បណ្ឌិត Michael Vickery ​ប្រវត្តិវិទូ​ ស្តីពី​កម្ពុជា​​ ទទួល​មរណភាព ​នៅ​ខេត្ត​បាត់​ដំបង

បណ្ឌិត Michael Vickery
បណ្ឌិត Michael Vickery @preap chanmara

អ្នក​ប្រវត្តិសាស្ត្រនៃ​អាស៊ីអគ្នេយ៍​​ដ៏​ល្បី​ល្បាញ​ម្នាក់ លោកបណ្ឌិត​ Michael Vickery បាន​ទទួល​មរណភាព​ នៅ​ក្នុង​ខេត្ត​បាត់​ដំបង​ ក្នុង​ជន្មានយុ​៨៦ឆ្នាំ​ ដោយ​សារ​រោគាពាធ។​ សព​របស់​លោកត្រូវ​តម្កល់ទុក​ នៅ​​ផ្ទះ​លេខ​១៦២- ផ្លូវG08 ភូមិ​​វត្តក្តុលតាកុយ សង្កាត់​ក្តុល​ដូន​ទាវ ក្រុង​បាត់​ដំបង រហូត​ដល់ថ្ងៃ​ទី​៣កក្កដា។ ឆ្លៀត​ឱកាស​នេះ វិទ្យុ​បារាំង​សូម​រម្លឹក​ពី​ប្រវត្តិនិង​ស្នាដៃ​​ខ្លះៗ​របស់​បណ្ឌិត Michael Vickery ស្តីពី​កម្ពុជា​។

ផ្សាយពាណិជ្ជកម្ម

លោក Michael Vickery ជាអ្នកជំនាញ​​ប្រវត្តិសាស្ត្រនៃ​អាស៊ីអគ្នេយ៍​​ ហើយ​ក៏​ជា​នរវិទូ ប្រវត្តិវិទូ​ស្តីពី​កម្ពុជាផង​ដែរ។ លោក​ចេះនិង​ប្រើប្រាស់​​ភាសាភាសា​ខ្មែរបាន​ច្បាស់​លាស់ ហើយ​បាន​សិក្សា​ស្រាវជ្រាវពី​​សីលាចារឹក​ខ្មែរ​បូរាណទៀត​ផង​។​

មាន​សញ្ញាបត្រ​ផ្នែក​សិល្បៈ​និង​ទស្សនវិទ្យា​ បណ្ឌិត Michael Theodore Vickery ជា​ជន​ជាតិ​អាមេរិក និង​ដែល​បាន​ចូល​មកសិក្សា​ស្រាវជ្រាវ​នៅ​ស្រុក​ខ្មែរ ក្នុង​អំលុង​ទសវត្ស​១៩៦០ ហើយ​ក្រោយ​មក​បាន​ចាប់​ចិត្ត​ស្រឡាញ់​ប្រទស​នេះ និង​រៀប​ការ​ជាមួយ​នារី​ខ្មែរ​ម្នាក់។

ដោយ​មាន​ជំនក់​ចិត្ត​នឹង​ការ​សិក្សា​ពី​តំបន់​អាស៊ីអគ្នេយ៍ លោក​បានស្រាវជ្រាវ​និង​​សរសេរ​អត្ថបទ​ជាច្រើន​ស្តីពី ពី​កម្ពុជា ថៃ ឡាវ វៀតណាម និង​ម៉ាឡេស៊ី ជា​ដើម។ ផ្អែក​លើក​ការ​ស្រាវជ្រាវ​ពី​ប្រទេស​ទាំង​នេះ លោក​បាន​ដើរ​បង្រៀន​ និង​ផ្តល់​បាឋកថា នៅ​សកល​វិទ្យាល័យ​​ធំៗ​ជា​ច្រើន​លើពីពិភព​លោក។ នៅ​ភ្នំពេញ បណ្ឌិត​រូបនេះ ធ្លាប់​បាន​បង្រៀន​មុខ​វិជ្ជា​ប្រវត្តិ​សាស្ត្រ​ខ្មែរ នៅ​សកលវិទ្យាល័យ​ភូមិ​ន្ទ​និង​វិចិត្រ​សិល្បៈ​ រយៈ​ពេល​ប្រមាណ​៤ឆ្នាំ​។

ស្នាដៃសំខាន់​ៗ​របស់​លោក គឺ​មាន​ដូចជា សៀវភៅ កម្ពុជាចន្លោះ​ឆ្នាំ​១៩៧៥ ដល់​ឆ្នាំ​១៩៨២ បោះពុម្ពផ្សាយ​ នៅចុង​ទសវត្ស​១៩៩០។ សៀភៅ​មួយ​ក្បាលទៀត គឺ​ដាក់​ចំណង​ជើង​ថាកម្ពុជា​ នយោបាយ សេដ្ឋកិច្ច និង​សង្គម ដែល​ចេញផ្សាយ​នៅទីក្រុង​ដុងដ្រ៍ ១៩៨៦។ បណ្ឌិត Michael Vickery បាន​សរសេរ​ស្នាដៃ​សំខាន់​មួយ​ទៀត គឺ​សិក្សា​ស្រដៀង​គ្នា​នេះដែរ តែ​និយា​យពី​ នយោបាយ សេដ្ឋកិច្ច និង​សង្គម របស់​ខ្មែរ នៅ​មុន​សម័យ​អង្គរ គឺ​អំលុង​សតវត្ស​ទី​៧ និង​ទី​៨ ចេញផ្សាយ​នៅ​ក្រុង​តូក្យូ ប្រទេ​ស​ជប៉ុន​។

វណ្ណកម្ម​ជា​សៀវភៅ ចុង​ក្រោ​យរបស់​លោក គឺ​និយាយ​ពី​ការ​ស្ទង់​មតិ​ក្នុង​នយោបាយ​កម្ពុជា​សម័យ​ទំនើប​ ចេញផ្សាយ​នៅភ្នំពេញ កាលពី​១០ឆ្នាំមុន។ នោះ​គឺជា​កម្រង​អត្ថបទ​ខ្លីៗ ជាភាសា​អង់គ្លេស ដែល​លោក​​វិភាគ​គិត​ពិ​ចារណា​ពី​នយោបាយ​ស្រុ​ក​ខ្មែរ​ ក្នុង​នាម​ជាអ្នក​សរសេរ​បទវិភាគ និង​បទ​វិចារណកថា សម្រាប់​ចេញ​ផ្សាយ​នៅក្នុង​កាសែត​ភ្នំពេញប៉ុស្តិ៍​ ជាង​១៥ឆ្នាំ​ ចាប់ពី​តាំងពី​កាសែតមួយ​នេះ ​ទើបតែ​បង្កើត​ឡើងមកម្ល៉េះ​។​

នៅក្នុង​ការសិក្សា​ពី​ប្រវត្តិ​សាស្ត្រ បណ្ឌិត Michael Vickery ក៏​បាន​ផ្តោត​ការ​សិក្សា​ស៊ីជម្រៅ​មួយ​ផ្នែក​ផង​ដែរ ទៅលើ​​លទ្ធិកម្មុយនិស្តនៅ​កម្ពុជា ហើយ​រូប​លោក ក៏​បាន​ចូលរួម​ដំណើរ​ការ​ស្វែង​រក​យុត្តិធម៌​នៅ​សាសា​ក្តី​ខ្មែរ​ក្រហមទៀតផង​ ក្នុង​នាម​ជាអ្នក​ជំនាញ​ ​ និង​ជាអ្នក​វិភាគ​ឯកសារប្រវត្តិសាស្ត្រ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI