កម្ពុជា-នយោបាយ

លោក ម៉ម សូណង់ដូ លា​លែង​ពី​ប្រធាន​វិទ្យុ​សំបុក​ឃ្មុំ ក្រោយ​តុលាការ​កោះ​ហៅ​ជា​សាក្សី​ ក្នុង​សំណុំ​រឿង លោក កឹម សុខា

លោក ម៉ម សូណង់ដូ អតីត​​ប្រធាន​គណបក្ស​សំបុក​ឃ្មុំ​សង្គម​ប្រជាធិបតេយ្យ និង​អតីត​ប្រធាន​វិទ្យុ​សំបុក​ឃ្មុំ
លោក ម៉ម សូណង់ដូ អតីត​​ប្រធាន​គណបក្ស​សំបុក​ឃ្មុំ​សង្គម​ប្រជាធិបតេយ្យ និង​អតីត​ប្រធាន​វិទ្យុ​សំបុក​ឃ្មុំ @សហការី

អតីត​ប្រធាន​គណបក្ស​សំបុក​ឃ្មុំ​សង្គម​ប្រជាធិបតេយ្យ លោក ម៉ម សូណង់ដូ បាន​ប្រកាស​លា​លែង​ពី​តំណែង​ប្រធាន​វិទ្យុ​សំបុក​ឃ្មុំ ខណៈ​តុលាការ​ចេញ​ដីកា​កោះ​ហៅ​ជា​បន្ត​បន្ទាប់​ឲ្យ​ចូល​ខ្លួន​ក្នុង​នាម​ជា​សាក្សី ក្នុង​សំណុំ​រឿង​លោក កឹម សុខា។ ប៉ុន្តែ​តាម​លិខិត​ចុះ​ថ្ងៃ​ទី ១ ខែ​មករា ឆ្នាំ​២០១៨ លោក ម៉ម សូណង់ដូ បញ្ជាក់​ថា ការ​លា​លែង​ពី​ប្រធាន​វិទ្យុ​សំបុក​ឃ្មុំ និង​លា​លែង​ចេញ​ពី​ឆាក​នយោបាយ​នេះ គឺ​ដើម្បី​ផ្ទេរ​វេន​ជូន​អ្នក​នយោបាយ​វ័យ​ក្មេង បន្ត​កាតព្វកិច្ច​ស្នេហា​ជាតិ​ជំនួស​លោក​ត​ទៅ​ទៀត។

ផ្សាយពាណិជ្ជកម្ម

នៅ​ក្នុង​លិខិត​ប្រកាស​លា​លែង​ចេញ​ពី​ឆាក​នយោបាយ​ និង​លា​លែង​ពី​ប្រធាន​វិទ្យុ​សំបុក​ឃ្មុំ លោក ម៉ម សូណង់ ដែល​បច្ចុប្បន្ន កំពុង​ស្ថិត​នៅ​ទីក្រុង​ប៉ារីស ប្រទេស​បារាំង បាន​ប្រកាស​ថា លោក​ស្រី ឌិន ផាណារ៉ា ដែល​ជា​ប្រធាន​ស្តី​ទី នៃ​វិទ្យុ​នេះ នឹង​ក្លាយ​ជា​ប្រធាន​វិទ្យុ បន្ទាប់​ពី​លោក​លា​លែង​ពី​តំណែង។

លោក ម៉ម សូណង់ដូ បាន​រៀប​រាប់​ថា រយៈ​ពេល ២២ ឆ្នាំ ដែល​លោក បាន​ប្រឡូក​នយោបាយ លោក​មាន​មោទនភាព ដោយ​បាន​ចូល​រួម​បម្រើ​សង្គម តាម​រយៈ​ការងារ​មនុស្ស​ធម៌ ការ​លះ​បង់​កម្លាំង​កាយ​ចិត្ត ការ​ប្រឈម​មុខ​ជាមួយ​នឹង​អ្នក​កាន់​អំណាច ក្នុង​ការងារ​យុត្តិធម៌​សង្គម សិទ្ធិ​សេរីភាព និង​ដើម្បី​ការពារ​អ្នក​រង​គ្រោះ។ ទោះ​ជា​​លា​លែង​ពី​តួ​នាទី​ជា​ប្រធាន​បក្ស និង​ប្រធាន​វិទ្យុ​ក្តី ប៉ុន្តែ​លោក ម៉ម សូណង់ដូ អះអាង​ថា នឹង​នៅ​តែ​រក្សា​ការងារ​សកម្មភាព​មួយ គឺ​កិច្ច​ការ​មនុស្ស​ធម៌ ដោយ​មិន​ប្រកាន់​និន្នាការ​នយោបាយ។

ជា​ការ​កត់​សម្គាល់ ការ​ប្រកាស​លា​លែង​ចេញ​ពី​តំណែង ធ្វើ​ឡើង​បន្ទាប់​ពី លោក​គី ឫទ្ធី ចៅក្រម​ស៊ើប​សួរ​នៃ​សាលា​ដំបូង​រាជធានី​ភ្នំពេញ បាន​ចេញ​ដី​កា​កោះ​ហៅ​លើក​ទី​បី ​លោក ម៉ម សូណង់ដូ អតីត​ប្រធាន​គណបក្ស​សំបុក​ឃ្មុំ​សង្គម​ប្រជាធិបតេយ្យ ឲ្យ​ចូល​មក​កាន់​តុលាការ​នៅ​ព្រឹក​ថ្ងៃ​ទី​១១ ខែ​មករា ​ខាង​មុខ​នេះ ដើម្បី​ឲ្យ​មក​បំភ្លឺ​ក្នុង​នាម​ជា​សាក្សី​នៅ​ក្នុង​សំណុំ​រឿង​លោក កឹម សុខា ដែល​រដ្ឋាភិបាល ចោទ​ថា ក្បត់​ជាតិ។ យ៉ាង​ណា​ក៏​ដោយ លោក​ម៉ម សូណង់ដូ បាន​ប្រកាស​ថា លោក នឹង​មិន​ចូល​បំភ្លឺ​នៅ​តុលាការ​ឡើយ ក្រោម​ហេតុផល លោក កំពុង​ពិនិត្យ​សុខភាព នៅ​ប្រទេស​បារាំង។ ម្យ៉ាង​វិញ​ទៀត អតីត​ប្រធាន​គណបក្ស​សំបុក​ឃ្មុំ​សង្គម​ប្រជាធិបតេយ្យ លើក​ឡើង​ថា លោក មិន​ធ្លាប់​បាន​ទទួល​ដីកា​កោះ​ហៅ​ពី​មុន​មក​នោះ​ទេ។

សូម​រំឮក​ជូន​ថា កាល​ពី​ឆ្នាំ ២០១២​ លោក​ ម៉ម សូណង់ដូ​ ត្រូវ​បាន​តុលាការ​កាត់​ទោស​ឲ្យ​ជាប់​ពន្ធនាគារ​រយៈ​ពេល​២០​ឆ្នាំ​ ពី​បទ​ញុះញង់​បង្ក​ឲ្យ​មាន​ការ​បះ​បោរ​មួយ​ ​នៅ​ក្នុង​ទំនាស់​ដីធ្លី​មួយ​កើត​ឡើង​នៅ​ខេត្ត​ក្រចេះ។ ​តែ​ត្រូវ​បាន​ដោះ​លែង​វិញ នៅ​ខែ​មីនា ឆ្នាំ ២០១៣ ខណៈ​មាន​ការ​ដាក់​សម្ពាធ​ពី​អង្គការ​សង្គម​ស៊ីវិល​អន្តរជាតិខាងការ​ពារ​សិទ្ធិ​មនុស្ស ។

ក្រោយមកនៅឆ្នាំ២០១៣ លោក ម៉ម សូណង់ដូ ក៏បានបង្កើតបក្សដាក់ឈ្មោះ គណបក្សសំបុកឃ្មុំសង្គមប្រជាធិបតេយ្យ ដើម្បីប្រកួតប្រជែងការបោះឆ្នោតឆ្នាំ២០១៨ ប៉ុន្ដែលោក ក៏លាលែងពីតំណែងវិញ ដោយសារតែ គណបក្សនេះ មិនបានឈ្នះគ្រងតំណែងមេឃុំ ឬចៅសង្កាត់ ប៉ុន្តែ ឈ្នះបានមួយអសនៈគត់ ជាតំណែងជំទប់ទី២ នៅក្នុងការបោះឆ្នោតឃុំសង្កាត់ឆ្នាំ២០១៧ កន្លងទៅ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI