កម្ពុជា

ក្រសួង​ប្រៃសណីយ៍ បើក​ការ​ផ្សព្វ​ផ្សាយ​ពី​ច្បាប់​ស្តី​ពី​ទូរ​គមនាគមន៍ ក្រោយ​ទើប​បាន​អនុម័ត​ ២​ខែ

ច្បាប់ស្តីពីទូរគមនាគមន៍
ច្បាប់ស្តីពីទូរគមនាគមន៍ @RFI
១០ នាទី

ក្រោយ​ពី​ច្បាប់​ស្តី​ពី​ទូរគមនាគមន៍ ទើប​ត្រូវ​បាន​ព្រឹទ្ធសភា​ពិនិត្យ និង​អនុម័ត​ទាំង​ស្រុង កាល​ពី​ថ្ងៃ​ទី ៧​ធ្នូ ចុង​ឆ្នាំ ២០១៥រួច​មក -នៅ​ព្រឹក​ថ្ងៃអង្គារ​ ទី 0២​ខែកុម្ភៈនេះ ក្រសួង​ប្រៃសណីយ៍ និង​ទូរគមនាគមន៍ បាន​រៀប​ចំ​សិក្ខាសាលា​មួយ ដើម្បី​ផ្សព្វ​ផ្សាយ​ពី​ច្បាប់​នេះ ឲ្យ​បាន​ជ្រាប​ទៅ​ដល់​ក្រុម​ប្រតិបត្តិករ និង​បុគ្គល​ដែល​ពាក់​ព័ន្ធ​នឹង​វិស័យ​ទូរគមនាគមន៍។ លោក​ខូវ មករា អ្នក​នាំពាក្យ​ក្រសួង​ប្រៃសណីយ៍ និងទូរគមនាគមន៍ បាន​ប្រាប់​វិទ្យុ​បារាំង​ថា ច្បាប់​នេះ មាន​ខ្លឹមសារ​ជា​គន្លឹះ​សំខាន់ៗ ក្នុង​គោល​ដៅ​ផ្តល់ប្រយោជន៍​ទាំង​ដល់​ពលរដ្ឋទូទៅ និង​ក្រុម​ប្រត្តិបត្តិករ។ សូម​ស្តាប់​ប្រសាសន៍​របស់​លោក ខូវ មករា៖​ 

ផ្សាយពាណិជ្ជកម្ម

សូម​ជម្រាប​ជូន​លោក​អ្នក​ស្តាប់ថា ច្បាប់​ស្តីពី​ទូរគមនាគមន៍ មាន​សរុប ១៦ជំពូក និង​ ១១៤​មាត្រា។ ជំពូក​នីមួយ​ៗ​នៃ​ច្បាប់​នេះ មាន​និយាយ​ពី សមត្ថកិច្ច​របស់​ក្រសួង​ប្រៃសណីយ៍ និយ័តករ​ទូរគមនាគមន៍​កម្ពុជា លិខិត​អនុញ្ញាត វិញ្ញាបនបត្រ និង​អាជ្ញាបណ្ណ។ កាតព្វកិច្ច​សេវា​សកល ការ​កសាង​សមត្ថភាព​ ការ​ស្រាវជ្រាវ និងការ​អភិវឌ្ឍ។ ការ​គ្រប់​គ្រង​ធន​ធាន​វិសាល​គមន៍​ហ្វ្រកង់ន៍​វិទ្យុ។

ការ​កំណត់​ប្លង់​លេខទូរគមនាគមន៍​ជាតិ និង​អាសយដ្ឋានអេឡិក​ត្រូនិក ។ ថ្លៃ​សេវា​ទូរ​គមនា​គមន៍ និងការ​ប្រកួត​ប្រជែង។ សិទ្ធិ​របស់​ប្រតិបត្តិករ និង​អ្នក​ប្រើប្រាស់ និង​ទោសប្បញ្ញត្តិ ជាដើម។ គួរ​រម្លឹក​ផង​ដែរ​ថា កន្លង​មក​ក្រុមហ៊ុន​ទូរស័ព្ទ​មួយ នៅ​ក្នុង​ប្រទេស​កម្ពុជា ធ្លាប់​មាន​វិវាទ​រឿង​សេវា​ទូរគមនាគមន៍ និង​ការ​ប្រកួត​ប្រជែង​ផ្នែក​ទីផ្សារ ដោយ​សារ​បាន​ទំលាក់​ថ្លៃ​សេវា​​ទាប​បំផុត ដែល​ធ្វើ​ឲ្យ​មាន​ភាព​ចម្រូង​ចម្រាស់។ ដូច្នេះ​ច្បាប់នេះ នឹង​ការ​ពារ​ប្រត្តិបត្តិករ ឲ្យ​មានការ​ប្រកួត​ក្នុងទីផ្សារ​ ដោយ​សុក្រិត ហើយ​អ្នក​ល្មើស នឹង​ត្រូវ​ទទួល​ទោស ដែល​មាន​ចែង​ក្នុង​ច្បាប់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI