អានតួអត្ថបទ
កម្ពុជា

កាកបាទ​​ក្រហម​​កម្ពុជា​​ប្រមូល​​បាន​​ថវិកា​​ជាង​​១៣​លាន​​ដុល្លារ​​ ពីទិវា​​ពិភព​​លោក​​កាកបាទ​ក្រហមខួប​លើក​​ទី​១៥២​​

កាកបាទក្រហមកម្ពុជា
កាកបាទក្រហមកម្ពុជា RFI
ដោយ៖ វ៉ា សំណព្វ
១៧ នាទី

ថ្ងៃ​ទី៨​ឧសភា​ឆ្នាំ​២០១៥​នេះ ​គឺ​ជា​ទិវា​ពិភពលោក​កាកបាទ​ក្រហម​ អឌ្ឍច័ន្ទ​ក្រហម​ ខួប​លើក​ទី១៥២​។ នៅ​កម្ពុជា​ កាកបាទ​ក្រហម​កម្ពុជា​ បាន​ប្រារព្ធ​ទិវា​នេះ​យ៉ាង​មហោឡារឹក​នៅឯទី​ស្នាក់​ការ​កណ្តាល ក្រោម​ប្រធាន​បទ​ «កម្លាំង​មនុស្ស​ធម៌​៖ គោលការណ៍​គ្រឹះ​នៅ​ក្នុង​សកម្មភាព»។ ការ​ប្រារព្ធ​ទិវាកាកបាទ​ក្រហម​ពិភពលោក​នៅ​ឆ្នាំនេះ​ កាកបាទ​ក្រហម​កម្ពុជា​ ប្រមូល​ថវិកា​បាន​ជាង១៣​លានដុល្លា​អាមេរិក​។

ផ្សាយពាណិជ្ជកម្ម

ទិវា​ពិភពលោក​កាកបាទក្រហម អឌ្ឍ​ច័ន្ទ​ក្រហម ខួប​លើក​ទី១៥២ ថ្ងៃទី៨ឧសភា​ឆ្នាំ​២០១៥​នេះ  បាន​ប្រារព្ធ ធ្វើឡើង​យ៉ាង​មហោឡា​រឹក​នៅឯ​ទីស្នាក់ការ​កណ្តាល​កាកបាទក្រហមកម្ពុជា ស្ថិតនៅ​សង្កាត់​ទឹកល្អក់៣ ខណ្ឌទួលគោក រាជធានី​ភ្នំពេញ ដោយមាន​ការចូលរួម​ពី​លោក​នាយក​រដ្ឋមន្ត្រី ហ៊ុន សែន សមាជិក-សមាជិកា ព្រឹទ្ធសភា រដ្ឋសភា រាជរដ្ឋាភិបាល តំណាង​អង្គទូត អ្នកឧកញ៉ា ព្រមទាំង សប្បុរស​ជនជាតិ​និង​អន្តរជាតិ​សរុប​ជាង៥០០០នាក់។ ទិវា​ពិភពលោក​កាកបាទក្រហម អឌ្ឍ​ច័ន្ទ​ក្រហម​ឆ្នាំនេះ បាន​ប្រារព្ធ​ធ្វើឡើង ក្រោម​ប្រធានបទ «កម្លាំង​មនុស្សធម៌៖ គោលការណ៍​គ្រឹះ​នៅក្នុង​សកម្មភាព»

កាកបាទក្រហមកម្ពុជា ត្រូវបាន​បង្កើតឡើង​នៅ​ថ្ងៃទី ១៨ ខែ កុម្ភៈ ឆ្នាំ ១៩៥៥ និង​ត្រូវបាន​ទទួលស្គាល់​ដោយ​រាជរដ្ឋាភិបាល ថា​ជា​ជំនួយការ​អាជ្ញាធរ​សាធារណៈ ក្នុង​ការងារ​មនុស្សធម៌ ដើម្បី​សម្រាលទុក្ខ​លំបាក​របស់​ប្រជាពលរដ្ឋ​ដែល​ងាយ​រងគ្រោះ​បំផុត។
 
ក្នុង​រយៈពេល៦០ឆ្នាំ​មកនេះ កាកបាទក្រហមកម្ពុជា បាន​បំពេញការងារ​មនុស្សធម៌​របស់ខ្លួន​បានជា​ច្រើន ដោយ​គោរព​ទៅតាម​គោលការណ៍​គ្រឹះ​ទាំង៧ចំណុច ដែល​រួមមាន ភាព​មនុស្សធម៌ ភាពមិនលំអៀង អព្យាក្រឹតភាព ឯករាជ្យភាព សេវាកម្ម​ស្ម័គ្រចិត្ត ឯកភាព និង​សកល​ភាព សមស្រប​ទៅនឹង​ការអនុវត្ត​សកម្មភាព​ការងារ​ប្រចាំថ្ងៃ ដើម្បី​បំរើឱ្យ​គោលដៅ​មនុស្សធម៌។
 
ចាប់តាំងពី​ការបង្កើត​នៅ​ឆ្នាំ១៩៥៥ កាកបាទក្រហមកម្ពុជា បាន​ជួបនឹង​ឧបសគ្គ​មួយចំនួន ក្នុងការ​បំពេញ​បេសកម្ម​របស់ខ្លួន។ តួយ៉ាង​នៅក្នុង​របប​ខ្មែរក្រហម ចន្លោះ​ពី​ឆ្នាំ១៩៧៥​ដល់​១៩៧៩ រាល់​សកម្មភាព​កាកបាទក្រហមកម្ពុជា ត្រូវ​ផ្អាក​ទាំងស្រុង ហើយ​អ​សនៈ​របស់​កាកបាទក្រហម​កម្ពុជា​នៅឯ​មហាសន្និបាត​សហព័ន្ធ​អន្ដរជាតិ ត្រូវ​ទុកឱ្យ នៅ​ទំនេរ។  លុះ​ចាប់តាំងពី​ឆ្នាំ១៩៩៤មក កាក បាទ​ក្រហម​កម្ពុជា បាន​ឆ្លងកាត់​ជាច្រើន​ដំណាក់កាល​នៃ​ការអភិវឌ្ឍ​ស្ថាប័ន​នេះ រួមទាំង​ការធ្វើកំណែទម្រង់​ផងដែរ។  បច្ចុប្បន្ន​កាកបាទក្រហមកម្ពុជា​មាន លោកស្រី ប៊ុនរ៉ានី ហ៊ុនសែន ភរិយា​របស់​នាយករ​ដ្ឋ​មន្ត្រី​ជា​ប្រធាន។

ការ​ប្រារព្ធ​ទិវា​ពិភពលោក​កាកបាទក្រហម អឌ្ឍ​ច័ន្ទ​ក្រហម ខួប​លើក​ទី១៥២ឆ្នាំ២០១៥នេះ កាកបាទក្រហមកម្ពុជា បានទទួល​ថវិកា​ពី​សប្បុរសជន​នានា​សរុប​ជាង១៣លាន​ដុល្លារ​អាមេរិក (១៣.២៦៦.២៨៦ដុល្លារ) ថវិកា​ភាគច្រើន​បានមកពី​ក្រុម​អភិជន​នៅ​កម្ពុជា​ដូចជា អ្នកឧកញ៉ា​ជាដើម។ ការទទួល​ថវិកា​នៅ​មិនទាន់​បញ្ចប់​នៅឡើយ​ទេ ដែល​គេ​រំពឹងថា ជំនួយ​ឧបត្ថម្ភ​នឹង​កើន​ដល់​ជាង១៤លាន​ដុល្លារ ដែល​ចំនួន​នេះ ប្រហាក់ប្រហែល​នឹង​ជំនួយ​ឧបត្ថម្ភ​ដែល​កាកបាទក្រហមកម្ពុជា​ទ​ទួលបាន​កាលពី​ឆ្នាំ២០១។ បច្ចុប្បន្ន​កាកបាទក្រហមកម្ពុជា មាន​សមាជិក​ជាង១២ម៉ឺន​នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ