អានតួអត្ថបទ
កម្ពុជា-ច្បាប់

​កម្មករ​រោង​ចក្រ​ប្រមាណ​២០០​នាក់ តវ៉ា​រឿង​រោង​ចក្រ​បណ្តេញ​សហជីព​មូល​ដ្ឋាន​

កម្មកររោងចក្រប្រមាណ២០០នាក់ តវ៉ារឿងរោងចក្របណ្តេញសហជីពមូលដ្ឋាន
កម្មកររោងចក្រប្រមាណ២០០នាក់ តវ៉ារឿងរោងចក្របណ្តេញសហជីពមូលដ្ឋាន @RFI
ដោយ៖ សឿង ភារៈ
4 នាទី

នៅ​ថ្ងៃ​ទី២៥ ខែធ្នូ កម្មករ​រោង​ចក្រ​ប្រេ​ស្ទិច នៅ​ស្រុក​កណ្តាល​ស្ទឹង ខេត្ត​កណ្តាល បាន​លើក​គ្នា​ប្រមាណ​២០០​នាក់​មក​តវ៉ា បន្ទាប់​ពី​មាន​ការ​បណ្តេញ​សហ​ជីព​ប្រចាំ​ក្នុង​រោងចក្រ​ខាង​លើ​នេះ ចេញ​ពី​ការងារ​។ នេះ​បើ​តាម​ការ​អះ​អាង​របស់ លោក ប៉ាវ ស៊ីណា ប្រធាន​សហភាព​ចលនា​កម្មករ​កម្ពុជា​។ គិត​រហូត​មក​ដល់​ពេល​នេះ មិន​ទាន់​មាន​ដំណោះ​ស្រាយ​ណា​មួយ​ត្រូវ​បាន​ធ្វើ​ឡើង​តាម​ការ​ទាម​ទារ​របស់​កម្មករ​នៅ​ឡើយ​ទេ​។ 

ផ្សាយពាណិជ្ជកម្ម

លោក ប៉ាវ ស៊ីណា ប្រធាន​សហភាព​ចលនា​កម្មករ​កម្ពុជា​បាន​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​ទី២៥ ខែធ្នូ​នេះ ថា មូល​ហេតុ​ដែល​បណ្តាល​ឲ្យ​កម្មករ​លើក​គ្នា​មក​តវ៉ា​នេះ គឺ​កើត​ឡើង​បន្ទាប់​ពី​រោង​ចក្រ​ប្រេស្ទិច បាន​បញ្ឈប់​តំណាង​សហជីព​មួយ​រូប​នៅ​ក្នុង​រោង​ចក្រ កាល​ពី​ថ្ងៃសៅរ៍ ទី២២ ខែធ្នូ​កន្លង​ទៅ​។ ការ​បញ្ឈប់​តំណាង​សហ​ជីព ដោយ​សារ​រោង​ចក្រ ខាង​លើ​នេះ​មិន​ចង់​ឲ្យ​មាន​សហជីព​នៅ​ក្នុង​រោងចក្រ​។

ប្រធាន​សហភាព​ចលនា​កម្មករ​កម្ពុជា​បាន បាន​អះអាង​ថា​ចាប់​តាំង​ពី​ការ​តវ៉ា​កើត​ឡើង កាល​ពី​ថ្ងៃ​ទី២៤ ខែធ្នូ​រហូត​មក​ដល់​ថ្ងៃទី​២៥ ខែ​ធ្នូ​នេះ មិន​ទាន់​ឃើញ​មាន​មន្ត្រី​ពាក់​ព័ន្ធ​ណា​ចុះ​មក​ដោះ​ស្រាយ​ឲ្យ​ទាន់​ពេល​វេលា​នោះ​ទេ​។ លោក​បញ្ជាក់​ថា ការ​តវ៉ា​ហាក់​ដូចជា​គ្មាន​អ្នក​ចាប់​អារម្មណ៍​ចុះ​អន្តរាគមន៍​ដោះ​ស្រាយ​សោះ​។

យោង​តាម​លិខិត​ផ្ទេរ​សិទ្ធិ​ចុះ​ថ្ងៃ​ទី២៤ ខែធ្នូ បាន​ស្នើ​សុំ​ឲ្យ​មាន​ការ​ជួយ​ដោះស្រាយ​លើ​បញ្ហា​ចំនួន​១០​ចំណុច​។ ចំណុច​ទាំង​នោះ​រួម​មាន ស្នើ​ឲ្យ​រោងចក្រ​ខាង​លើ​ទទួល​យក​ប្រធាន​សហជីព​ចលនា​កម្មករ​ប្រចាំ​រោងចក្រ​ចូល​មក​ធ្វើ​ការ​វិញ, ក្រុម​ហ៊ុន​ត្រូវ​ធ្វើ​កាត ប.ស.ស ឲ្យ​កម្មករ, ក្រុមហ៊ុន​មិន​ត្រូវ​កាត់​លុយ​កម្មករ នៅ​ពេល​កម្មករ​ដាក់​ច្បាប់​កន្លះ​ថ្ងៃ, នៅ​ពេល​កម្មករ ឈឺ មាន​សំបុត្រ​ពេទ្យ​ត្រឹម​ត្រូវ ក្រុមហ៊ុន​ត្រូវ​រក្សា​ប្រាក់​ឈ្នួល​ឲ្យ​កម្មករ, ក្រុមហ៊ុន​មិន​ត្រូវ​រើស​អើង​សហជីព​ចលនា​កម្មករ​គ្រប់​រូបភាព, រួម​ទាំង​ចំណុច​មួយ​ចំនួន​ទៀត​។

លោក ប៉ាវ ស៊ីណា ប្រធាន​សហភាព​ចលនា​កម្មករ​កម្ពុជា​បាន​អំពាវនាវ​ឲ្យ​ស្ថាប័ន​ពាក់​ព័ន្ធ​ត្រូវ​ពន្លឿន​ការ​ដោះស្រាយ​លើ​ការ​តវ៉ា​របស់​កម្មករ​នា​ពេល​នេះ ហើយ​បញ្ឈប់​ការ​បណ្តែត​បណ្តោយ​ឲ្យ​ក្រុម​ហ៊ុន​ខាង​លើ​នេះ​រំលោភ​សិទ្ធិ​ការងារ​របស់​កម្មករ​តទៅ​ទៀត​។ បើ​គ្មាន​ដំណោះ​ស្រាយ​ពី​ស្ថាប័ន​ពាក់ព័ន្ធ​ទេ នោះ​កម្មករ​នៅ​ក្នុង​រោចក្រ ប្រេស្ទិច នឹង​រង​ការ​ធ្វើ​ទុក្ខ​បុក​ម្នេញ និង​រំលោភ​សិទ្ធិ​បន្ត​ទៀត​។

លោក ប៉ាវ ស៊ីណា បាន​កត់​សម្គាល់​ឃើញ​ថា​ករណី​រំលោភ​សិទ្ធិ​សហជីព​នៅ​មូល​ដ្ឋាន​នៅ​តែ​កើត​មាន​ជា​បន្ត​បន្ទាប់ បើ​ទោះ​បី​ជា​ថ្មីៗ​នេះ​មាន​ការ​ជំរុញ​ពី​ប្រមុខ​រដ្ឋាភិបាល​ឲ្យ​ពន្លឿន​នូវ​ដំណោះ​ស្រាយ​លើ​មេដឹក​នាំ​សហ​ជីព​ក៏​ដោយ​។

សូម​ជម្រាប​ជូន​ថា​កាល​ពី​ថ្ងៃ​ទី៣ ខែធ្នូ រដ្ឋា​ភិបាល​បាន​ចេញ​សេចក្តី​ថ្លែង​ការណ៍​មួយ​ដោយ​ក្នុង​នោះ​បាន​បញ្ជាក់​ថា​រដ្ឋាភិបាល​បាន​ដាច់​ចេញ​នូវ​វិធានការ​មួយ​ចំនួន ដើម្បី​ដោះ​ស្រាយ​បញ្ហា​ពាក់​ព័ន្ធ​នឹង​សិទ្ធិ​ការងារ និង​សហជីព​។ ក្រៅ​ពី​នេះ​ក្រសួង​ការងារ​កម្ពុជា​នឹង​បង្កើត​ក្រុម​ការងារ​មួយ ដើម្បី​រៀប​ចំ​វេទិកា​ពិគ្រោះ​យោបល់​ជាមួយ​សហជីព ព្រម​ទាំង​ភាគី​ពាក់ព័ន្ធ ក្នុង​ការ​ដោះ​ស្រាយ​បញ្ហា​ប្រឈម​ដែល​កំពុង​កើត​មាន​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ