កម្ពុជា-នយោបាយ

លោក ​សម​ រង្ស៊ី​ ថា​បើ​មាន​ការ​ព្យូ​EBA​ លោក​នឹង​បំផុស​ឲ្យ​កម្មករ​ងើប​តវ៉ា​ប្រ​ឆាំង​នឹង​លោក ​ហ៊ុន ​សែន​

លោក សម រង្ស៊ី
លោក សម រង្ស៊ី @Internet

លោក សម រង្ស៊ី បាន​ព្រមាន​ថា លោក​នឹង​បំផុស​ឲ្យ​កម្មករ និង​ប្រជា​ពល​រដ្ឋ​ខ្មែរ​រាប់​ទាំង​កសិករ​ផង ​ឲ្យ​ងើប​តវ៉ា​ប្រឆាំង​នឹង​លោក​នាយក​រដ្ឋមន្ត្រី ហ៊ុន សែន ប្រសិន​បើ​មាន​ការ​ព្យូ​EBA​នៅ​ក្រោយ​ថ្ងៃ​ទី​១២​ខែ​កុម្ភៈ​ឆ្នាំ​២០២០​។ ​នេះ​ជា​ការ​ឆ្លើយ​តប​នឹង​សំណួរ​របស់​វិទ្យុ​អាស៊ីសេរី​ថា​តើ​អាច​មាន​ផែន​ការ​វិល​ចូល​ស្រុកជា​លើក​ទី​២​ទេ​ នៅ​ឆ្នាំ​២០២០​ខាង​មុខ​ ខណៈ​លោក សម រង្ស៊ី បាន​ខក​ខាន​ចូល​ប្រទេស​កម្ពុជា​កាល​ពី​ថ្ងៃ​ទី​៩​វិច្ឆិកា​កន្លង​មក​នេះ​។​ ប៉ុន្តែ​អ្នក​នាំ​ពាក្យ​គណ​បក្ស​កាន់​អំណាច​អះអាង​ថា​សារ​របស់​លោក​ សម រង្ស៊ី ​នឹង​មិន​មាន​ប្រសិទ្ធ​ភាព​ឡើយ​។​

ផ្សាយពាណិជ្ជកម្ម

លោក សម រង្ស៊ី អះអាង​ថា ការ​បំផុស​ឲ្យ​កម្មករ​តវ៉ា​គឺ​ជា​ការ​ជំរុញ​ឲ្យ​រដ្ឋាភិបាល​កម្ពុជា​មាន​ការ​ទទួល​ខុស​ត្រូវ​ចំពោះ​ផល​វិបាក​របស់​ប្រជា​ពលរដ្ឋ​ខ្មែរ​ដែល​រង​ផល​ប៉ះ​ពាល់​ដោយ​សារ​តែ​បញ្ហា​EBA​។​ បើ​តាម​​លោក សម រង្ស៊ី ការ​ព្យូ​EBA គឺ​ជា​កំហុស​របស់​រដ្ឋាភិបាល​របស់​លោក ហ៊ុន សែន តែ​កម្មករ​និង​ពលរដ្ឋខ្មែរ​ជា​អ្នក​រង​ផល​ប៉ះពាល់​ទៅ​វិញ​។ ​លោក​ អះអាងថា​នៅពេល​កម្មករ​និង​កសិករ​ជួប​ផល​វិបាក​ពេល​ផ្តាច់​EBA​នោះ គឺ​សារ​នយោបាយ​របស់​លោក​តាម​រយៈ​ហ្វេស​ប៊ុក​នឹង​មាន​ឥទ្ធិពល​ដល់​ការ​សម្រេច​ចិត្ត​របស់​ពលរដ្ឋ​។

ទោះ​ជា​យ៉ាង​ណា​លោក សុខ ឥសាន​ អ្នក​នាំ​ពាក្យ​គណបក្ស​ប្រជាជន​កម្ពុជា​អះអាងថា ការ​បំផុស​របស់​មេ​ដឹក​នាំ​បក្ស​ប្រ​ឆាំង​រូប​នេះ​នឹង​មិន​មាន​ឥទ្ធិពល​អ្វី​ឡើយ​ដល់​កម្មករ​។ បើ​តាម​លោក សុខ ឥសាន ការ​លើក​ឡើង​របស់​លោក សម រង្ស៊ី គឺ​ជា​រឿង​ដដែលៗ​តាំង​ដើម​មក​តែ​គ្មាន​ប្រសិទ្ធភាព​អ្វី​ឡើយ​។

លោក សុខ ឥសាន អះអាង​ជាថ្មី​ទៀត​ថា ​រដ្ឋា​ភិបាល​មិន​មាន​ការ​បារម្ភ​អ្វី​ឡើយ ​ប្រសិន​ជា​សហភាព​អឺរ៉ុប​ព្យូ​EBA​នៅ​រយៈ​ពេល​ជាង​មួយ​ខែ​ខាង​មុខ​ទៀត​នេះ​។ ការ​អះអាង​យ៉ាង​ដូច្នេះ​ដោយ​លោក​សំអាង​ថា​រដ្ឋាភិបាល​ត្រៀម​លក្ខណៈ​រួច​ជា​ស្រេច​ហើយ ខណៈ​ដែល​មាន​ក្រុម​ហ៊ុន​ជាច្រើន​ទៀត​​ត្រូវ​បាន​ក្រុម​ប្រឹក្សា​អភិវឌ្ឍន៍​កម្ពុជា​អនុម័ត​ឲ្យ​មក​វិនិយោគ​ជា​បន្ត​បន្ទាប់​។​

សូម​រំឭក​ថា នៅថ្ងៃ​ទី​១២ ខែ​ធ្នូ ឆ្នាំ​២០១៩ ក្រសួង​ការ​បរទេស​កម្ពុជា​បាន​ប្រគល់​ជូន​គណៈ​កម្មការ​អឺរ៉ុប នូវ​ការ​ឆ្លើយតប​ចុង​ក្រោយ​របស់​ខ្លួន​ចំពោះ​របាយការណ៍​របស់​គណៈកម្មការ​អឺរ៉ុប​អំពី​ការរ​ក​ឃើញ និងការ​សន្និដ្ឋាន ពាក់ព័ន្ធ​នឹង​នីតិវិធី​ដក​ប្រព័ន្ធ​អនុគ្រោះពន្ធ​ជា​បណ្តោះ​អាសន្ន ដែល​អឺរ៉ុប​ទុកពេល​មួយ​ខែ​ឲ្យ​ខ្មែរ​ឆ្លើយតបនោះ​។ តាម​នីតិ​វិធី​ការ​សម្រេច​ជោគ​វាសនា​បញ្ហារបស់​EBA​របស់​កម្ពុជា​នឹង​ចេញ​លទ្ធផល​ជា​ផ្លូវ​ការ​នៅ​ក្រោយ​ថ្ងៃទី​១២​ខែកុម្ភៈ​ឆ្នាំ​២០២០​ខាង​មុខ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI