កម្ពុជា

សកម្មជន​បរិស្ថាន​ថា​​វត្តមាន​មន្ត្រី​ឧទ្យានុរក្ស បង្ក​ឲ្យ​មាន​បទ​ល្មើស​ព្រៃ​ឈើ​កាន់​តែ​ច្រើន​នៅ​តំបន់​ព្រៃ​ឡង់​

រូបភាព​ព្រៃឡង់ ​ថត​បាន​ពី​លើ​អាកាស។​
រូបភាព​ព្រៃឡង់ ​ថត​បាន​ពី​លើ​អាកាស។​ @Google

ក្រុម​ការងារ​ការពារ​បរិស្ថាន ចំនួន ៦​រូប រួម​មាន​ទាំង​វីរៈជន​ព្រៃឈើ និង​បរិស្ថាន​ពិភពលោក លោក​អ៊ូច ឡេង​ ផងនោះ ត្រូវ​បាន​ក្រុម​ឧទ្យានុរក្ស​បរិស្ថាន ក្នុង​តំបន់​ការពារ​បរិស្ថាន​ព្រៃឡង់​ ស្រុក​ជ័យ​សែន ខេត្ត​ព្រះវិហារ ហាម​មិន​ឲ្យ​ចូល​ដាក់​ស្លាក និង​បដា «សូម​ជួយ​រក្សា​ព្រៃឈើ» កាល​ពី​ព្រឹក​ថ្ងៃ​អាទិត្យ ទី ២៦​វិច្ឆិកា​ម្សិលមិញ។ ក្រុម​សកម្មជន​បរិស្ថាន​ដែល​ត្រូវ​បាន​រារាំងនោះ​ យល់​ថា នេះ​គឺ​ជា​សកម្មភាព​ខុសច្បាប់​ ដើម្បី​លាក់​បាំង​រូបភាព​ពុករលួយ​របស់​មន្ត្រី​ឧទ្យានុរក្ស​មួយ​ចំនួន។ ប៉ុន្តែ​មន្ត្រី​ឧទ្យានុរក្ស បញ្ជាក់​ថា នេះ​គឺ​ជា​ការ​ធ្វើ​តាម​ច្បាប់ និង​ដើម្បី​រក្សា​សណ្តាប់​ធ្នាប់​ក្នុង​តំបន់​ព្រៃ​អភិរក្ស​ប៉ុណ្ណោះ​។

ផ្សាយពាណិជ្ជកម្ម

លោក​ ហេង ស្រស់ សមាជិក​ក្រុម​តំណាង​និស្សិត​ឯករាជ្យ​ដើម្បីធ្វើការការពារ​ព្រៃឈើ និង​ការជួញដូរ​ឈើខុសច្បាប់ ដែល​បាន​​ចូលរួម​ធ្វើដំណើរ​ទៅបិទ​ស្លាក បដា ក្នុងតំបន់​ការពារ​បរិស្ថាន​ព្រៃឡង់ ស្ថិតនៅ​ភូមិពើក ឃុំពុទ្រា ស្រុក​ជ័យ​សែន ខេត្ត​ព្រះវិហារ បាន​ឲ្យ​ដឹងថា ក្រុម​ឧទ្យានុរក្ស ៤នាក់ បាន​រារាំង និង​ហាម​ឃាត់​សកម្មភាព​​ការពារបរិស្ថាន​របស់​ពួកគេ ក្នុងហេតុផល​មួយ ដែល​ក្រុម​សកម្មជន​ យល់​ថាជារឿង ខុសនឹងច្បាប់​​រដ្ឋធម្មនុញ្ញ​របស់កម្ពុជា និង​ផ្ទុយ​ពីប្រសាសន៍​របស់ប្រមុខ​រដ្ឋាភិបាល​កម្ពុជា ដែល​តម្រូវ​ឲ្យ​មានការ​សហការគ្នាការពារបរិស្ថាន និង​ព្រៃឈើ។ លោក​ ហេង ស្រស់ បញ្ជាក់ថា ពួកគេ ត្រូវបង្ខំចិត្ត​ត្រលប់​មកវិញ ជាមួយ​នឹង​ស្លាក និង​បដា ជាង ៥០០ផ្ទាំង ខណៈទើបតែចូល​បាន​ជាង ២គីឡូម៉ែត្រ ហើយ​បិទបដា អស់​ប្រមាណ ១០ផ្ទាំងប៉ុណ្ណោះ។

ប៉ុន្តែ​ប្រធាន​ឧទ្យានុរក្ស​ប្រចាំទិស​ព្រះវិហារ លោក ជិន មនោរិទ្ធ បាន​ប្រាប់វិទ្យុបារាំង​ថា ការ​ហាម​ឃាត់នេះ ក៏ព្រោះ​តែ​ក្រុម​សកម្មជន មិន​បាន​សហការ​ជាមួយ​ក្រុម​មន្ត្រី​ឧទ្យានុរក្ស ដោយ​មិន​ព្រម​បង្ហាញ​ពីគោល​បំណងជាក់លាក់​ពីសកម្មភាព​របស់​ខ្លួន។ តាម​លោក​ ជិន មនោរិទ្ធ លោក​ពេញ​ចិត្ត​ចូលរួម​គ្រប់​រូបភាព​នៃការ​អភិរក្ស​ព្រៃ​ឈើ ហើយ​ជារឿយៗ លោក​តែងតែ​បញ្ជូន​មន្ត្រី​របស់​លោក ឲ្យ​ទៅការពារសុវត្ថិភាព​​ពេលក្រុម​សកម្មជន​ ចូលទៅ​ក្នុងព្រៃជ្រៅទៀតផង។

លោក​ ជិន មនោរិទ្ធ អះអាង​ថា ដោយ​សារការ​សហការនេះហើយ ទើប​ធ្វើ​ឲ្យ​បទល្មើស​ព្រៃឈើ ក្នុងតំបន់ការពារ​​ព្រៃឡង់ ខេត្ត​ព្រះវិហារនេះ មាន​តិចតួច​បំផុត នាពេល​សព្វថ្ងៃនេះ។ ប៉ុន្តែ​បើ​តាម​​ក្រុម​សកម្មជន​ការពារបរិស្ថាន តាំងពី​មាន​វត្ត​មាន​របស់​មន្ត្រី​ឧទ្យានុរក្ស គឺព្រៃឈើ​ក្នុងតំបន់នេះ ស្ទើរតែហិនហោចទៅហើយ បើប្រៀបធៀប​ទៅនឹង​បណ្តាឆ្នាំមុនៗ ព្រោះ​តែ​ការ​ជួយ​សម្រួល ពី​មន្ត្រី​បរិស្ថាន ទៅដល់​ឈ្មួញ​ទុច្ចរឹត។

ក្រុម​ការងារ​ការពារ​បរិស្ថាន ហ៊ានអះអាង​ទៀតថា ការហាមឃាត់​មិន​ឲ្យ​ក្រុម​ពួកគេ​ចូលទៅក្នុង​តំបន់ព្រៃឡង់ នាពេលនេះ គឺដើម្បី​លាក់​បាំង បទល្មើស និង​អំពើ​ពុករលួយ នៅក្នុង​តំបន់នោះ ដែល​មិន​ទាន់​មាន​នរណាម្នាក់​ អាចទប់​ស្កាត់បាន។ ​​តាម​ការ​សង្កេត​របស់​ក្រុមការពារ​ព្រៃឈើនេះ បាន​មើលឃើញថា ព្រៃឈើក្នុងតំបន់​អភិរក្ស​ព្រៃឡង់ នាពេល​សព្វថ្ងៃ​ នៅសល់តែប្រមាណ ៤០ភាគរយ​ប៉ុណ្ណោះ ក្នុង​ទំហំព្រៃឈើលើដី​ ជាង ៤៨ម៉ឺនហិកតា ជុំវិញ​ខេត្ត​ចំនួន ៤ នៅប្រទេសកម្ពុជា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI