ការិយាល័យសិទ្ធិមនុស្សអ.ស.ប ទាមទារឲ្យដោះលែងមន្ដ្រីអាដហុកនិងអគ្គលេខាធិការរង គ.ជ.ប
ចុះផ្សាយនៅថ្ងៃ៖
ការិយាល័យសិទ្ធិមនុស្សនៃអង្គការសហប្រជាជាតិ បានទាមទារឲ្យរដ្ឋាភិបាលកម្ពុជា ដោះលែងមន្ដ្រីអាដហុកទាំង៤រូប និងអគ្គលេខាធិការរង គ.ជ.ប ១រូប ដែលត្រូវបានតុលាការឃុំខ្លួនបណ្ដោះអាសន្នអស់ពេលមួយឆ្នាំមកហើយ។ ការទាមទារនេះ ធ្វើឡើងតាមរយៈសេចក្ដីថ្លែងការណ៍មួយ ចុះថ្ងៃសុក្រ ទី២៨មេសា ម្សិលមិញ។
ថ្លែងការណ៍ពីទីក្រុងហ្សឺណែវ លោកស្រី Elizabeth Throssel អ្នកនាំពាក្យការិយាល័យសិទ្ធិមនុស្សនៃអង្គការសហប្រជាជាតិ បានសម្ដែងការសោកស្ដាយដែលមន្ដ្រីអាដហុកទាំង៤រូប និងអគ្គលេខាធិការរង គជប មួយរូប ត្រូវបានឃុំខ្លួនបណ្ដោះអាសន្នអស់ពេលមួយឆ្នាំ ហើយនៅថ្ងៃទី២៧មេសា នីតិវិធីនៃការឃុំខ្លួននោះ ត្រូវតុលាការសម្រេចអូសបន្លាយ៦ខែទៀត។ ការិយាល័យសិទ្ធិមនុស្សនៃអង្គការសហប្រជាជាតិ បានទាមទារឲ្យរដ្ឋាភិបាលកម្ពុជា ដោះលែងជនត្រូវចោទទាំង៥ ព្រោះសម្រាប់ស្ថាប័នអន្ដរជាតិមួយនេះ ការឃុំខ្លួនមន្ដ្រីសិទ្ធិមនុស្សពីសំណាក់តុលាការដូច្នេះជាសកម្មភាពបំពាន ដែលធ្វើតាមតែអំពើចិត្ត។
សូមជម្រាបថា នេះមិនមែនជាលើកដំបូងទេ ដែលអង្គការសហប្រជាជាតិទាមទារឲ្យដោះលែងមន្ដ្រីសិទ្ធិមនុស្សទាំង៥។ នៅក្នុងខែវិច្ឆិកាឆ្នាំ២០១៦ ក្រុមការងារអង្គការសហប្រជាជាតិបានសន្និដ្ឋានថា បុគ្គលទាំងប្រាំរូប ត្រូវជាប់ឃុំដោយសារការអនុវត្តសិទ្ធិសេរីភាពរបស់ពួកគេ ហើយក្រុមការងារនេះបានទាមទារឲ្យដោះលែងអ្នកទាំង៥ម្ដងរួចមកហើយ។ សម្រាប់អ្នកជំនាញរបស់អង្គការសហប្រជាជាតិ សំណុំរឿងព្រហ្មទណ្ឌលើអ្នកទាំង៥នេះ គឺជាលេសមួយ ដើម្បីបង្ក្រាបនិងទប់ស្កាត់ការអនុវត្តដោយស្របច្បាប់នូវសិទ្ធិសេរីភាពនៃការបញ្ចេញមតិ និងដើម្បីបំបិទសំឡេងអ្នកការពារសិទ្ធិមនុស្ស។
ថ្វីត្បិតតែមិនពេញចិត្តចំពោះការឃុំខ្លួនបណ្ដោះអាសន្នមន្ដ្រីអាដហុកទាំង៤និងអគ្គលេខាធិការរង គ.ជ.ប ប៉ុន្តែការិយាល័យសិទ្ធិមនុស្សនៃអង្គការសហប្រជាជាតិ បានទទួលស្គាល់កាត្វកិច្ចរបស់ចៅក្រមស៊ើបអង្កេត ក្នុងសំណុំរឿងនេះ។ យ៉ាងណាក៏ដោយ ស្ថាប័នអន្ដរជាតិនេះលើកឡើងថា ការឃុំខ្លួនបណ្ដោះអាសន្ន គួរតែត្រូវបានអនុញ្ញាតតែសម្រាប់ពេលដ៏ចាំបាច់និងខ្លីបំផុត ដោយផ្អែកលើមូលដ្ឋាននៃភស្តុតាងច្បាស់លាស់។
គួររំលឹកថា មន្ដ្រីការពារសិទ្ធិមនុស្សទាំង៤រូប រួមមាន លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី ត្រូវបានតុលាការក្រុងភ្នំពេញចោទប្រកាន់ពីបទសូកប៉ាន់សាក្សី ក្នុងសំណុំរឿងអាស្រូវស្នេហារវាងលោក កឹម សុខា និងនាង ស្រីមុំ។ រីឯលោក នី ចរិយា ដែលជាអគ្គលេខាធិការរង គជប វិញ ត្រូវបានតុលាការចោទប្រកាន់ពីបទ សមគំនិតសូកប៉ាន់សាក្សី ក្នុងសំណុំរឿងដូចគ្នា។ រហូតមកទល់ពេលនេះ អ្នកទាំង៥ត្រូវបានឃុំខ្លួនបណ្ដោះអាសន្នអស់រយៈពេលពេញមួយឆ្នាំហើយ។ អំឡុងពេលឃុំខ្លួនមួយឆ្នាំពេញនេះ មេធាវីអ្នកទាំង៥បានស្នើសុំនៅក្រៅឃុំចំនួន៦លើក ប៉ុន្តែត្រូវបានតុលាការបដិសេធ។ កាលពីថ្ងៃទី២៧មេសាថ្មីៗនេះ ចៅក្រមស៊ើបសួរបានសម្រេចឃុំខ្លួនអ្នកទាំង៥ជាបណ្ដោះអាសន្នរយៈពេល៦ខែទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ