កម្ពុជា

លោក ស្រី រ៉ូណា ស្មីត ចាប់​ផ្តើម​ការងារ​ដំបូង​ជា​មួយ​ការ​សង្ឃឹម​តិច​ពី​អ្នក​ការ​ពារ​សិទ្ធិ​មនុស្ស​ក្នុង​ស្រុក​

@UN cambodia
ដោយ៖ ញឹម សុផល
១៧ នាទី

លោកស្រី រ៉ូ​ណា ស្មី​ត អ្នក​រាយការណ៍​ពិសេស​ថ្មី​ស្តីពី​ស្ថានភាព​សិទ្ធិ​មនុស្ស​នៅ​ប្រទេស​កម្ពុជា​បាន​ចាប់​ផ្តើម​បំពេញ​ការងារ​របស់​ខ្លួន​ជា​លើក​ដំបូង​ចាប់​តាំងពី​ថ្ងៃ​ព្រហស្បតិ៍​ម្សិលមិញ ​ដោយ​លោក​ស្រី​បាន​ជួប​ប្រមូល​ព័ត៌​មាន​ មុន​គេ​ជាមួយ​តំណាង​អង្គការ​ក្រៅ​រដ្ឋាភិបាល​ក្នុងស្រុក​ប្រមាណ​ជា២០ ដែល​ធ្វើ​សកម្មភាព​ទាក់ទង​ទៅនឹង​សិទ្ធិមនុស្ស​នៅ​កម្ពុជា។ ហើយ​នៅថ្ងៃនេះ​ដែរ លោក​ស្រី​បន្ត​ជួប​ជា​មួយ​អ្នក​ការពារ​សិទ្ធិ​មនុស្ស​នៅ​កោះកុង​និង​សហគមន៍ មុន​នឹងមាន​ជំនួប​ជាមួយ​មន្ត្រី​រដ្ឋាភិបាល។ 

ផ្សាយពាណិជ្ជកម្ម

 

នៅ​ថ្ងៃ​សុក្រ​ទី១៨កញ្ញា​នេះ ជា​ថ្ងៃទី២ហើយ​ដែល​អ្នករាយការណ៍​ពិសេស​ថ្មី​របស់​អង្គការសហប្រជាជាតិ លោកស្រី រ៉ូ​ណា ស្មី​ត បានចាប់ផ្តើម​ធ្វើការ​ងា​រ​ដំបូង​របស់ខ្លួន​នៅ​កម្ពុជា។ លោកស្រី​ស្មី​ត បានធ្វើ​ដំណើរ​ទៅកាន់​ខេត្តកោះកុង ដើម្បី​ជួប​នៅ​រសៀល​នេះ ជាមួយនឹង​មនុស្ស​ចំនួន១៧នាក់ ដែល​អាជ្ញា​ខេត្ត​បាន​ឃាត់​ខ្លួន​កាលពី​ដើមខែ ខណៈដែល​ពួកគេ​បាន​ឃ្លាំមើល​ការរំលោភ​សិទ្ធិមនុស្ស​នៅក្នុង​វិវាទ​ដីធ្លី​មួយ​រវាង​ប្រជា​សហគមន៍ និង​ក្រុមហ៊ុន Union Development Group។ ក្នុងចំណោម​អ្នក​ដែល​អាជ្ញាធរ​ចាប់ខ្លួន​នោះ មាន​សកម្មជន​ការពារ​សិទ្ធិមនុស្ស​លីកាដូ៤នាក់ សកម្មជន​អាដហុក​ម្នាក់ ក្រៅពីនេះ​គឺជា ប្រជា​សហគមន៍។

ដោយសារតែ​បេសកកម្ម​របស់​លោក​ស្រី​ស្មី​ត​ជាការ​ស៊ើបសួរ​ព័ត៌មាន លោកស្រី​មិនមាន​អត្ថាធិប្បាយ​តបភ្លាមៗទេ​បន្ទាប់ពី​ជំនួប​ជាមួយ​សង្គម​ស៊ីវិល​ក្នុងស្រុក​កាលពី​ម្សិលមិញ។នេះ​បើតាម​លោក នី ចរិយា ប្រធាន​ផ្នែក​ស៊ើបអង្កេត​ជាន់ខ្ពស់​របស់​សមាគម​អាដហុក។ ក៏ប៉ុន្តែ​សង្គម​ស៊ីវិល​បាន​លើក​ជាច្រើន​ទៅកាន់​លោកស្រី ទាក់ទង​ទៅនឹង​បរិយាកាស​នៃ​ការគោរព​សិទ្ធិមនុស្ស​នៅក្នុង​ប្រទេស​កម្ពុជា ពី​ច្បាប់​សមាគម​និង​អង្គការ​មិនមែន​រដ្ឋាភិបាល ប្រព័ន្ធយុត្តិធម៌ សុវត្ថិភាព​អ្នកការពារ​សិទ្ធិមនុស្ស។ល។

ទោះជា​យ៉ាង​នេះ​ក្តី​លោក​នី ចរិយា មិនមាន​សង្ឃឹម​មុតមាំ​ថា​ការងារ​របស់លោក​ស្រី​ស្មី​ត​នឹង​ខុសប្លែកគ្នា​ខ្លាំង​ពី​អ្នកតំណាង​ចាស់​នោះទេ ដោយសារតែ​គាត់​ជា​សាស្ត្រាចារ្យ​ដូចគ្នា។ម្យ៉ាងទៀត​រាល់​របាយការណ៍​ដែល​លើកឡើង​ដោយ​អ្នករាយការណ៍​ពិសេស​កន្លងមក​តែង​បដិសេធដោយ​រដ្ឋាភិបាល។

តាម​គំរោង នៅក្នុង​ដំណើរ​ទស្សន​កិច្ចការងា​រ​រយៈពេល៨ថ្ងៃ​របស់លោក​ស្រី​រ៉ូ​ណា ស្មី​ត តំណាង​សិទ្ធិមនុស្ស​សហប្រជាជាតិ​រូបនេះ​នឹងមាន​ជំនួប​ជា​បន្តបន្ទាប់​ជាមួយ​ថ្នាក់ដឹកនាំ​ជាន់ខ្ពស់​រដ្ឋាភិបាល​កម្ពុ​ជា ក្នុងនោះ​នឹងត្រូវ​ជួប​ជាមួយ​លោកនាយក​រដ្ឋមន្ត្រី​ហ៊ុន សែន ដែល​ត្រូវ​បានកំណត់​នៅ​ថ្ងៃ​ចន្ទ​ទី២១ខែកញ្ញា សប្តាហ៍​ក្រោយ។ចុងបញ្ចប់​នៅ​ថ្ងៃទី២៤ កញ្ញា លោកស្រី​ស្មី​ត នឹងធ្វើ​សន្និសីទកាសែត​មួយ​ទាក់ទង​ទៅនឹង​ដំណើរ​ទស្សនកិច្ច​របស់​លោកស្រី និង​ការប្រមូល​ព័ត៌មាន​ស្តីពី​ស្ថានភាព​សិទ្ធិមនុស្ស​នៅ​កម្ពុជា​ជា​លើកដំបូង។

សូម​រំលឹកថា លោកស្រី រ៉ូ​ណា ស្មី​ត ជា​សាស្ត្រាចារ្យ​ច្បាប់​ជនជាតិ​អង់គ្លេស​មួយរូប ដែល​បន្តបេសកម្ម​ពី​លោក សូរិយា ប្រាសាទ ស៊ូ​ប៊ែ​រ​ឌី ដែល​ចប់​អាណត្តិ ត្រូវបានតែងតាំង​ដោយ​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ​កាលពី​ខែ​មិនា​ឆ្នាំ២០១៥ ដើម្បី​តាមដាន​និង​រាយការណ៍​ស្តីពី​ស្ថានភាព​សិទ្ធិមនុស្ស​នៅ​កម្ពុជា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI