អានតួអត្ថបទ
កម្ពុជា

គជប គ្រោង​ប្រកាស​សុពលភាព​បញ្ជី​ឈ្មោះ​បោះ​ឆ្នោត​ផ្លូវ​ការ​ថ្ងៃ​ទី​ ១២​កុម្ភៈ

រូបភាពចាស់៖ គជប បានរៀបចំកិច្ចប្រជុំ​នាពេលកន្លងមក
រូបភាពចាស់៖ គជប បានរៀបចំកិច្ចប្រជុំ​នាពេលកន្លងមក RFI/Siv Channa
ដោយ៖ អេង គីមហុង
១៩ នាទី

ថ្ងៃ​នេះ​គឺ​ជា​ថ្ងៃ​ចុង​ក្រោយ​ដែល​ក្រុម​ប្រឹក្សា​ធម្មនុញ្ញ​នឹង​បញ្ចប់​សវនាការ​របស់​ខ្លួន​លើបណ្ដឹង​ប្ដឹង​ឲ្យ​លុប​ឈ្មោះ​ជន​ដែល​គេ​សង្ស័យ​ថា ជា​ជន​ជាតិ​វៀតណាម​ជា​ច្រើន​នាក់ដែល​ប្ដឹង​ដោយ​គណបក្ស​​សង្គ្រោះ​ជាតិ។ សវនាការ​ចាប់​តាំង​ពី​ថ្ងៃ​ពី​ចុង​ខែ​មករា​រហូត​មកដល់​ថ្ងៃ​ទី​៩​កុម្ភៈ​នេះ​ក្រុម​ប្រឹក្សា​ធម្មនុញ្ញ​មិន​ទាន់​បាន​លុប​ឈ្មោះ​ជន​ណា​ម្នាក់​នៅ​ឡើយទេ ខណៈ​ដែល​គជប​ គ្រោង​ប្រកាស​សុពលភាព​បញ្ជី​ឈ្មោះ​ផ្លូវ​ការ​នៃ​ចំនួន​អ្នក​ចុះ​ឈ្មោះបោះ​ឆ្នោត​នៅ​ថ្ងៃ​ទី​១២​កុម្ភៈ​ខាង​មុខ​នេះ។

ផ្សាយពាណិជ្ជកម្ម

លោក ហង្ស ពុទ្ធា អ្នក​នាំ​ពាក្យ​គជប​បាន​អះ​អាង​ថា ការ​ប្រកាស​សុពលភាព​នៃ​បញ្ជីឈ្មោះ​បោះ​ឆ្នោត​នៅ​ថ្ងៃ​ទី​១២​កុម្ភៈ​ខាង​មុខ មិន​បាន​ធ្វើ​ឡើង​តាម​រយៈ​ការ​បិទ​ផ្សាយ​បញ្ជីឈ្មោះ​ជា​សាធារណៈ​នោះ​ទេ តែ​ពលរដ្ឋ​អាច​ចូល​ទៅ​មើល​ឈ្មោះ​ខ្លួន​ឯង​បាន​នៅ​ក្នុង​គេហ​ទំព័រ​គជប។ ហើយ​ចំពោះ​ការ​បិទ​ផ្សាយ​បញ្ជី​ឈ្មោះ​ជា​សាធារណៈ​នឹង​ធ្វើ​ឡើង​នៅមុន​ថ្ងៃ​បោះ​ឆ្នោត​ឃុំ​សង្កាត់​មក​ដល់។ បើ​តាម​លោក ហង្ស ពុទ្ធា ការ​ប្រកាស​សុពលភាព​បញ្ជី​ឈ្មោះ​បោះឆ្នោត​នេះ​គឺ​ជា​ការ​បង្ហាញ​ពី​ចំនួន​ផ្លូវ​ការ​នៃ​អ្នក​មាន​សិទ្ធិ​បោះឆ្នោត។

សូមបញ្ជាក់ថា គម្រោង​នៃ​ការ​ប្រកាស​សុពលភាព​បញ្ជី​ឈ្មោះ​ផ្លូវ​ការ​ធ្វើ​ឡើង​ក្រោយ​បិទ​បញ្ចប់​ការ​ប្ដឹង​តវ៉ា​នានា​ដោយ​រាប់​ចាប់​តាំង​ពី​ការ​ដោះ​ស្រាយ​បណ្ដឹង​ដែល​កំពុង​តែដំណើរ​ការ​នៅ​ក្រុម​ប្រឹក្សា​ធម្មនុញ្ញ​ហើយ​គ្រោង​នឹង​បញ្ចប់​នៅ​ថ្ងៃ​នេះ។ ក្រុម​ប្រឹក្សា​ធម្មនុញ្ញ​កំពុង​តែ​ដោះ​ស្រាយ​បណ្ដឹង​ប្ដឹង​ដោយ​គណបក្ស​សង្គ្រោះជាតិ​ដើម្បី​ឲ្យ​ស្ថានប័ន​មានសមត្ថកិច្ច​ចុង​ក្រោយ​មួយ​នេះ​លុប​ឈ្មោះ​ជនបរទេស​ដែល​គេ​សង្ស័យ​ថា ជា​ជន​ជាតិ​វៀតណាម​ជា​ច្រើន​នាក់។ តែយ៉ាងណាមិញ​គិត​មក​ដល់​ថ្ងៃ​ទី​៩​កុម្ភៈ​នេះ នៅ​មិន​ទាន់​មានជន​បរទេស​ណា​ម្នាក់​ត្រូវ​បាន​លុប​ឈ្មោះ​ចេញ​ពី​បញ្ជី​ឈ្មោះបោះឆ្នោត​នៅ​ឡើយ​ទេ។  

ដោយ​សារ​ក្រុមប្រឹក្សាធម្មនុញ្ញ គាំទ្រ​សេចក្តី​សម្រេច​របស់ គណៈកម្មការ​ធិ​ការ​ជាតិ​រៀប​ចំ​ការ​បោះ​ឆ្នោត (គជប) ដើម្បី​រក្សាទុក​ឈ្មោះ ដែល​បក្ស​សង្គ្រោះ​ជាតិ ចោទ​ថា ជា​ជនបរទេស សរុប ៥៨២នាក់។ ព្រោះ​ការ​ប្តឹង​ជំទាស់​របស់ បក្ស​សង្គ្រោះ​ជាតិ ក្នុង​ការ​លុប​ឈ្មោះ​ជន​ជាតិ​បរទេស (វៀតណាម) ពុំ​មាន​ឯកសារ ឬ​ភស្តុតាង​​លាយ​លក្ខណ៍​អក្សរ ដើម្បី​ឲ្យ ក្រុម​ប្រឹក្សា​ធម្មនុញ្ញ អាច​បដិសេធន៍​សេចក្តី​សម្រេច​របស់ គជប បាន។ ម្យ៉ាង​វិញ​ទៀត តាម​ការ​ស៊ើប​អង្កេតរ​បស់​មន្ត្រី​ជំនាញ​នៃ ក្រុម​ប្រឹក្សា​ធម្មនុញ្ញ ពលរដ្ឋ​ដែល​រង​ពាក្យ​បណ្តឹង សុទ្ធ​តែ​បាន​បំពេញ​លក្ខខណ្ឌ​ចុះ​ឈ្មោះ​បោះ​ឆ្នោត​ត្រឹម​ត្រូវ​តាម​ច្បាប់។ លើស​ពី​នេះ​ទៀត សេចក្តី​សម្រេច​របស់ គជប គឺ​មាន​មូលដ្ឋាន​គតិយុត្តិ​ត្រឹម​ត្រូវ។ ហើយ​ហេតុផល​ចុង​ក្រោយ​បង្អស់ គឺ ការ​បញ្ជាក់​ធាតុ​ពិត​នៃ​អត្តសញ្ញាណ​របស់​បុគ្គល​ណា​ម្នាក់ មិន​មែន​ជា​សមត្ថកិច្ច​របស់ ក្រុម​ប្រឹក្សា​ធម្មនុញ្ញ​នោះ​ទេ។

កន្លងមកប្រធាន​នាយកដ្ឋាន​នីតិកម្ម និង​ការបោះឆ្នោត របស់​គណបក្ស​សង្គ្រោះ​ជាតិ លោក​ស្រី ម៉េង សុភា​រី ធ្លាប់ប្រាប់វិទ្យុបារាំង​ថា ការសម្រេច​រក្សាទុក​ឈ្មោះ​ជនបរទេស(វៀតណាម) ក្នុង​បញ្ជី​បោះឆ្នោត​ដដែល​របស់​ក្រុមប្រឹក្សាធម្មនុញ្ញ មិនអាច​ទទួលយកបាន​ទេ។ មិនអាច​ទទួលយកបាន ដោយសារតែ ក្រុមប្រឹក្សាធម្មនុញ្ញ មិនបាន​ពិចារណា ទទួលស្គាល់​ចម្លើយ​របស់​ជនបរទេស​មួយចំនួន  ដែល​បាន​សារភាពថា ពួកគេ​មិនមែនជា​ខ្មែរ ។

បើតាម​ប្រធាន​នាយកដ្ឋាន​នីតិកម្ម និង​ការបោះឆ្នោត រូបនេះ អំឡុង​ចុះឈ្មោះ​បោះឆ្នោត បក្ស​សង្គ្រោះ​ជាតិ រកឃើញថា មាន​ជនបរទេស (វៀតណាម) មក​ចុះឈ្មោះ​បោះឆ្នោត ជិត ៥ពាន់​នាក់ (៤៨៩៣នាក់) តែ បក្ស​សង្គ្រោះ​ជាតិ សម្រេច ប្តឹង​ជំទាស់​ទៅ​ថ្នាក់ឃុំ សង្កាត់ ត្រឹមតែ​ជាង បី​ពាន់​នាក់ ហើយ​ប្តឹង​ជំទាស់​ទៅ គជប ប្រមាណ​ជាង ពីរពាន់​នាក់ (២៤៤១ នាក់) និង​ប្តឹងទៅ​ក្រុមប្រឹក្សាធម្មនុញ្ញ ជាង ប្រាំបី​រយ​នាក់ ប៉ុណ្ណោះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ