កម្ពុជា

ប្រជា​សហគមន៍​តំបន់​សេ​សាន​ក្រោម​២​ មិន​ព្រម​ចាក​ចេញ​ពីទី​កំណើត​ខ្លួន​ ទោះបីជា​ស្ថាន​ភាព​មិន​អំណោយផល​

ទឹក​លិច​នៅ​ឃុំ​ស្រែ​គរ ដែល​បណ្ដាល​មក​ពី​ទំនប់​វារី​អគ្គិសនី​សេសាន​ក្រោម​២
ទឹក​លិច​នៅ​ឃុំ​ស្រែ​គរ ដែល​បណ្ដាល​មក​ពី​ទំនប់​វារី​អគ្គិសនី​សេសាន​ក្រោម​២ @FB
១៦ នាទី

យ៉ាង​ហោច​ណាស់​ប្រជាជន​១២០​គ្រួសារ​ ក្នុង​ភូមិ​ស្រែ​គរ​ចាស់​ កំពុង​បន្ត​រស់នៅ​លើ​ទីតាំង​កំណើត​របស់​ខ្លួន​ បើ​ទោះ​ជា​ស្ថាន​ភាព​រស់នៅ​មិន​អំណោយ​ផល​ក៏​ដោយ​។ ពួក​គេ​កំពុង​រស់​នៅ​ក្នុង​ទឹក​លិច​ ដែល​បណ្ដាល​មក​ពី​ទំនប់​វារី​អគ្គិសនី​សេសាន​ក្រោម​២​ និ​ងភ្លៀង​ធ្លាក់​ជាប់ៗ​គ្នា​។ ការ​ជន់លិច​នេះចាប់​តាំង​ពី​ថ្ងៃ​ទី១៨​ កក្កដា​ បី​ថ្ងៃ​ក្រោយ​ពីការ​ចាប់​ផ្ដើម​គម្រោង​សាកល្បង​ប្រតិ​បត្តិ​ការ​ទំនប់​វារី​អគ្គិសនី​។អត្ថ​បទ​ដោយ​៖ ប៊ុន​ សៅ​សុភ​នាថ​ និង​ ទី​ កញ្ញា​

ផ្សាយពាណិជ្ជកម្ម

លោក​ ស៊ុន​ យូរ៉ា​ ប្រធាន​កម្ម​វិធី​អភិ​ឌ្ឍន៍​របស់​វេទិកា​នៃ​អង្គ​ការ​មិនមែន​រដ្ឋា​ភិបាល​ស្តីពី​កម្ពុជា​ បាន​ប្រាប់​វិទ្យុ​បារាំង​ នៅ​ថ្ងៃទី​១​ សីហា​ ថា​ ទឹកលិច​នៅតំបន់​ទំនប់​វារី​អគ្គិសនី​សេសាន​ក្រោម២​ គឺ​កើត​ឡើង​ដោយសារ​ មាន​ភ្លៀង​ធ្លាក់​ជោគជាំ​ និង​ការ​សាក​ល្បង​ប្រតិបត្តិ​ការ​ទំនប់​វារី​អគ្គិសនី​។ មូលហេតុ​នេះហើយ​ ធ្វើឲ្យ​ប្រជាជន​១២៤​គ្រួសារ​ ត្រូវ​រស់លើ​ទឹក​លិច​ និង​ប្រឈម​ការ​លំបាក​សម្រាប់​ជីវភាព​ប្រចាំ​ថ្ងៃ​។

ជាមួយ​គ្នានេះ​ដែរ​ លោក​ ហ្វុត​ ឃឿន​ ជាប្រជាជន​រស់​នៅ​ភូមិ​ស្រែគរ​ចាស់​ បាន​អះអាង​ថា​ ករណី​លិច​ទឹក​នៅក្នុង​ភូមិ​របស់​លោក​ គឺ​មកពី​ទំនប់​វារី​អគ្គិសនី​។ លោក​ថា​ អ្នក​ភូមិ​ខ្លះ​ត្រូវ​បង្ខំ​ចិត្ត ទៅ​រស់នៅ​ទី​ទួល​សុវត្ថិភាព ​នៅ​ពេល​ទឹក​ឡើង​ខ្លាំង។ ប៉ុន្តែ​ ប្រជា​សហគមន៍​មួយ​ចំនួន​នៅតែ​ប្រកាន់​ជំហរ​មិន​ព្រម​ចាក​ចេញ​ បើ​ទោះ​បី​កម្ពស់​ទឹក​កើនឡើង​ខ្ពស់​ មានការ​លំបាក​ក៏​ដោយ​។

កម្ពស់​ទឹក​បាន​គំរាមកំហែង​ខ្លាំង​ទៅលើ​កន្លែង​មួយ​ចំនួន​ ដូចជា​ឃុំស្រែគរ​ចាស់ ​ឃុំ​ក្បាលរមាស និង​ឃុំ​សាឡាត​ ជាដើម​។ ជាក់ស្តែង​ ស្រែ​ផ្នែក​ខាងក្រោម​ នៅក្នុង​ភូមិ​ស្រែគរ​ចាស់ ​កម្ពស់​ទឹក​បាន​ឡើង​រហូត​ដល់​​ជាង២​ម៉ែត្រ និង តាមកន្លែង​ខ្លះ​ ទឹក​ឡើង​ កន្លះ​ម៉ែត្រ​ ទៅ១ម៉ែត្រ​។ នេះ ជាហេតុ​ធ្វើ​ឲ្យ​ស្រូវ​ ដំណាំ​ បន្លែ​ មួយ​ចំនួន​ត្រូវ​បាន​ខូចខាត​។

ទោះជា​យ៉ាងណា​ លោក​ ហ្វុត​ ឃឿន​ បាន​ប្រាប់​ពី​ស្ថានភាព​បច្ចុប្បន្ន​ ថាទឹក​កំពុង​តែ​ស្រក​ជា​បណ្ដើរៗ​ហើយ​។ លោក​ថា​ ទោះបីជា​មាន​ភាព​ធូរ​ស្រាល​នៃការលិចទឹក​ក៏ដោយ​ ប្រជាពលរដ្ឋ​នៅក្នុង​ភូមិ​បាន​រៃ​លុយ​គ្នា​និង​ត្រៀម​ខ្លួន​ដោយ​រៀបចំ​ ទូក​ កាណូត​ វិទ្យុ​ទាក់ទង​គ្នា​ ជាដើម​ ដើម្បី​ការពារ​ខ្លួន​ ព្រោះ​គ្មាន​អាជ្ញាធរ​មក​ជួយ​អន្ត​រាគមន៍​ទេ​។ ហេតុ​ដូច្នេះ​ លោក​ចង់​ឲ្យ​សមត្ថកិច្ច​ពាក់​ព័ន្ធ​ទាំងអស់​ ជួយ​រៀបចំ​តាម​តម្រូវ​ការ​របស់​ប្រជា​ពលរដ្ឋ​ដែល​កំពុង​ជួប​បញ្ហា​។ ​

សូម​រំលឹក​ថា​ កន្លង​ទៅ​ ប្រ​ជា​សហគមន៍​នៅ​ស្រុក​សេសាន​ មិនបាន​ឯកភាព​ឲ្យមាន​ការសាងសង់​ទំនប់​វារី​អគ្គិសនី​ និងមិន​ព្រម​ចាកចេញ​ពី​ដី​សមូហភាព​ដែល​បន្សល់​ពីដូនតា​នោះទេ​។ ហើយ​ ក្រុមហ៊ុន​វារី​អគ្គិសនី​សេសាន​ក្រោម២​នេះ​ បាន​បិទ​ទ្វារ​ទឹក​សាកល្បង​ ចាប់​តាំងពី​ថ្ងៃ​១៥​ កក្កដា​ មកម្ល៉េះ​។ ទំនប់វារី​អគ្គិសនី​នេះ មាន​សក្តានុពល​ ៤០០មេហ្កា​វ៉ាត់​ ដែលអាច​ផ្គត់​ផ្គង់​ចរន្ត​អគ្គិសនី​ដល់​ខេត្ត​ចំនួន​៥ ​គឺ ស្ទឹង​ត្រែង​ កំពង់​ចាម​ ក្រចេះ​ ព្រះ​វិហារ​ និង​ រតនគិរី​។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI