គ្រាប់​ចំ​ក្បាល និង​១​គ្រាប់​ទៀត ​ចំ​ដើមដៃ​ធ្លាយ​ទៅ​ដល់​ក្រោម​ដោះ។​ ឃាតកម្ម​នេះ កើតនៅក្នុងហាងលក់ទំនិញ នៃ​ស្ថានីយ​ប្រេង​សាំង កាលតិច ជាប់​ស្តុប​បូក​គោ ​នៅវេលា​​ម៉ោង​ប្រហែល​៨និង​៤០ព្រឹក។

រំលង​បាន​មួយ​ឆ្នាំ​ទៅហើយ​ មាន​ឃាតករ​តែម្នាក់​គត់ គឺឈ្មោះ ជួប សម្លាប់ ដែលបា​នសារភាព​និង​ដែលត្រូវ​តុលាការ​​ សម្រេច​កាត់ទោស​​ឲ្យ​ជាប់​គុ​ក​អស់​មួយ​ជីវិត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI