កម្ពុជា-ហ្វីលីពីន

បញ្ហា​សមុទ្រ​ចិន​ខាង​ត្បូង​អាច​នឹង​លើក​ឡើង​ក្នុង​កិច្ច​ពិភាក្សា​ទ្វេភាគី​រវាង​រដ្ឋាភិបាល​ហ្វីលីពីន​ និង​កម្ពុជា

មេដឹកនាំហ្វីលីពីន នឹងធ្វើដំណើរទស្សនកិច្ចផ្លូវការលើកទីមួយ មកកម្ពុជា ចាប់ពីថ្ងៃទី ១៣ ស្អែកនេះ ដល់ថ្ងៃទី ១៤ ខែ ធ្នូ។
មេដឹកនាំហ្វីលីពីន នឹងធ្វើដំណើរទស្សនកិច្ចផ្លូវការលើកទីមួយ មកកម្ពុជា ចាប់ពីថ្ងៃទី ១៣ ស្អែកនេះ ដល់ថ្ងៃទី ១៤ ខែ ធ្នូ។ REUTERS/Erik De Castro

បញ្ហា​សមុទ្រ​ចិន​ខាង​ត្បូង​ដ៏​ចម្រូង​ចម្រាស់ ត្រូវ​បាន​រំពឹង​ថា​នឹង​លើក​ឡើង​នៅ​ក្នុង​ជំនួប​ពិភាក្សា​ទ្វេ​ភាគី​រវាង​ប្រធានាធិបតី​ហ្វីលីពីន លោក រ៉ូឌ្រីហ្គូ ឌុយទែរតេ និង​លោក នាយក​រដ្ឋ​មន្រ្តី ហ៊ុន សែន។ មេដឹកនាំ​ហ្វីលីពីន នឹង​ធ្វើ​ដំណើរ​ទស្សន​កិច្ច​ផ្លូវ​ការ​លើក​ទីមួយ មក​កម្ពុជា ចាប់​ពី​ថ្ងៃ​ទី ១៣ ស្អែក​នេះ ដល់​ថ្ងៃ​ទី ១៤ ខែ ធ្នូ។ ក្រៅ​ពី​នេះ នៅ​ក្នុង​ដំណើរ​ទស្សន​កិច្ច ភាគី​ទាំង​ពីរ ក៏​គ្រោង​នឹង​ពិភាក្សា ទំនាក់​ទំនង​ការ​ទូត និង​ពាណិជ្ជកម្ម​ផង​ដែរ។ ជា​ការ​កត់​សម្កាល់ នៅ​ព្រឹក​ថ្ងៃ​ចន្ទ​នេះ ជនជាតិ​ហ្វីលីពីន​នៅ​កម្ពុជា មួយ​ក្រុម​បាន​នាំ​គ្នា​តវ៉ា​នៅ​មុខ​ព្រះ​បរមរាជ​វាំង ប្រឆាំង​នឹង​សង្គ្រាម​បង្ក្រាប​គ្រឿងញៀន​របស់​លោក ឌូទែរតេ ដែល​សម្លាប់​ឧក្រិដ្ឋជន​អស់​ច្រើន​ជាង​បី​ពាន់​នាក់​មក​ហើយ​នោះ​។

ផ្សាយពាណិជ្ជកម្ម

អ្នក​នាំ​ពាក្យ​ក្រសួង​ការ​បរទេស​ហ្វីលីពីន បាន​ឲ្យ​ដឹង​នៅ​ក្នុង​សន្និសីទ​សារព័ត៌មាន នា​វិមាន Malacanang ថា​ប្រធានាធិបតី​ហ្វីលីពីន ឌុយទែរតេ នឹង​លើក​យក​បញ្ហា​សមុទ្រ​ចិន​ខាង​ត្បូង ទៅ​ពិភាក្សា​ជាមួយ​នឹង​លោក​នាយក​រដ្ឋ​មន្រ្តី​ហ៊ុន សែន ដើម្បី​បង្ហាញ​ពី​ការ​ប្តេជ្ញា​ចិត្ត​របស់​ហ្វីលីពីន​ក្នុង​ការ​ដោះស្រាយ​ជម្លោះ​សមុទ្រ​ចិន​ខាង​ត្បូង​ដ៏​រ៉ាំរ៉ៃ​មួយ​នេះ​ ដោយ​សន្តិវិធី​ និង​អនុលោម​ទៅ​តាម​វិធាន​ច្បាប់។

សូម​បញ្ជាក់​ថា ពាក់​ព័ន្ធ​នឹង​ជម្លោះ​សមុទ្រ​ចិន​ខាង​ត្បូង​នេះ សមាគម​អាស៊ាន មិន​អាច​ចេញ​សេចក្តី​ថ្លែង​ការណ៍​រួម​បាន ដោយ​លើក​ទីមួយ​ គឺ​នៅ​ឆ្នាំ ២០១២ ដែល​មាន​កិច្ច​ប្រជុំ​កំពូល​នៅ​កម្ពុជា និង​លើក​ទី​ពីរ នៅ​ឆ្នាំ ២០១៦ ​គឺ​កិច្ច​ប្រជុំ​ដែល​ធ្វើ​ឡើង​នៅ​ប្រទេស​ឡាវ។

រដ្ឋសភា​កម្ពុជា​បាន​ផ្ញើ​លិខិត​ទៅ​កាន់​ប្រធាន​អន្តរសភាAIPA ដើម្បី​មិន​ឱ្យ​លើក​យក​បញ្ហា​សមុទ្រ​ចិន​ខាង​ត្បូង​ដ៏​ចម្រូង​ចម្រាស់​ដាក់​ក្នុង​របៀប​វារៈ​នៃ​កិច្ច​ប្រជុំ​របស់​សភា​អាស៊ាន​ នៅទីក្រុងវៀងច័ន្ទ ប្រទេស​ឡាវ កាល​ពី​ខែ កក្កដា ក្រោម​ហេតុផល រដ្ឋ​ធម្មនុញ្ញ​អាស៊ាន ​មិន​អនុញ្ញាត​ឲ្យ​សមាជិក​របស់​ខ្លួន យក​បញ្ហា​ប្រទេស​ជា​សមាជិក​ដទៃ​មក​ជជែក​វែក​ញែក​នៅ​ក្នុង​ការ​ប្រជុំ​នោះ​ទេ។

ជាមូលហេតុ​ដែល​ជម្រុញ​ឲ្យ​សមាគម​ប្រជាជាតិ​អាស៊ី​អាគ្នេយ៍ (អាស៊ាន) បាន​បរាជ័យ​ក្នុង​ការ​ចេញ សេចក្តី​ថ្លែងការណ៍​រួម ពាក់ព័ន្ធ​សេចក្តី​សម្រេច​តុលាការ​ក្រុង​ឡាអេ​ឡើយ។ សមាជិក​អាស៊ាន​ទាំង​ ១០​ប្រទេស​បាន​ជៀស​វាង​មិន​និយាយ​សោះ​ឡើយ​ ពី​សាល​ដីកា​តុលាការ​មជ្ឈត្តិ​កម្ម​អចិន្ត្រៃយ៍​ទីក្រុង​ឡាអេ​លើ​សំណុំ​រឿង​ជម្លោះនៅ​សមុទ្រ​ចិន​ខាង​ត្បូង ​ដែល​សាល​ដីកា​ទាត់​ចោល​ការ​ទាមទារ​របស់​ចិន​ ហើយ​ឲ្យ​ហ្វីលីពីន​ឈ្នះ ​កាល​ពី​ថ្ងៃទី​១២ ​ខែ​កក្កដា។​ ​​

សូម​បញ្ជាក់​ថា​ប្រទេស​ជា​សមា​ជិក​អាស៊ាន​៤ ​រួម​មាន​ហ្វីលីពិន​ ម៉ាឡេស៊ី ប្រ៊ុយណេ ​និង​វៀតណាម កំពុង​តែមាន​ជម្លោះ​ដែន​ទឹក​ជា​មួយ​នឹង​មហា​យក្សចិន​នៅ​សមុទ្រ​ចិន​ខាង​ត្បូង​។ ភាគ​ច្រើន​នៃ​សមាជិក​របស់​​អាស៊ានគឺ​ចង់​ឲ្យ​មាន​ការ​ដាក់​សម្ពាធ​ណាមួយ​ទៅ​លើ​ប្រទេស​ចិន​ជុំវិញ​ការ​សាង​កោះ​ក្នុង​តំបន់​ជម្លោះ។​ ប៉ុន្តែ​សហគមន៍​អាស៊ាន​ដំណើរ​ការ​ទៅ​បាន​អាស្រ័យ​ដោយ​ការ​មូល​មតិ​គ្នា​រវាង​សមាជិក​ទាំង​អស់ ​ដូច្នេះ​ប្រទេស​ណាមួយ​ ដែល​ជា​សមាជិក​អាច​មាន​សិទ្ធិ​បោះឆ្នោត​ប្រឆាំង​នៅ​នឹង​សេចក្តី​សម្រេច​ណា​មួយ​ប្រសិន​បើ​ខ្លួន​មិន​ពេញ​ចិត្ត។​

ក្រៅពី​នេះ នៅ​ក្នុង​ដំណើរ​ទស្សនកិច្ច​ផ្លូវ​រដ្ឋ​មក​កម្ពុជា ជា​លើក​ទី​មួយ​របស់​លោក ឌុយទែរតេ បន្ទាប់​ពី​បាន​ឡើង​កាន់​អំណាច ដែល​ត្រូវ​បាន​ពិភព​លោក ស្គាល់​តាម​រយៈ​យុទ្ធនាការ​បង្រ្កាប​គ្រឿង​ញៀន​នៅ​ក្នុង​ប្រទេស​ហ្វីលីពីន ​ក៏​នឹង​មាន​ការ​ចុះ​អនុស្សារណៈ​កិច្ច​ព្រម​ព្រៀង​កីឡា។ ការ​ជំនួប​ពិភាក្សា​ទ្វេ​ភាគី​នេះ ក៏​នឹង​លើក​ឡើង​ផង​ដែរ ពី​បញ្ហា​ទំនាក់​ទំនង​កិច្ច​ការពារ​ និង​សន្តិសុខ ពាណិជ្ជកម្ម​ទ្វេ​ភាគី កិច្ច​ការពារ​ពលករ​ហ្វីលីពីន-កម្ពុជា កិច្ច​សហប្រតិបត្តិការ​វប្បធម៌​ និង​ទេសចរណ៍ ជា​ដើម។

ក្រសួង​ការ​បរទេស​កម្ពុជា បាន​បញ្ជាក់​ថា អំឡុង​ទស្សន​កិច្ច នៅ​កម្ពុជា​រយៈ​ពេល​ ២​ថ្ងៃ​ខាង​មុខ​នេះ លោក រ៉ូឌ្រីហ្គោ ឌូទែរតេ នឹង​ចូល​ក្រាប​បង្គំ​គាល់​ព្រះ​មហាក្សត្រ​ខ្មែរ​ផង​ដែរ។

គួរ​ជម្រាប​ជូន​ថា បន្ទាប់​ពី​បញ្ចប់​ដំណើរ​ទស្សន​កិច្ច​នៅ​ក្នុង​ប្រទេស​កម្ពុជា រយៈពេល​ពីរ​ថ្ងៃ លោក រ៉ូឌ្រីហ្គូ ឌុយទែរតេ នឹង​បន្ត​ដំណើរ​ទៅ​ប្រទេស​សឹង្ហបុរី​រយៈ​ពេល​ ២​ថ្ងៃ​ទៀត ចាប់​ពី​ថ្ងៃ​ទី ១៥ ដល់​ថ្ងៃ​ទី ១៦ ខែ ធ្នូ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI