រដ្ឋាភិបាលអះអាងពីការយកចិត្តទុកដាក់ខ្ពស់ ខណៈនិស្សិតខ្មែរនៅWuhan ចាំឱកាសវិលមកស្រុកវិញ
ចុះផ្សាយនៅថ្ងៃ៖
ក្រសួងការបរទេសកម្ពុជា បានអះអាងថា រដ្ឋាភិបាលកម្ពុជាបានយកចិត្តទុកដាក់ខ្ពស់បំផុតចំពោះវិវត្តន៍នៃការរាលដាលមេរោគកូរ៉ូណា ហើយថាតំណាងស្ថានទូតបានទាក់ទងយ៉ាងជិតស្និទ្ធជាមួយអាជ្ញាធរចិនដើម្បីតាមដានសុខភាពរបស់ពលរដ្ឋខ្មែរជាពិសេសនិស្សិតខ្មែរ ដែលកំពុងជាប់នៅទីក្រុងWuhan។ សម្រាប់និស្សិតខ្មែរ ដែលកំពុងជាប់ផុងនៅទីក្រុងWuhan នៅតែរង់ចាំឱកាសវិលត្រឡប់មកកម្ពុជា នៅគ្រាដែលមិត្តរួមថ្នាក់ពីបណ្តាប្រទេសផ្សេងៗបានចាកចោលស្ទើរអស់ទៅហើយ។
តាមរយៈសេចក្តីប្រកាសព័ត៌មាននៅថ្ងៃទី៣ខែកុម្ភៈ ក្រសួងការបរទេសកម្ពុជា បានអះអាងថា ពុំមានករណីឆ្លងមេរោគកូរ៉ូណាមកលើពលរដ្ឋខ្មែរទេ។ សាកលវិទ្យាល័យចិនបានឧបត្ថម្ភស្បៀង និងសំភារៈចាំបាច់នានាដល់និស្សិត ហើយប្រាប់ឲ្យអនុវត្តវិធានការបង្កា និងទប់ស្កាត់ការឆ្លងមេរោគនេះផងដែរ។ យ៉ាងណាក៏ដោយ សម្រាប់និស្សិតខ្មែរ ដែលកំពុងជាប់ផុងនៅទីក្រុងWuhan នៅតែទន្ទឹងរង់ចាំឱកាសវិលត្រឡប់មកកម្ពុជាវិញនៅពេលឆាប់ៗ នៅគ្រាដែលមិត្តរួមថ្នាក់ពីបណ្តាប្រទេសផ្សេងៗបានចាកចោលស្ទើរអស់ទៅហើយ។ រដ្ឋាភិបាលភូមា និងអាជ្ញាធរប្រទេសជាច្រើនទៀតសុទ្ធតែបានប្រើយន្តហោះទៅដឹកនិស្សិត និងពលរដ្ឋរបស់គេចេញពីទីក្រុងWuhan ជាទីដែលមានការផ្ទុះរាលដាលវីរុសកូរ៉ូណា។
លោក ប៉ែន បារាំង ជានិស្សិតថ្នាក់អនុបណ្ឌិត ដែលស្ថិតក្នុងទីក្រុងWuhan បានបង្ហាញអារម្មណ៍របស់លោកនៅតាមហ្វេសប៊ុកថា និស្សិតខ្មែរ ដែលជាប់នៅទីក្រុងផ្ទុះមេរោគកូរ៉ូណានេះ ពិតជាចង់វិលមកខ្មែរវិញកាន់តែឆាប់។ ទោះជាយ៉ាងណានិស្សិតខ្មែររូបនេះ ក៏មិនហ៊ានជំទាស់នឹងការសម្រេចចិត្តរបស់ប្រមុខរដ្ឋាភិបាលកម្ពុជាទេ ដែលមិនឲ្យពលរដ្ឋខ្មែររត់ចោលប្រទេសចិននៅគ្រាអាសន្ននេះ។
នៅពេលជួបពលរដ្ឋខ្មែរនៅកូរ៉េខាងត្បូងនៅថ្ងៃទី៣កុម្ភៈ លោក ហ៊ុន សែន បានអះអាងថាលោកនឹងទៅសួរសុខទុក្ខពលរដ្ឋខ្មែរនៅទីក្រុងWuhan ប្រសិនបើរដ្ឋាភិបាលចិនអនុញ្ញាត។ ស្ថានទូតចិនប្រចាំ កម្ពុជាបានអះអាងថា បច្ចុប្បន្ននេះមាននិស្សិតកម្ពុជាចំនួន២៣រូបដែលកំពុងតែត្រូវបានជាប់ផុងក្នុងទីក្រុងWuhan។ ពួកគេមានសុខភាពល្អនិងសុវត្ថិភាព ហើយរដ្ឋាភិបាលចិនបានផ្ដល់ការមើលថែយ៉ាងយកចិត្តទុកដាក់បំផុត សូមសមាជិកគ្រួសារមានការព្រួយបារម្ភ។
សូមជម្រាបថា ប្រមុខរដ្ឋាភិបាលកម្ពុជាបានប្រកាសហើយថា មិនឲ្យនិស្សិតខ្មែររត់ចោលប្រទេសចិននៅគ្រាអាសន្ននេះទេ ហើយប្រទេសចិនបានប្រកាសថាកម្ពុជាគឺជាមិត្តដែកថែមយ៉ាងពិតប្រាកដរបស់ខ្លួន ខណៈប្រទេសជាង៧០លើពិភពលោកបានបិទជើងហោះហើរ និងហាមអ្នកធ្វើដំណើរចេញចូលប្រទេសពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ