អានតួអត្ថបទ
កម្ពុជា-ច្បាប់

​មេធាវី​៖ ​លោក សម រង្ស៊ី ​នឹង​យក​បញ្ហា​រំលោភ​សិទ្ធិ​មនុស្ស​និង​ឧក្រិដ្ឋ​កម្ម​ លោក ហ៊ុន សែន ​ប្រាប់​តុលាការ​បារាំង​

លោក​ សម រង្ស៊ី​
លោក​ សម រង្ស៊ី​ @សហការី
ដោយ៖ វណ្ណ សុគន្ធា
1 នាទី

សហ​មេធាវី​ពីរ​រូប​របស់​លោក​សម រង្ស៊ី នៅ​ថ្ងៃ​ទី២៣ ខែ​សីហា​នេះ បាន​ចេញ​សេចក្តី​ប្រកាស​ព័ត៌មាន​មួយ​ស្តី​ពី​ការ​ប្រកាស​ស្វាគមន៍​របស់​លោក​សម រង្ស៊ី ចំពោះ​ការ​ប្តឹង​របស់​លោក​នាយក​រដ្ឋ​មន្រ្តី​ហ៊ុន សែន​។ តាម​ក្រុម​មេធាវី ក្រៅ​ពី​ប្រកាស​ស្វាគមន៍ លោក​សម រង្ស៊ី ក៏​នឹង​ដាក់​ភស្តុតាង​មួយ​ចំនួន​ស្តី​ពី​ការ​រំលោភ​សិទ្ធិ​មនុស្ស និង​ឧក្រិដ្ឋ​កម្ម​ផ្សេងៗ ដែល​លោក​ចោទ​ថា បាន​ប្រព្រឹត្ត​ឡើង​ដោយ​លោក​នាយក​រដ្ឋ​មន្រ្តី​ហ៊ុន សែន ទៅ​កាន់​តុលាការ​នា​ពេល​ខាង​មុន​នេះ​ផង​ដែរ​។ 

ផ្សាយពាណិជ្ជកម្ម

ក្រុម​មេធាវី​របស់​លោក​សម រង្ស៊ី បាន​បញ្ជាក់​នៅ​ក្នុង​សេចក្តី​ប្រកាស​ព័តមាន​របស់​ខ្លួន​ថា លោក​សម រង្ស៊ី នឹង​ធ្វើ​សេចក្តី​ថ្លែង​ការណ៍​ជា​សាធារណៈ​មួយ ដើម្បី​ឆ្លើយ​តប​ទៅ​នឹង​ការ​ប្តឹង​របស់​លោក​នាយក​រដ្ឋ​មន្រ្តី​ហ៊ុន សែន​នៅ​តុលាការ​បារាំង​។ នៅ​ក្នុង​សេចក្តី​ថ្លែង​ការណ៍​នោះ ក្រុម​មេធាវី​អះអាង​ថា លោក​សម រង្ស៊ី​នឹង​ពាំ​នាំ​នូវ ភស្តុ​តាង​អំពី​ការ​រំលោភ​សិទ្ធិ​មនុស្ស​ធ្ងន់​ធ្ងរ​របស់​លោក​ហ៊ុន សែន។ ភស្តុ​តាង​នេះ គឺ​យក​ចេញ​ពី​របាយ​ការណ៍​របស់​អង្គ​ការ​ឃ្លាំ​មើល​សិទ្ធិ​មនុស្ស​អន្តរ​ជាតិ(Human Rights Watch)។ បើ​តាម​ក្រុម​មេធាវី ភស្តុ​តាង​ ដែល​បាន​ពី​ក្រុម​អ្នក​ជំនាញ និង អង្គការ​ដែល​គួរ​ឱ្យ​ទុក​ចិត្ត នឹង​នាំ​យក​ទៅ​ធ្វើ​ជា​តឹក​តាង និង​បំភ្លឺ​ពី​ការ​ពិត​នៃ​សេចក្តី​ថ្លែង​ការណ៍​របស់​លោក​សម រង្ស៊ី អំពី​ការ​ទទួល​ខុស​ត្រូវ​របស់​លោក​នាយក​រដ្ឋ​មន្រ្តី​ហ៊ុន សែន​។

បន្ថែម​លើ​នេះ ក្រុម​មេធាវី​ក៏​បាន​លើក​ឡើង​ដែរ​ថា លោក​សម រង្ស៊ី នឹង​លើក​បង្ហាញ​ពី​ការ​ប្រព្រឹត្ត​មិន​ត្រឹម​ត្រូវ​របស់​លោកហ៊ុន សែន នៅ​ប៉ុន្មាន​ទស្សវត្សរ៍​នេះ​តាម​រយៈ​ការ​ប្រើ​ប្រាស់​ប្រព័ន្ធ​ច្បាប់​ធ្វើ​ទុក្ខ​បុក​ម្នេញ​លើ​សកម្ម​ជន​ការពារ​សិទ្ធិ​មនុស្ស អ្នក​នយោ​បាយ​បក្ស​ប្រឆាំង រួម​ទាំង​លោក​សម រង្ស៊ី ខ្លួន​ឯង​ផង​។ បើ​តាម​សេចក្តី​ប្រកាស​ព័ត៌មាន​ដដែល ក្រុម​មេធាវី​លោក​សម រង្ស៊ី បាន​គូស​បញ្ជាក់​ថា នៅ​ពេល​នេះ លោកហ៊ុន សែន កំពុង​ប៉ុន​ប៉ង​ប្រើ​ប្រាស់​តុលាការ​បារាំង ដើម្បី​បន្ថែម​ការ​គាប​សង្កត់​ទៅ​លើ​គូ​ប្រជែង​នយោបាយ​របស់​លោក​។

ក្រៅ​ពី​បញ្ហា​នេះ លោក​សម រង្ស៊ី ក៏​នឹង​លើក​បង្ហាញ​ពី​ការ​ទទួល​ខុស​ត្រូវ​របស់​លោក​នាយក​រដ្ឋ​មន្រ្តី​ហ៊ុន សែន ចំពោះ​ឧក្រិដ្ឋ​កម្ម​ធ្ងន់​ធ្ងរ​ផ្សេងៗ ដូច​ជា ករណី​ផ្ទុះ​គ្រាប់​បែក​ក្នុង​ឆ្នាំ​១៩៩៧ ដែល​សម្លាប់​មនុស្ស​១៥​នាក់ និង ១៥០​នាក់​ផ្សេង​ទៀត​បាន​រង​របួស​។ នេះ​បើ​តាម​សេចក្តី​ប្រកាស​ព័ត៌មាន​របស់​ក្រុម​មេធាវី​លោក​សម រង្ស៊ី​។

សូម​បញ្ជាក់​ថា សេចក្តី​ប្រកាស​ព័ត៌មាន​របស់​ក្រុម​មេធាវី​របស់​លោក​សម រង្ស៊ី​នា​ពេល​នេះ ជា​ការ​ឆ្លើយ​តប​ទៅ​នឹង​សេចក្តី​ប្រកាស​ព័ត៌មាន​របស់​សហ​មេធាវី​ជន​ជាតិ​បារាំង​៣រូប របស់​លោក​នាយក​រដ្ឋ​មន្រ្តី​ហ៊ុន សែន និង លោកឌី វិជ្ជា ដែល​ជា​កូន​ប្រសារ​កាល​ពី​ថ្ងៃទី២០ ខែ​សីហា​កន្លង​ទៅ ដែល​បាន​បញ្ជាក់​ពី​ការ​ប្តឹង​លោក​សម រង្ស៊ី ពី​បទ «​បរិហារ​កេរ្តិ៍​ជា​សាធារណៈ​ចំពោះ​បុគ្គល​»ទៅ​កាន់​តុលា​ការ​បារាំង​។ បណ្ដឹង​នេះ ធ្វើ​ឡើង​ជុំ​វិញ​សំណុំ​រឿង​ការ​ស្លាប់​របស់​លោក ហុក ឡង់ឌី កាល​ពី​១១​ឆ្នាំ​មុន ដែល​លោក​សម រង្ស៊ី ចោទ​ប្រកាន់​លោក ហ៊ុន សែន​ថា ជា​មេ​ខ្លោង​នៅ​ពី​ក្រោ​យ​​ការ​ស្លាប់​នេះ ហើយ​អះអាង​ទៀត​ថា លោកឌី វិជ្ជា ដែលជាកូន​ប្រុស​លោកហុក ឡងឌី កំពុង​រៀប​គម្រោង​ការ​សង​សឹក​លោកហ៊ុន សែន​វិញ។

នៅ​ក្នុង​សេចក្តី​ប្រកាស​ព័ត៌មាន ក្រុម​មេធាវី​របស់​លោក​ហ៊ុន សែន បាន​គូស​បញ្ជាក់​ថា លោក​ហ៊ុន​ សែន មិន​ចង់​ប្តឹង​លោក​សម រង្ស៉ី ដែល​ជា​ជន​រួម​ជាតិ​ជាមួយ​ខ្លួន​នៅ​តុលាការ​បរទេស​បែប​នេះ​នោះ​ទេ​។ ប៉ុន្តែ​ការ​ចោទ​ប្រកាន់​របស់​លោក​សម រង្ស៊ី​នេះ គឺ​មិន​អាច​អត់​ឱន​ឱ្យ​បាន​ឡើយ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ