កម្ពុជា

ការ​ពិនិត្យ​ផែនទី​ពី​បារាំង៖ រដ្ឋាភិបាល​ថា​គួរ​តែ​ចប់​ហើយ ប៉ុន្តែ​បក្ស​ប្រឆាំង​ថា​រង​ចាំ​លទ្ធផល​ពិនិត្យ​សិន

រូបភាព​ផែនទី​ដែល​ត្រូវ​បាន​ប្រគល់​ដោយ​អង្គការ​សហប្រជាជាតិ ​កាល​ពី​ពេល​ថ្មី​ៗ​នេះ។​
រូបភាព​ផែនទី​ដែល​ត្រូវ​បាន​ប្រគល់​ដោយ​អង្គការ​សហប្រជាជាតិ ​កាល​ពី​ពេល​ថ្មី​ៗ​នេះ។​ RFI/ Siv Channa
ដោយ៖ ស៊ុន មេសា
១៤ នាទី

នៅ​ថ្ងៃ​ទី៣ កញ្ញា​ស្អែក​នេះ ស្ថាន​ទូត​បារាំង នឹង​យក​ផែនទី​កម្ពុជា​ដែល​បារាំង​បាន​បោះពុម្ភ មក​ឱ្យ​កម្ពុជា​ខ្ចី​ផ្ទៀតផ្ទាត់។ ទន្ទឹម​នឹង​នេះ​រដ្ឋាភិបាល​កម្ពុជា បាន​អះអាង​ថា​ការ​ប្រគល់​ផែនទី​ពី​បារាំង​នេះ គឺ​នឹង​អាច​បញ្ចប់​ទាំង​ស្រុង​ការ​ចោទ​ប្រកាន់​ពី​គណបក្ស​ប្រឆាំង​រឿង​ប្រើប្រាស់​ផែន​ទី​ក្លែងក្លាយ។ ប៉ុន្តែ​គណបក្ស​ប្រឆាំង​បាន​អះអាង​ខ្លួន​នៅ​រងចាំ​មើល​លទ្ធផល​ជា​មុន​សិន​ទើប​អាច​ប្រកាស​ជំហរ​បាន។

ផ្សាយពាណិជ្ជកម្ម

គណៈកម្មការ​ចំពោះ​កិច្ច​ស្តី​ពី​ការ​ផ្ទៀងផ្ទាត់​ផែនទី​នឹង​បើក​ឱ្យ​មាន​ការ​ពិនិត្យ​លើ​ផែនទី​ពី​បារាំង​នៅ​ថ្ងៃ​ទី​៣ កញ្ញា​ស្អែក​នេះ នៅ​ទីស្តីការ​គណៈរដ្ឋមន្ត្រី។ អ្នក​ជំនាញ​ការ​ព្រំដែន​នៃ​រដ្ឋាភិបាល​កម្ពុជា​បាន​លើក​ឡើង​ថា ការ​ផ្ទៀងផ្ទាត់​ពី​ប្រទេស​បារាំង​នេះ គឺ​ដល់​ពេល​បញ្ចប់​ការ​ចោទ​ប្រកាន់​ការ​ប្រើប្រាស់​ផែនទី​ក្លែងក្លាយ​មក​លើ​រដ្ឋាភិបាល​កម្ពុជា​ហើយ។ លោកស្រី កុយ ពិសី អនុប្រធានលេខាធិការដ្ឋាន​នៃ​អាជ្ញាធរ​ជាតិ​ទទួល​បន្ទុក​កិច្ចការ​ព្រំដែន​បន្ថែម៖ សម្លេង

ដោយ​ឡែក​លោក​យឹម សុវណ្ណ អ្នកនាំពាក្យ​គណបក្ស​សង្គ្រោះជាតិ​ ធ្លាប់​បាន​បញ្ជាក់​ថា គណបក្ស​ប្រឆាំង​នៅ​រងចាំ​ប្រភព​ផែនទី​ផ្សេង​ៗ​ទៀត​ជាមុន​នឹង​ការ​បញ្ជាក់​ពី​គោល​ជំហរ​របស់​គណបក្ស​ចំពោះ​ការ​ប្រើប្រាស់​ផែនទី​របស់​រដ្ឋាភិបាល។ អ្នក​នាំពាក្យ​គណបក្ស​ប្រឆាំង​រូប​នេះ បន្ថែម​ថា បើ​ទោះបី​ជា​ការ​ពិនិត្យ​ផែនទី​ត្រឹមត្រូវ​ក៏​ដោយ​គឺ​ជា​រឿង​មួយ ប៉ុន្តែ​រឿង​សំខាន់​នោះ​គឺ ការ​បោះ​បង្គោល​ព្រំដែន​លើ​ផែនដី​ជាក់​ស្តែង​ប្រកប​ដោយ​ភាព និង​ការ​គោរព​ពី​ប្រទេស​ជិតខាង។ ការ​ពិនិត្យ​ផែនទី​នៅ​ថ្ងៃ​ទី​៣ កញ្ញា​ស្អែក​នេះ គឺ​សមាសភាព​ដូច​ការ​ផ្ទៀងផ្ទាត់​លើក​ទី​១ដែរ។ ក្នុង​នោះ​មាន​សមាសភាព​មក​ពី​គណបក្ស​ប្រជាជន​កម្ពុជា គណបក្ស​សង្គ្រោះ​ជាតិ និង​គណបក្ស​ហ្វ៊ុនស៊ិនប៉ិច ចំនួន​៥​រូប​ក្នុង​មួយ​គណបក្ស ដោយ​ឡែក​សមាសភាព​សមាជិក​រដ្ឋសភា ព្រឹទ្ធសភា ទាំងពីរ​គណបក្ស ក្រុម​ប្រឹក្សា​ធម្មនុញ្ញ រួម​ទាំង​សមាជិក​ក្រុម​ស្រាវជ្រាវ​នៃ​រាជ្យបណ្ឌិត​សភា​កម្ពុជា​ជា​ដើម​ក៏​នឹង​ចូលរួម ដូច​លើក​ទី​១​ផង​ដែរ។

គួរ​កត់​សំគាល់​ថា នាយក​រដ្ឋមន្ត្រី​បារាំង លោក Francois Hollande និង​លោក​នាយក​រដ្ឋមន្ត្រី​ហ៊ុន សែន​បាន​សរសេរ​លិខិត​ឆ្លើយ​ឆ្លង​គ្នា​ស្តី​ពី​ការ​ខ្ចី​ផែនទី​ពី​បារាំង​នេះ។ លោក​នាយក​រដ្ឋ​មន្ត្រី​បាន​បញ្ជាក់​ប្រាប់​បារាំង​ថា ការ​ខ្ចី​ផែនទី​ពី​បារាំង​នេះ​គឺ​មិនមែន​កម្ពុជា​ខ្វែង​គំនិត​គ្នា​ជាមួយ​នឹង​វៀតណាម​ស្តីពី​ការ​ប្រើប្រាស់​ផែនទី​នោះ​ទេ។ ការ​ស្នើ​សុំ​ផែនទី​ពី​ប្រទេស​ពាក់ព័ន្ធ​នេះ គឺ​កម្ពុជា ចង់​បង្ហាញ​ពី​តម្លាភាព​ចំពោះ​ប្រជាជាតិ​កម្ពុជា​ទាំង​មូល បញ្ចៀស និង​បញ្ចប់​នូវ​ការ​ញុះញង់​ដោយ​បង្កើត​ជាតិ​និយម​ជ្រុល រួម​ទាំង​ការ​កសាង​សន្តិភាព​នៅ​តាម​ព្រំដែន។

ដោយឡែក​ប្រធានា​ធិបតី​បារាំង បាន​ប្រកាស​បារាំង​រក្សា​ភាព​មិន​លម្អៀង​ក្នុង​ការ​ដោះស្រាយ​បញ្ហា​ព្រំដែន​កម្ពុជា និង​វៀតណាម ប៉ុន្តែ​បារាំង​គាំទ្រ​កិច្ច​ខិតខំ​ប្រឹងប្រែង​របស់​កម្ពុជា​ក្នុង​ទំនាក់​ទំនង​ល្អ​ជាមួយ​នឹង​ប្រទេស​ជិត​ខាង​ស្រប​តាម​ការ​ចរចា និង​ផ្លូវ​ច្បាប់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI