កម្ពុជា-នយោបាយ

បក្ស​ប្រឆាំង​កំពុង​ធ្វើ​បច្ចុប្បន្ន​ភាព​ចំនួន​មន្រ្តី​ដែល​ចុះ​ចូល​បក្ស​កាន់​អំណាច ដើម្បី​ដាក់​អ្នក​ថ្មី​ជំនួស

លោក សុន ឆ័យ ប្រធាន​ក្រុម​តំណាង​រាស្រ្ត និង​ជា​អ្នក​នាំ​ពាក្យ​របស់​គណបក្ស​សង្រ្គោះ​ជាតិ
លោក សុន ឆ័យ ប្រធាន​ក្រុម​តំណាង​រាស្រ្ត និង​ជា​អ្នក​នាំ​ពាក្យ​របស់​គណបក្ស​សង្រ្គោះ​ជាតិ REUTERS

ស្រប​ពេល​មន្រ្តី​បក្ស​សង្រ្គោះ​ជាតិ​កំពុង​បន្ត​ទៅ​ចុះ​ចូល​ជាមួយ​បក្ស​ប្រជាជន​កម្ពុជា​តាម​ការ​ដង្ហោយ​ហៅ​របស់​លោក​នាយក​រដ្ឋមន្រ្តី​ហ៊ុន សែន នៅ​ពេល​នេះ​គណបក្ស​ប្រឆាំង​កំពុង​តែ​ត្រួត​ពិនិត្យ និង​ផ្ទៀង​ផ្ទាត់ ថា​តើ​មាន​មន្រ្តី​របស់​ខ្លួន​ចំនួន​ប៉ុន្មាន​នាក់​ពិត​ប្រាកដ ដែល​ទៅ​ចុះ​ចូល​ជាមួយ​បក្ស​កាន់​អំណាច។ បើ​តាម​បក្ស​ប្រឆាំង បន្ទាប់​ពី​ទទួល​បាន​តួលេខ​ផ្លូវ​ការ ​គឺ​មន្រ្តី​ទាំង​នោះ​នឹង​ត្រូវ​លុប​ឈ្មោះ​ចេញ​ពី​បក្ស ដក​ចេញ​ពី​តំណែង​​នា​ពេល​បច្ចុប្បន្ន ហើយ​ដាក់​អ្នក​ថ្មី​ជំនួស​វិញ។

ផ្សាយពាណិជ្ជកម្ម

លោក​សុន ឆ័យ ប្រធាន​ក្រុម​តំណាង​រាស្រ្ត និង​ជា​អ្នក​នាំ​ពាក្យ​របស់​គណបក្ស​សង្រ្គោះ​ជាតិ បាន​បញ្ជាក់​ឲ្យ​ដឹង​ថា មក​ដល់​ពេល​នេះ គណបក្ស​ប្រឆាំង​បាន​រក​ឃើញ​ជា​បឋម ថា​មាន​មន្រ្តី និង​សមាជិក​ក្រុម​ប្រឹក្សា​របស់​ខ្លួន​ប្រមាណ​ជា​៥៨​រូប​ហើយ ដែល​បាន​ទៅ​ចុះ​ចូល​ជាមួយ​គណបក្ស​ប្រជាជន​កម្ពុជា។ ចំនួន​នេះ គឺ​ខុស​គ្នា​នឹង​អ្វី​ដែល​អះ​អាង​ដោយ​អ្នក​នាំ​ពាក្យ​គណបក្ស​កាន់​អំណាច និង​តួ​លេខ​របស់​សារព័ត៌មាន​អនឡាញ Freshnews។ អ្នក​នាំ​ពាក្យ​បក្ស​កាន់​អំណាច​ថា មន្ដ្រី​បក្ស​ប្រឆាំង​ចុះ​ចូល​បក្ស​កាន់​អំណាច់​មាន​ដល់​ទៅ​ជាង​១០០​នាក់។ ចំណែក​សារព័ត៌មាន​អនឡាញ​Freshnews ដែល​ជា​បណ្តេញ​ព័ត៌មាន​ស្និត​នឹង​រដ្ឋាភិបាល​កម្ពុជា បង្ហាញ​ថា មាន​ជាង​៨០​នាក់។

សម្រាប់​អ្នក​នាំ​ពាក្យ​គណបក្ស​សង្រ្គោះ​ជាតិ ​នៅ​ពេល​ដែល​គណបក្ស​សរុប​បាន​ជា​ផ្លូវ​ការ​នូវ​ចំនួន​មន្រ្តី​ដែល​ទៅ​ចុះ​ចូល​ជា​មួយ​គណបក្ស​កាន់​អំណាច​នោះ គឺ​គណបក្ស​នឹង​អនុវត្ត​ទៅ​នីតិវិធី ដោយ​លុប​ឈ្មោះ​ពួក​គេ​ចេញ​ពី​បញ្ជី​បក្ស និង​ឈាន​ទៅ​ដក​តំណែង​ក្នុង​នាម​តំណាង​ឲ្យ​គណបក្ស​ថែម​ទៀត ប្រសិន​បើ​គណបក្ស​សង្រ្គោះ​ជាតិ​មិន​ត្រូវ​បាន​រំលាយ។ ជោគ​វាសនា​បក្ស​ប្រឆាំង​នឹង​ត្រូវ​សម្រេច​នៅ​ថ្ងៃ​ទី​១៦ វិច្ឆិកា​ខាង​មុខ​នេះ ជា​ថ្ងៃ​ដែល​តុលាការ​កំពូល​បើក​សវនាការ​ជំនុំ​ជម្រះ ថា​តើ​ត្រូវ​រំលាយ​គណបក្ស​សង្រ្គោះ​ជាតិ​ចោល​ឬ​យ៉ាង​ណា។ ប៉ុន្តែ​មុន​សវនាការ​មក​ដល់ លោក​នាយក​រដ្ឋមន្រ្តី​ហ៊ុន សែន​ដែល​ជា​ប្រមុខ​គណបក្ស​ប្រជាជន​កម្ពុជា បាន​បញ្ជាក់​ក្តែងៗ​រួច​ទៅ​ហើយ​ថា គណបក្ស​សង្រ្គោះ​ជាតិ​នឹង​ត្រូវ​រំលាយ​ចោល។

លោក​សុខ ឥសាន អ្នក​នាំ​ពាក្យ​គណបក្ស​ប្រជាជន​កម្ពុជា​បាន​គូស​បញ្ជាក់​ថា ប្រសិន​បើ​គណបក្ស​សង្រ្គោះ​ជាតិ​ត្រូវ​បាន​រំលាយ នោះ​សមាសភាព​តំណាង​រាស្ត្រ និង​សមាជិក​ក្រុម​ប្រឹក្សា​ចេញ​ពី​គណបក្ស​ប្រឆាំង​នឹង​ត្រូវ​អស់​សុពលភាព​ដោយ​ស្វ័យ​ប្រវត្តិ ។ ដូច្នេះ គណបក្ស​ប្រឆាំង​មិន​មាន​លទ្ធភាព​យក​សមាសភាព​របស់​គណបក្ស​មក​ជំនួស​តាម​លេខ​រៀង​បន្ត​បន្ទាប់​នោះ​ទេ។ ទាំង​លោក​សុខ ឥសាន និង​លោក​នាយក​រដ្ឋមន្រ្តី​ហ៊ុន សែន​សុទ្ធ​តែ​បាន​អំពាវនាវ​ឲ្យ​មន្រ្តី​គណបក្ស​សង្រ្គោះ​ជាតិ​មក​ចុះ​ចូល​ជាមួយ​គណបក្ស​ប្រជាជន​កម្ពុជា ដើម្បី​រក្សា​តំណែង​របស់​ខ្លួន។

បើ​ទោះ​បី​មាន​ការ​អំពាវនាវ​ដូច្នេះ​និង​មាន​មន្រ្តី​ខ្លះ​របស់​ខ្លួន​បាន​ទៅ​ចុះ​ចូល​ជាមួយ​គណបក្ស​កាន់​អំណាច​រួច​ទៅ​ហើយ​ក៏​ដោយ ក៏​គណបក្ស​សង្រ្គោះ​ជាតិ​មិន​ព្រួយ​បារម្ភ​នោះ​ឡើយ។ មិន​ព្រួយ​បារម្ភ បើ​តាម​លោក​សុន ឆ័យ មន្រ្តី​បក្ស​ប្រឆាំង​ដែល​ទៅ​ចុះ​ចូល​ជាមួយ​ប្រជាជន​កម្ពុជា​នោះ គឺ​មាន​ចំនួន​តិច​តួច​តែ​ប៉ុណ្ណោះ។ លោក​ថែម​អះ​អាង​ទៀត​ថា គណបក្ស​សង្រ្គោះ​ជាតិ​នៅ​តែ​មាន​សាមគ្គី​ភាព​ដដែល៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI