កម្ពុជា-សារព័ត៌មាន

អ្នក​កាសែត​គ្មាន​ព្រំដែន ៖ សេរីភាព​សារព័ត៌មាន​នៅ​កម្ពុជា ធ្លាក់​ចុះ​៤​លេខ!

សេរីភាព​សារព័ត៌មាន​នៅ​កម្ពុជា ធ្លាក់​ចុះ​៤​លេខ!
សេរីភាព​សារព័ត៌មាន​នៅ​កម្ពុជា ធ្លាក់​ចុះ​៤​លេខ! @RSF

នៅ​ថ្ងៃពុធ​នេះ អង្គការ​អ្នក​កាសែត​គ្មាន​ព្រំដែន បាន​ចេញ​របាយការណ៍​ថ្មី​ ដែល​បញ្ជាក់​ថា ​សេរីភាព​សារព័ត៌មាន​នៅ​កម្ពុជា គឺ​ធ្លាក់​ចុះ​ ៤ លេខ បើ​ធៀប​នឹង​ឆ្នាំ​មុន។ ពោល​គឺ​សម្រាប់​ឆ្នាំ​ ២០១៧​នេះ កម្ពុជា​ បាន​លេខ​ ១៣២។ ការ​សិក្សា​នេះ គឺ​ចេញ​នៅ​មុន​ពេល ទិវា​សេរីភាព​សារព័ត៌មាន​ពិភព​លោក ដែល​នឹង​មក​ដល់​ពេល​១​សប្តាហ៍​ទៀត​តែ​ប៉ុណ្ណោះ។

ផ្សាយពាណិជ្ជកម្ម

ក្នុង​ចំណោម​ប្រទេស​១៨០ នៅ​ទូទាំង​ពិភលោក កម្ពុជា​ បាន​ជាប់​ចំណាប់​ថ្នាក់ លេខ​១៣២ គឺ​ធ្លាក់​ចុះ ចំនួន​៤​លេខ​ ខុស​ពី​ឆ្នាំ​មុន! ឆ្នាំ​២០១៦ ដែល​ជាប់​បាន​លេខ ១២៨។ នេះ​គឺ​ជា​របាយ ការណ៍​សិក្សា​វាយ​តម្លៃ​ជា​ថ្មី ទៅ​លើ​សេរីភាព​សារព័ត៌មាន​ ចេញ​ផ្សាយ​មួយ​ឆ្នាំ​ម្តង​របស់​អង្គការ​អ្នក​កាសែត​គ្មាន​ព្រំដែន។​ អង្គការ​នេះ​ មាន​មូលដ្ឋាន​នៅ​ប្រទេសបារាំង​។

ការ​ធ្លាក់​ចុះ​ចំណាត់​ថ្នាក់​របស់​កម្ពុជានៅ​ឆ្នាំនេះ ត្រូវ​អង្គការ​អ្នក​កាសែត​គ្មាន​ព្រំដែន ពន្យល់ថា គឺ​មកពីរដ្ឋាភិបាល​ខ្មែរ បាន​ធ្វើទុក្ខ​បុកម្នេញ​​ចំពោះ​កាសែត​ឯករាជ្យ ​ នៅ​ក្នុង​ឆ្នាំ​២០១៦​កន្លងទៅ​។​ លើសពីនេះ អ្នក​កាសែតស្រុក​ខ្មែរ​ ត្រូវ​ប្រឈម​មុខ​នឹង​ហានិយភ័យ  នៅ​ពេល​ចុះ​យក​ព័ត៌មាន សម្ភាសន៍ និង​ស៊ើប​អង្កេត​ ចំពោះ​រឿង​ឧក្រិដ្ឋកម្ម​ធនធាន​ធម្មជាតិ​ ការ​ជួញ​ដូរ និង​កាប់​បំផ្លាញ​ព្រៃ​ឈើ រួម​ទាំង​បទ​ល្មើស​នេសាទ ជា​ដើម។​

ជាក់​ស្តែង ក្រោយ​ការ​បាញ់​សម្លាប់ បណ្ឌិត កែម ឡី អ្នក​វិភាគ​នយោបាយ​, អ្នក​កាសែត​ក្នុង​ស្ថាប័ន​ព័ត៌មាន​ឯករាជ្យ​ មាន​តួយ៉ាង កាសែត​ភ្នំពេញ​ប៉ុស្តិ៍ និង​កាសែត​ Cambodia Daily ជា​ដើម ត្រូវ​រង​ការ​រិះគន់ដោយ​សំណេរ​និងសម្តីធ្ងន់ៗ​ពី​សំណាក់​​ក្រុម​គ្រួសារ​លោក​នាយក រដ្ឋមន្ត្រី និង​ត្រូវរង​ការគំរាមកំហែង​ពី​សំណាក់​ជន​អនាមិក​ ហើយ​ក៏​អាច​ជា​កម្មវត្ថុ​នៃ​អំពើ​ហិង្សា​ណា​មួយ​ផង​ដែរ។​ នេះ​បើ​តាម​របាយការណ៍របស់​ អ្នក​កាសែត​គ្មាន​ព្រំដែន។

​តាម​ការ​សង្កេត​របស់​អង្គការ​អ្នក​កាសែត​គ្មាន​ព្រំដែន, អ្នក​សារព័ត៌មាន​នៅ​កម្ពុជា​ ត្រូវងាយ​រង​ការ​ចោទ​ប្រកាន់​តាម​ផ្លូវ​តុលាការ​ ពី​បទ«បរិហារកេរ្តិ៍» និង​«ប៉ះពាល់​ដល់​សណ្តាប់​ធ្នាប់​សាធារណៈ​ឬ​ប៉ះ​ពាល់​មុខ​មាត់​ប្រទេស​ជាតិ​»។ មិន​តែ​ប៉ុណ្ណោះ ​សេរីភាព​សារព័ត៌មាន គឺ​ជា​ចំណុច​រសើប​ ក្រោម​ការ​ដឹក​នាំ​របស់​លោក​នាយក​រដ្ឋមន្ត្រី ហ៊ុន សែន ដែល​ក្តោប​ក្តាប់​អំណាច​ ប្រមាន​ជាង​ ៣០​ឆ្នាំ​ ហើយ​ដែល​លោក មាន​ទំនាក់​ទំនង​ជិត​ស្និទ​ខ្លាំង​ជាមួយ​ម្ចាស់​ប្រព័ន្ធ​ផ្សព្វផ្សាយ​ជា​ច្រើន។​ ទន្ទឹម​នេះ អង្គការ​អ្នក​កាសែត​គ្មាន​ព្រំដែន បាន​គូស​បញ្ជាក់​ លទ្ធិ​ប្រជាធិបតេយ្យ​អាច​ត្រូវ​ដួលរលំ ដោយ​សារ​តែ​វត្តមាន​នៃ​បុរស​ខ្លាំង។

យ៉ាង​ណា​ក៏​ដោយ​ចុះ បើ​គេ​និយាយ​ពី​សេរីភាព​សារព័ត៌មាន​ក្នុង​តំបន់​អាស៊ាន ទាំង​១០ ប្រទេស​ កម្ពុជា​នៅ​តែ​រក្សា​តំណែង​បាន​ល្អ។ ពោល​គឺ​ចាញ់​តែ​បី​ប្រទេស ក្នុង​កម្រិត​លេខ​តិចតួច​តែ​ប៉ុណ្ណោះ នោះ​គឺ​ ​ឥណ្ឌូនេស៊ី (១២៤) ហ្វីលីពីន (១២៧) និង ភូមា (១៣១) លើស​កម្ពុជា​១​លេខ។ ចំណែក ឡាវ (១៧០) និង​វៀតណាម (១៧៥) គឺ​ស្ទើរ​តែ​ស្ថិត​នៅ​បាត​តារាង ហើយ​ស្ថិត​ក្នុង​បញ្ជី​ខ្មៅ​ផង៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI