កម្ពុជា

បច្ចុប្បន្ន​ភាព​នយោបាយ ​ជា​​រឿង​ប្រឈម​ខ្លាំង ​នៃ​ការ​បញ្ចេញ​មតិ​លើ​អ៊ីនធឺណែត​នៅ​កម្ពុជា​

ក្រុម​អង្គការ​សង្គ​ម​ស៊ីវិល​ដែល​ចូល​រួម​នៅ​ក្នុង​សន្និសីទ​កាសែត​នៅ​ឯ​សណ្ឋាគា​កំាបូត​ឌីយ៉ាណា ​ថ្ងៃ​ទី​១៤ ​ខែ​កញ្ញា ​ឆ្នាំ​២០១៥​
ក្រុម​អង្គការ​សង្គ​ម​ស៊ីវិល​ដែល​ចូល​រួម​នៅ​ក្នុង​សន្និសីទ​កាសែត​នៅ​ឯ​សណ្ឋាគា​កំាបូត​ឌីយ៉ាណា ​ថ្ងៃ​ទី​១៤ ​ខែ​កញ្ញា ​ឆ្នាំ​២០១៥​ @RFI/channa
ដោយ៖ វ៉ា សំណព្វ
១៦ នាទី

ក្រុម​អង្គការ​សង្គម​ស៊ីវិល​ចំនួន​១៩​អង្គភាព​ខុសៗ​គ្នា ​បាន​ចេញ​សេចក្តី​ថ្លែង​ការណ៍​ចំនួន​៩​ចំណុច ​ដើម្បី​​គាំទ្រ​​សេចក្តី​​ថ្លែង​ការណ៍​​ស្តីពី ​សិទ្ធិ​​អ៊ីនធឺណែត​​នៅ​​កម្ពុជា​​។ ​​ក្រុម​​អង្គការ​​សង្គម​​ស៊ីវិល​​​ទាំង​​​នោះ ​​បាន​​បង្ហាញ​​ការ​​ព្រួយ​​បារម្ភ​​ជា​​ទូទៅ​​ថា ​​សិទ្ធិ​សេរីភាព​​ក្នុង​​ការ​​បញ្ចេញ​​មតិ​​លើ​​ប្រពន្ធ​​អ៊ីន​ធឺណែត ​​នឹង​​ត្រូវ​​​បាន​រិត​​​ត្បិត ​​ខណៈ​​មាន​​ការ​​ចាប់​​ខ្លួន​​សកម្មជន​ ​និង​​អ្នក​​នយោ​បាយ​​ជា​​បន្ត​​បន្ទាប់។​

ផ្សាយពាណិជ្ជកម្ម

សេចក្តីថ្លែងការណ៍​ទាំង​៩​ចំណុច ​របស់​ក្រុម​អង្គការ​សង្គម​ស៊ីវិល​ចំនួន​១៩​នោះ ​រួមមាន​ ការ​ការ​ពារ​សិទ្ធិ​លើ​ប្រព័ន្ធ​អ៊ីន​ធឺណែត,​ សិទ្ធិ​ប្រើប្រាស់​, ​សិទ្ធិ​ខាង​ការ​បញ្ចេញ​មតិ​, ​សិទ្ធិ​ប្រមូល​ផ្តុំ​និង​ចូល​រួម​, ​សិទ្ធិ​ទទួល​បាន​ព័ត៌មាន​, ​សិទ្ធិ​ឯកជន​ភាព​លើ​អ៊ីន​ធឺណែត,​ សិទ្ធិ​ជា​ម្ចាស់​នៃ​ការ​បង្កើត​ថ្មី,​ ការ​កម្រិត​សិទ្ធិ,​ និង​ការ​គោរព​សិទ្ធិ​អ្នក​ដទៃ​លើ​លំហ​បច្ចេក​វិទ្យា​ជា​ដើម។​ នេះ​បើ​យោង​តាម​សេចក្តី​ថ្លែង​ការណ៍​របស់​ក្រុម​អង្គការ​សង្គម​ស៊ីវិល​ទាំង​១៩ ​ដែល​ចេញ​ផ្សាយ​នៅ​ថ្ងៃ​ទី​១៤​ ខែ​កញ្ញា ​ឆ្នាំ​២០១៥​។  ​

ក្រុម​អង្គការ​សង្គម​ស៊ីវិល​ចំនួន​១៩ ​ដែល​ចូលរួម​នៅ​ក្នុង​សន្និសីទ​កាសែត​ ដែល​ធ្វើ​ឡើង​នៅ​ឯ​សណ្ឋាគា​កំាបូត​ឌីយ៉ាណា ​បាន​និយាយ​ថា ​ពួកគេ​មាន​ការ​ព្រួយ​បារម្ភ​ចំពោះ​ការ​រិត​ត្បិត​សិទ្ធិ​សេរីភាព​នៃ​ការ​បញ្ចេញមតិ​នៅ​លើ​ប្រព័ន្ធ​អ៊ីនធឺណែត ​ខណៈ​ដែល​សកម្មជន​ និង​អ្នក​នយោ​បាយ​​​មួយ​ចំនួន​ត្រូវ​បាន​ចាប់​ខ្លួន​នា​ពេល​ថ្មីៗ​នេះ។​ ពួក​គេ​បាន​និយាយ​ថា ​បើ​ទោះ​បី​ជា​បច្ចុប្បន្ន​​​នេះ ​​ប្រទេស​​កម្ពុជា​​នៅ​មិន​ទាន់​មាន​ច្បាប់​ស្តីពី​ឧក្រឹដ្ឋ​កម្ម​អ៊ីន​ធឺណែត ​ឬ​Cyber​ Crime​ ក្តី​ ក៏​ប៉ុន្តែ​មនុស្ស​មួយ​ចំនួន​ត្រូវ​បាន​ចោទ​ប្រកាន់​រួច​ទៅ​ហើយ​។ ​ហើយ​បច្ចុប្បន្ន​ បញ្ហា​នយោ​បាយ​ គឺ​​ជា​ប្រធាន​​រឿង​ប្រឈម​​ខ្លាំង​​ជាង​​គេ។​​

សេចក្តី​ថ្លែង​ការណ៍​របស់​ក្រុម​អង្គការ​សង្គម​ស៊ីវិល​ទាំង​១៩​ ដែល​នាំ​មុខ​ដោយ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ ​(CCIM) ​និង​ដោយ​មាន​ការ​គាំទ្រ​ពី​អង្គការ​ Freedom ​House ​នៅ​ពេល​នេះ ​គឺ​ទី១ ​ចង់​ឲ្យ​អ្នក​ប្រើ​ប្រាស់​អ៊ីន​ធឺ​ណែតយ​ល់​ពី​សិទ្ធិ​ក្នុង​ការ​ប្រើ​ប្រាស់​អ៊ីនធឺណែត ​និង​ទី២ ​ចង់​ឲ្យ​រដ្ឋាភិបាល​ប្រើ​ប្រាស់​គោល​ការណ៍​ទាំង​៩​ចំណុច​នេះ ​ដើម្បី​ធ្វើ​ជា​មូល​​ដ្ឋាន​​នៃ​ការ​បង្កើត​សេចក្តី​ព្រាង​ច្បាប់​ស្តីពី​ឧក្រឹដ្ឋ​កម្ម​អ៊ីនធឺណែត ​ឬ ​(Cyber​ Crime) ​នៅ​ពេល​ខាង​មុខ។​
ក្រុម​អង្គការ​សង្គម​ស៊ីវិល​ទាំង​នេះ ​នឹង​បញ្ជូន​សេចក្តី​ថ្លែង​ការណ៍​គាំទ្រ​ទាំង​៩​ចំណុច​នេះ ​ទៅ​កាន់​ក្រសួង​មហាផ្ទៃ ​ក្រសួង​ប្រៃសនីយ៍​និង​ទូរគមនាគមន៍ ​និង ​ក្រសួង​ព័ត៌មាន ​នៅ​ពេល​ខាង​មុខ​។

គួរ​ជំរាប​ជូន​ថា ​បច្ចុប្បន្ន​នេះ ​ចំនួន​អ្នក​ប្រើ​ប្រាស់​អ៊ីនធឺណែត​នៅ​កម្ពុជា​ បាន​បន្ត​កើន​ឡើង​យ៉ាង​ឆាប់​រហ័ស ​ពោល​គឺ​ពី​ចំនួន​ជាង​៣​លាន​នាក់​នៅ​ឆ្នាំ​២០១៤​ បាន​កើន​ឡើង​ដល់​ជាង​៥​លាន​នាក់​នៅ​ឆ្នាំ​២០១៥៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI