ព្រះរាជពិធីបុណ្យចម្រើនព្រះជន្មគម្រប់៧៩ យាងចូល៨០ព្រះវស្សារបស់សម្តេចម៉ែសីហនុ នៅថ្ងៃនេះ
ចុះផ្សាយនៅថ្ងៃ៖
នៅថ្ងៃទី១៨ មិថុនាគឺជាព្រះរាជពិធីបុណ្យចម្រើនព្រះជន្មគម្រប់៧៩ យាងចូល៨០ ព្រះវស្សារបស់សម្តេចព្រះមហាក្សត្រី នរោត្តម មុនីនាថ សីហនុ។ ហើយថ្ងៃនេះប្រជាពលរដ្ឋ សិស្សានុសិស្ស និងមន្ត្រីរាជការក៏ត្រូវបានឈប់សម្រាកមួយថ្ងៃផងដែរ។ ដោយឡែកចរាចរណ៍នៅក្នុងទីក្រុងភ្នំពេញវិញ មិនសូវជាមមាញឹកដូចសព្វមួយដងនោះទេ។
សម្តេចម៉ែ នរោត្តម មុនីនាថសីហនុ បានរៀបអភិសេកជាមួយនិងសម្តេចនរោត្តមសីហនុ នៅក្នុងទីក្រុងភ្នំពេញនៅក្នុងឆ្នាំ ១៩៥២ ហើយបន្ទាប់មកព្រះអង្គទាំងពីរក៏មានបុត្រាពីរអង្គ។ មុនពេលរៀបអភិសេកព្រះមហាក្សត្រីបានសិក្សានៅក្នុងសាលាបឋមសិក្សានរោត្តម បន្ទាប់មកសិក្សានៅវិទ្យាល័យស៊ីសុវត្ថិ។
សម្តេចម៉ែបានក្លាយជាប្រធានកាកបាទក្រហមកម្ពុជាចាប់ពីឆ្នាំ១៩៦០ រហូតដល់ឆ្នាំ១៩៧០។ ហើយនៅឆ្នាំ ១៩៧០ ដល់ ១៩៧៥ សម្តេចម៉ែបានយាងទៅរស់នៅក្នុងប្រទេសចិន ហើយនៅចន្លោះចុងឆ្នាំ ១៩៧៥ និងដើមឆ្នាំ ១៩៧៩ ព្រះមហាក្សត្រីបានរស់នៅក្នុងព្រះបរមរាជវាំងក្នុងទីក្រុងភ្នំពេញ ជាមួយនិងព្រះស្វាមី សម្តេចតា នរោតម្ត សីហនុ និងបុត្រាទាំងពីរអង្គ គឺព្រះអង្គនរោតម្ត សីហមុនី និងព្រះអង្គណារិន្រ្ទាពង្ស ក្រោមការគ្រប់គ្រងពីរបបខ្មែរក្រហម។
នៅក្នុងឆ្នាំ១៩៩២ ព្រះមហាក្សត្រីត្រូវបានតែងតាំងជាសម្តេចព្រះជាយា ហើយនៅឆ្នាំ ១៩៩៣ សម្តេចម៉ែក៏ត្រូវបានតែងតាំងជាព្រះមហេសី។ លុះរហូតមកដល់ឆ្នាំ ២០០៤ ទើបសម្តេចម៉ែត្រូវបានតែងតាំងជា សម្តេចព្រះមហាក្សត្រី វរៈរាជមាតា។
សូមជម្រាបជូនថា ព្រះរាជពិធីបុណ្យចម្រើនព្រះជន្មសម្តេចព្រះមហាក្សត្រី នរោត្តម មុនីនាថ សីហនុ គម្រប់ ៧៩ ចូល ៨០ ព្រះវស្សានៅក្នុងឆ្នាំនេះមានសភាពស្ងប់ស្ងាត់ជាងរាល់ៗឆ្នាំ ដោយសារតែប្រារព្ធឡើងចំពេល ដែលលោកជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានទទួលមរណៈ កាលពីថ្ងៃទី ៨ មិថុនា។ ហើយព្រះរាជពិធីបុណ្យចម្រើនព្រះជន្មនេះ ត្រូវបានធ្វើឡើងមុនមួយថ្ងៃ នៃពិធីបុណ្យដង្ហែ និងបូជាសពរបស់លោកជា ស៊ីមនៅថ្ងៃទី ១៩ មិថុនា នៅទីធ្លាខាងមុខវត្តបុទមវត្តី ក្នុងរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ