កម្ពុជា-ដីធ្លី

ពលរដ្ឋ​បុរី​កីឡា​១១​គ្រួសារ​គ្រោង​ស្នើ​ទៅ លោក​ជា សុផារ៉ា ជួយ​រក​ដំណោះ​ស្រាយ​បញ្ចប់

​លោក ជា សុផារ៉ា​ រដ្ឋមន្រ្តី​ក្រសួង​ដែនដី
​លោក ជា សុផារ៉ា​ រដ្ឋមន្រ្តី​ក្រសួង​ដែនដី @facebook/chea sophara
ដោយ៖ អេង គីមហុង
១៥ នាទី

ពលរដ្ឋ​បុរី​កីឡា​១១​គ្រួសារ នឹង​ងាក​ទៅ​រក​ដំណោះ​ស្រាយ​ពី​រដ្ឋមន្រ្តី​ក្រសួង​ដែនដី​លោក ជា សុផារ៉ា វិញ​ប្រសិន​បើ​មិន​មាន​ដំណោះ​ស្រាយ​ណា​មួយ​ជាមួយ​សាលា​ក្រុង​ដើម្បី​បញ្ចប់​វិវាទ​ដី​ធ្លី​ដ៏​រ៉ាំ​រ៉ៃ។ ការ​អះអាង​នេះ​គឺ​ធ្វើ​ឡើង​ខណៈ​ដែល​ពលរដ្ឋ​បុរី​កីឡា​ដែល​នៅ​សេស​សល់ ត្រៀម​ចូល​ខ្លួន​ទៅ​ដោះ​ស្រាយ​ជាមួយ​សាលា​រាជធានី​ភ្នំពេញ​ជា​លើក​ចុង​ក្រោយ​នា​ថ្ងៃ​ពុធ​ស្អែក។

ផ្សាយពាណិជ្ជកម្ម

គំរូ​នៃ​ដំណោះ​ស្រាយ​ដ៏​ល្អ​ចំពោះ​ពលរដ្ឋ​រស់​នៅ​ប៊ូឌីញ​គឺ​ជា​ផ្នែក​មួយ​ជម្រុញ​ដល់​ពលរដ្ឋ​១១​គ្រួសារ​រស់​នៅ​បុរី​កីឡា​ចង់​ងាក​ទៅ​រក​ដំណោះ​ស្រាយ​ពី​រដ្ឋមន្រ្តី​ក្រសួង​ដែនដី​លោក ជា សុផារ៉ា​វិញ។ នេះ​បើ​តាម​ការ​អះ​អាង​របស់​អ្នក​ស្រី ស ស៊ន តំណាង​ពលរដ្ឋ​រស់​នៅ​បុរី​កីឡា​១១​គ្រួសារ ចុង​ក្រោយ។ ក៏​ប៉ុន្តែ​បើ​តាម​អ្នក​ស្រី ស ស៊ន មុន​នឹង​គាត់​គ្រោង​ស្នើ​ទៅ​ លោក​ជា សុផារ៉ា ជួយ​រក​ដំណោះ​ស្រាយ​នៅ​សេស​សល់ ពួក​គាត់​នឹង​ចូល​ខ្លួន​ដោះ​ស្រាយ​បន្ត​ជាមួយ​សាលា​រាជធានី​ភ្នំពេញ​នៅ​លើក​ចុង​ក្រោយ​សិន។

សូម​បញ្ជាក់​ថា ការ​ចូល​ខ្លួន​ដោះ​ស្រាយ របស់​ពលរដ្ឋ​បុរី​កីឡា​១១​គ្រួសារ នៅ​ថ្ងៃ​ពុធ​ទី​២៧​ធ្នូ​ជាមួយ​សាលា​រាជធានី​ភ្នំពេញ​ ធ្វើ​ឡើង​ក្រោយ​ពួក​គាត់ រង​ការ​ព្រមាន​ប្ដឹង​ពី​អភិបាល​ខណ្ឌ​៧​មករា ក្នុង​ករណី​មិន​ព្រម​ទទួល​យក​សំណង​ទៅ​តាម​ការ​កំណត់​របស់​អាជ្ញាធរ​នៅ​ក្នុង​ជំនួប​មួយ​កាល​ពី​ថ្ងៃ​ទី​២៥​ធ្នូ។ អាជ្ញាធរ​ដែល​កំណត់​ឲ្យ​៧​គ្រួសារ​ក្នុង​ចំណោម​១១​គ្រួសារ​ត្រឡប់​ទៅ​រស់​នៅ​តំបន់​អណ្ដូង​ជាយ​ក្រុង​ដោយ​មាន​ផ្ទះ​មួយ​ខ្នង​ជាមួយ​នឹង​ថវិកា​៤​ពាន់​ដុល្លារ។ ​រីឯ​៣​គ្រួសារ​ទៀត ទទួល​យក​ដំណោះ​ស្រាយ​អភិវឌ្ឍន៍​នៅ​នឹង​កន្លែង។

ប៉ុន្តែ​យ៉ាង​ណា​ក៏​ដោយ​ដំណោះ​ស្រាយ​នេះ ត្រូវ​បាន​អ្នក​បុរី​កីឡា​រិះគន់​ថា ជា​ការ​ដោះ​ស្រាយ​ដដែលៗ ដោយ​បន្ត​បញ្ជូន​ពួក​គាត់​ត្រឡប់​ទៅ​រស់​នៅ​ភូមិ​អណ្ដូង​វិញ ដែល​ផ្ទុយ​ពី​ការ​ចង់​បាន​របស់​ពួក​គាត់​១១​គ្រួសារ​ដែល​ស្នើ​ឲ្យ​មាន​ការ​អភិវឌ្ឍ​នៅ​នឹង​កន្លែង។ បើ​តាម​អ្នក​ស្រី ស ស៊ន តំណាងពលរដ្ឋ​១១​គ្រួសារ បាន​អះ​អាង​ប្រាប់​វិទ្យុ​បារាំង​ថា កាល​ដែល​ពួក​គាត់​មិន​ចង់​ចាក​ចេញ​ពី​បុរី​កីឡា​ព្រោះ​បុរី​កីឡា​ជា​កន្លែង​ដែល​គាត់​ងាយ​ស្រួល​រក​ស៊ី។ ទោះ​ជា​រង​ការ​ព្រមាន​ប្ដឹង​បែប​ណា​ក៏​ដោយ​អ្នក​ស្រី ស ស៊ន នៅ​តែ​អះអាង​ថា មិន​ចាក​ចេញ​នោះ​ទេ​ហើយ​មិន​ខ្លាច​ការ​ប្ដឹង​ផ្តល់​ដែរ​ព្រោះ​យល់​ថា ការ​ប្ដឹង​ផ្តល់​មិន​មែន​ជា​រឿង​ថ្មី​ថ្មោង​សម្រាប់​ពួក​គាត់​នោះ​ទេ។

ចំណែក លោក ម៉េត មាសភក្ដី អ្នក​នាំ​ពាក្យ​សាលា​រាជធានី​ភ្នំពេញ​អះអាង​ថា ដំណោះ​ស្រាយ​ជាមួយ​ប្រជាពលរដ្ឋ​រស់​នៅ​តំបន់​បុរី​កីឡា​គឺ​បាន​អនុវត្ត​គ្រប់​គ្រាន់​ហើយ ហើយ​ក៏​មាន​ការ​ចូល​រួម​ដោះ​ស្រាយ​ពី​ក្រុម​អង្គការ​សង្គម​ស៊ីវិល​ដែរ។ ​ដោយ​ក្នុង​នោះ​មាន​គ្រួសារ​ជា​ច្រើន​យល់​ព្រម​ទទួល​យក​ដំណោះ​ស្រាយ។ ចំពោះ​ពលរដ្ឋ​នៅ​សេស​សល់​១១​គ្រួសារ​នេះ សាលា​រាជធានី​នឹង​បន្ត​ដោះ​ស្រាយ​ដោយ​យក​ចិត្ត​ទុក​ដាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI