កម្ពុជា-បោះឆ្នោត

លោក ញឹក ប៊ុនឆៃ នឹង​ធ្វើ​សមាជបក្ស​ដើម្បី​ត្រៀម​ខ្លួន​សម្រាប់​ការ​បោះឆ្នោត​ឆ្នាំ​ក្រោយ

លោក ញឹក ប៊ុន​ឆៃ ប្រធាន​​គណបក្ស​​ខ្មែរ​​រួប​រួម​​ជាតិ
លោក ញឹក ប៊ុន​ឆៃ ប្រធាន​​គណបក្ស​​ខ្មែរ​​រួប​រួម​​ជាតិ

បន្ទាប់​ពី​គណបក្ស​ប្រជាជន​ប្រកាស​ផ្ដាច់​សម្ពន្ធ​ភាព និង​ក្រោយ​ពី​សមាជិក​បក្ស​ដើរ​ចេញ​ដើម្បី​ទៅ​ចុះ​ចូល​គណបក្ស​ផ្សេង​រួច​មក លោក ញឹក ប៊ុន​ឆៃ ប្រធាន​គណបក្ស​ខ្មែរ​រួបរួម​ជាតិ នឹង​ធ្វើ​សមាជ លើក​ដំបូង​នៅថ្ងៃ​ទី​១២​សីហា ដើម្បី​ត្រៀម​ខ្លួន​សម្រាប់​ការបោះ​ឆ្នោត​ជាតិ​នៅ​ឆ្នាំ​ក្រោយ។

ផ្សាយពាណិជ្ជកម្ម

ជំហរ​របស់​គណបក្ស​ខ្មែរ​រួបរួម​ជាតិ គ្មាន​ឡើយ​ការ​រំលាយ​គណបក្ស ឬ​ចុះចូល​ជាមួយ​គណបក្ស​ផ្សេង។ នេះ​គឺ​ជា​ខ្លឹមសារ​ដែល​គណបក្ស​ខ្មែរ​រួបរួម​ជាតិ​នឹង​បញ្ជាក់​ទៅ​កាន់​អ្នក​គាំទ្រ​របស់​ខ្លួន​នៅ​ថ្ងៃទី១២​សីហា​ខាង​មុខ។ បន្ទាប់​ពី​បង្ហាញ​ជំហរ​ទាំងនេះ​ទៅ​កាន់​អ្នក​គាំទ្រ និង​សមាជិក​បក្ស​ហើយ គណបក្ស​ខ្មែរ​រួបរួម​ជាតិ​ប្រកាស​ប្រាប់​អ្នកគាំ​ឲ្យត្រៀម​ខ្លួន​សម្រាប់​ការបោះឆ្នោត​ជាតិ​នៅ​ឆ្នាំ​ក្រោយ​ដើម្បី​ប្រជែង​យក​តំណែង​ជា​តំណាង​រាស្ត្រ។ នេះ​បើ​តាម​គូស​បញ្ជាក់​របស់​លោក ម៉ៅ សុផាន់ណា ទី​ប្រឹក្សា​លោក ញឹក ប៊ុនឆៃ មក​កាន់​វិទ្យុ​បារាំង​នៅ​ថ្ងៃ​ច័ន្ទ​នេះ។

បន្ថែម​ពី​លើ​នេះ គណបក្ស​ខ្មែរ​រួបរួម​ជាតិ​នឹង​រៀបចំ​រចនា​សម្ព័ន្ធ​គណបក្ស​ឡើង​វិញ​តាម​រយៈ​ការ​ជ្រើសរើស​ប្រធាន អនុ​ប្រធាន​គណបក្ស និង​រៀបចំ​អគ្គ​លេខា​ធិការ​បក្ស។ បើតាម លោក ម៉ៅ សុផាន់ណា នៅ​ក្នុង​សមាជ​នោះ គណបក្ស​ខ្មែរ​រួបរួម​ជាតិ​នឹង​បញ្ជាក់​ជំហរ​ជាមួយ​អ្នកគាំទ្រ​ដើម្បី​ស្វែង​សមាសភាព​ពិត​ដែល​បន្ត​រស់នៅ​ជាមួយ​គណបក្ស​ខ្មែររួបរួម​ជាតិ។ លោក​បាន​ចាត់ទុក​អ្នក​ដើរ​ចេញ​ពី​គណបក្ស​ខ្មែរ​រួបរួមជាតិ​គឺ​សិទ្ធិ​នយោបាយ​របស់​បុគ្គល​ម្នាក់ៗ។ ប៉ុន្តែ​លោក​ក៏​មិន​ភ្លេច​រិះគន់​ចំពោះ​ការចាកចេញ​នេះដែរ​។

បើ​ពិនិត្យ​លើ​ភាពជាក់ស្ដែង​សមាជិក​គណបក្ស​ខ្មែរ​រួបរួមជាតិ​បាន​ចុះចូល​ជាមួយ​គណបក្ស ហ៊្វុន​ស៊ិន​ប៉ិច ដែល​មាន​ព្រះអង្គ​ម្ចាស់ នរោត្តម រណឬទ្ធ ជា​ប្រធាន។ តែ​គ្មាន​មន្ត្រីណា​ម្នាក់​អាច​បញ្ជាក់​បាន​ទេ​ថា មាន​អ្នកណា​ខ្លះ​បាន​ទៅចុះ​ចូល​ជាមួយ​គណបក្ស​សង្គ្រោះជាតិ​នោះ។

សូម​បញ្ជាក់​ថា សមាជ​គណបក្ស​ខ្មែរ​រួបរួមជាតិ​នឹង​ធ្វើ​នៅថ្ងៃ​ទី១២​សីហា​ខាង​មុខ​នេះបន្ទាប់​ពី កាល​ពី​ខែ​មិថុនា​កន្លង​ទៅ ព្រះ​មហា​ក្សត្រ​បាន​ឡាយ​ព្រះហស្ត​លេខា​លើ​ព្រះរាជ​ក្រឹត្យ បញ្ឈប់​តំណែង​សមាជិក ៥​រូប នៃ​គណបក្ស​ខ្មែរ​រួប​រួម​ជាតិ ពី​តួ​នាទី​ ​ទី​ប្រឹក្សា​ក្រសួង​មួយ​ចំនួន និង​អនុរដ្ឋ​លេខា​ធិការ បន្ថែម​ពី​លើ​ការ​ដក​តួនាទី​លោក ញឹក ប៊ុនឆៃ ​ជា​ទីប្រឹក្សា​រដ្ឋាភិបាល​ដែល​មាន​ឋានៈ​ស្មើ​ឧប​នាយក​រដ្ឋ​មន្ត្រី។

ការ​ដក​ដំណែង​លោក​ញឹក ប៊ុនឆៃ​ពេល​នោះ បាន​ធ្វើ​ឡើង​បន្ទាប់​ពី​មាន​ការ​សង្ស័យ​ថា មេ​ដឹក​នាំ​គណបក្ស​ខ្មែរ​រួប​រួម​ជាតិ​រូប​នេះ មាន​ជាប់​ពាក់​ព័ន្ធ​នឹង​កិច្ច​សន្ទនា​តាម​ទូរស័ព្ទ​ជាមួយ​មន្ត្រី​បក្ស​ប្រឆាំង​ក្នុង​អំឡុង​ពេល​មាន​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ សង្កាត់​កន្លង​ទៅ ក៏​ប៉ុន្តែ​លោក ញឹក ប៊ុនឆៃ ធ្វើ​ការ​បដិសេធ​ថា​ជា​ព័ត៌មាន​ភ័ន្ត​ច្រឡំ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI