កម្ពុជា-ច្បាប់

​៦ខែ​ឆ្នាំ​២០១៩ ក្រសួង​យុត្តិធម៌​បាន​ផ្ដល់​សេវា​ប្រឹក្សា​ផ្លូវ​ច្បាប់​ក្រៅ​ប្រព័ន្ធ​តុលាការ​បាន​ប្រមាណ ៣០០០​ករណី​

លោកអង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌
លោកអង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ @ក្រសួងយុត្តិធម៌

រដ្ឋ​មន្ត្រី​ក្រសួង​យុត្តិធម៌ បាន​ថ្លែង​ឲ្យ​ដឹង​ថា តាម​រយៈ​កំណែ​ទម្រង់​ប្រព័ន្ធ​យុត្តិធម៌ ក្រសួង​យុត្តិធម៌​បាន​បង្កើត​ប្រព័ន្ធ​ដោះ​ស្រាយ​នៅ​ក្រៅ​ប្រព័ន្ធ​តុលាការ​ជា​ច្រើន​មណ្ឌល​នៅ​តាម​បណ្តា​ខេត្ត​ក្រុង ហើយ​បាន​ដោះ​ស្រាយ​វិវាទ​រាប់​ពាន់​ករណី​។ ការ​លើក​ឡើង​របស់​រដ្ឋ​មន្ត្រី​ក្រសួង​យុត្តិធម៌​ដូច្នេះ គឺ​ធ្វើ​ឡើង​ខណៈ​លោក​ចូល​ទៅ​ឆ្លើយ​បំភ្លឺ នៅ​ក្នុង​រដ្ឋ​សភា​នា​ព្រឹក​ថ្ងៃ​ព្រហស្បតិ៍​នេះ តាម​ការ​អញ្ជើញ​របស់​គណៈ​កម្មការ​ទី៦​នៃ​រដ្ឋសភា ពាក់​ព័ន្ធ​នឹង​ការ​រៀប​ចំ​វិស័យ​យុត្តិធម៌​នៅ​ក្នុង​ប្រទេស​កម្ពុជា​។ 

ផ្សាយពាណិជ្ជកម្ម

នៅ​ពី​មុខ​អ្នក​តំណាង​រាស្ត្រ ដែល​មក​ពី​គណបក្ស​ប្រជាជន​កម្ពុជា លោក​អង្គ វង្ស វឌ្ឍានា រដ្ឋ​មន្ត្រី​ក្រសួង​យុត្តិធម៌​បាន​លើក​ឡើង​ជា​ច្រើន​ស្តី​ពី​កំណែ​ទម្រង់​ប្រព័ន្ធ​តុលាការ​នៅ​ក្នុង​អាណត្តិ​រដ្ឋាភិបាល​ទី៦​នេះ ដោយ​លោក​បាន​បង្ហាញ​ថា ក្រសួង​យុត្តិធម៌ បាន​បង្កើត​ប្រព័ន្ទ​ដោះ​ស្រាយ​ក្រៅ​ប្រព័ន្ធ​តុលាការ គឺ​មណ្ឌល​សេវា​កម្ម​យុត្តិធម៌​ចំនួន​៦៦​មណ្ឌល នៅ​តាម​មូល​ដ្ឋាន ក្នុង​នោះ​មាន​ខេត្ត ក្រុង ចំនួន​១០​។ ការ​បង្កើត​មណ្ឌល​សេវា​កម្ម​យុត្តិធម៌​នេះ គឺ​ដើម្បី​កាត់​បន្ថយ​ការ​ប្ដឹង​ទៅ​តុលាការ ចំពោះ​វិវាទ​រដ្ឋ​ប្បវេណី និង​ករណី​តូច​តាច បទលហុ​នឹង​កាត់​បន្ថយ​ការ​ចំណាយ​ថវិកា​នឹង​កាត់ បន្ថយ​ការ​កក​ស្ទះ​សំណុំ​រឿង​នៅ​តុលាការ​។ នេះ​បើ​តាម​លោក អង្គ វង្ស វឌ្ឍានា​។

លោក​ថា នៅ​សល់​ខេត្ត​ចំនួន ១៥​ផ្សេង​ទៀត ដែល​ពុំ​ទាន់​មាន​មណ្ឌល​សេវា​កម្ម​យុត្តិធម៌ គឺ​ក្រសួង​យុត្តិធម៌ កំពុង​តែ​សហការ​ជាមួយ​នឹង​ដៃ​គូ ដើម្បី​ត្រៀម​រៀប​ចំ​បង្កើត​មណ្ឌល​នេះ​ឡើង ដើម្បី​ជួយ​សម្រួល ដោះ​ស្រាយ​បញ្ហា​នានា​របស់​ប្រជា​ពលរដ្ឋ ឲ្យ​បាន​នៅ​ទូទាំង​ប្រទេស​។

តាម​លោក អង្គ វង្សវឌ្ឍនា រយៈ​ពេល​៦ខែ​ឆ្នាំ​២០១៩​នេះ ក្រសួង​យុត្តិធម៌​បាន​ផ្ដល់​សេវា​ប្រឹក្សា​ផ្លូវ​ច្បាប់​ក្រៅ​ប្រព័ន្ធ​តុលាការ និង​បាន​ដោះ​ស្រាយ​វិវាទ​បាន​ជាង ២០០០​ករណី និង​ផ្ដល់​សេវា​ប្រឹក្សា​ផ្លូវ​ច្បាប់​បាន​ជាង ១០០០​ករណី​។ ករណី​ទាំង​នោះ​រួម​មាន បញ្ហា​ទំនាស់​ដីធ្លី ការ​ប៉ះពាល់​ជីវភាព​អ្នក​ជិត​ខាង ទំនាស់​បំពាន​កិច្ច​សន្យា​បរិហារ​កេរ្តិ៍ ការ​ជេរ​ប្រមាថ ឬ​ការ​បង្ក​ការ​ខូច​ខាត​សម្បត្តិ​ទ្រព្យ​សម្បត្តិ​តិច​តួច ជា​ដើម​។

លោក​រដ្ឋ​មន្ត្រី បញ្ជាក់ថា គឺ​ជា​ការ​ផ្ដល់​ប្រឹក្សា​យុត្តិធម៌​ជូន​ប្រជាពលរដ្ឋ ប្រកប​ដោយ​ប្រសិទ្ធ​ភាព នៅ​ថ្នាក់​មូល​ដ្ឋាន និង​បាន​ចូល​រួម​កាត់​បន្ថយ​ការ​ដាក់​ពាក្យ​បណ្ដឹង​ទៅ​តុលាការ និង​ការ​កក​ស្ទះ​សំណុំ​រឿង​នៅ​តាម​សាលាក្តី រាជធានី ខេត្ត ផង​ដែរ​។

សូម​បញ្ជាក់​ថា រដ្ឋ​មន្ត្រី​ក្រសួង​យុត្តិធម៌​កាល​ពី​ពេល​ថ្មីៗ​នេះ បាន​ក្រើន​រំលឹក​ដល់​ចៅ​ក្រម និង​អ្នក​ពាក់​ព័ន្ធ​ឲ្យ​ប្រញាប់​ប្រញាល់​ដោះ​ស្រាយ​សំណុំ​រឿង​ឲ្យ​បាន​ល្អ​ប្រសើរ ព្រោះ​ថា​នៅ​ក្នុង​ក្រប​ខណ្ឌ​ទូទាំង​ប្រទេស ក្នុង​ប្រព័ន្ធ​យុត្តិធម៌ គឺ​កំពុង​មាន​ការ​កក​ស្ទះ​សំណុំ​រឿង និង​ជា​បញ្ហា​ចោទ ទាំង​សំណុំ​រឿង​រដ្ឋប្ប​វេណី និង​សំណុំ​រឿង​ព្រហ្ម​ទណ្ឌ ហើយ​សំណុំ​រឿង​ខ្លះ​ក៏​បាន​អូស​បន្លាយ​ដល់​ជាង​១០​ឆ្នាំ​ទៅ​ហើយ ហើយ​ក៏​មិន​ទាន់​ដោះ​ស្រាយ​ចប់​នៅ​ឡើយ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI