កម្ពុជា-នយោបាយ

លិខិត​ក្លែងក្លាយ​មួយ​បាន​បែកធ្លាយ ​ស្របពេល​សង្គ្រោះជាតិ​មិន​ចុះ​សម្រុង​គ្នា​លើ​បញ្ជី​ឈ្មោះ​បោះឆ្នោត​ព្រឹទ្ធសភា​

សមាជវិសាមញ្ញរបស់គណបក្សសង្រ្គោះជាតិនាពេលកន្លងមក
សមាជវិសាមញ្ញរបស់គណបក្សសង្រ្គោះជាតិនាពេលកន្លងមក @RFI

លោក ​កឹម សុខា ​ប្រធាន​​គណបក្ស​​សង្គ្រោះ​​ជាតិ ​ដែល​​កំពុង​​ជាប់ឃុំ​​នៅ​ក្នុង​​ពន្ធនាគារ​​ត្រពាំង​ផ្លុ​ង ​បាន​ចេញ​​លិខិត​​ចំហរ​​មួយ ​កាល​ពី​​ថ្ងៃទី ​២៨ ​តុលា ​ផ្ញើ​​ទៅ​កាន់​​សមាជិក ​សមាជិការ​​ គណៈ​កម្មាធិការ​​​​អចិន្ត្រៃយ៍​​​​គណបក្ស​​​​សង្គ្រោះ​​ជាតិ ​​ដើម្បី​​​វាយ​បក​​​ទៅ​​លើ​​​លោក ​​សម រង្ស៊ី​។ ​ប៉ុន្តែ​ភ្លាមៗ​នេះ ​មន្ត្រី​​គណបក្ស​​សង្គ្រោះ​ជាតិ​​បាន​​ចេញ​មក​​បដិសេធ​ថា ​ជា​​​លិខិត​​​ក្លែងក្លាយ ​និង​​ធ្វើ​ឡើង​​ដើម្បី​​បំបែក​​គណបក្ស​​សង្គ្រោះ​​ជាតិ​​ប៉ុណ្ណោះ​។  

ផ្សាយពាណិជ្ជកម្ម

លិខិត​ចំហរ​របស់លោក កឹម សុខា ដែល​មន្ត្រី​គណបក្ស​សង្គ្រោះ​ជាតិ​បាន​ចាត់ទុកថា ជា​លិខិត​ក្លែងក្លាយ​នេះ បាន​សំដៅ​វាយបក​ទៅលើ​លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ ដែល​បាន​ថ្លែង​តាមរយៈ​វីដេអូ​ឃ្លី​ប​មួយ កាលពីពេលថ្មីៗនេះ ដោយបាន​អំពាវនាវ​កុំ​ឲ្យ​ទទួលស្គាល់​នូវ​រាល់​សេចក្តីសម្រេច​របស់លោក កឹម សុខា ដែល​កំពុង​ស្ថិតនៅក្នុង​ពន្ធនាគារ។ លិខិត​ចំហរ​ដែលមាន​ចុះហត្ថលេខា​របស់លោក កឹម សុខា អមដោយ​ត្រា​របស់​គណបក្ស​សង្គ្រោះ​ជាតិ​ផង​នេះ បានប្រកាសថា លោក (កឹម សុខា) នៅតែ​ជា​ប្រធាន​គណបក្ស​សង្គ្រោះ​ជាតិ​ស្របតាម​ច្បាប់។ ហេតុដូចនេះ លោក​នៅតែមាន​សិទ្ធិ​សម្រេច​ក្នុងនាម​ជា​ប្រធាន​គណបក្ស នូវ​រាល់​កិច្ចការ​របស់​គណបក្ស​សង្គ្រោះ​ជាតិ និង​បាន​អំពាវនាវ​សុំ​ឲ្យ​លោក សម រង្ស៊ី បញ្ឈប់​ជាបន្ទាន់​នូវ​សកម្មភាព​ញុះញង់​បំបែកបំបាក់​សម្លេង​អ្នកប្រជាធិបតេយ្យ​តទៅទៀត។ លិខិត​ចំហរ​នេះ បានចាត់ទុក​ការអំពាវនាវ​របស់លោក សម រង្ស៊ី តាមរយៈ​វីដេអូ​ឃ្លី​ប​កាលពី​ប៉ុន្មាន​ថ្ងៃមុន​នេះ​ថា ជាការ​បំបែក​សម្លេង​អ្នកប្រជាធិបតេយ្យ។

ប៉ុន្តែភ្លាមៗនេះ លោក មុត ចន្ថា ក្នុងនាម​ជានា​យក​ខុទ្ទកាល័យ​របស់ លោក កឹម សុខា បាន​ចេញមក​បដិសេធ​ថា នេះ ជា​លិខិត​ក្លែងក្លាយ​យ៉ាងពិត​ប្រាកដ ត្បិត លោក កឹម សុខា ពុំដែល​បានចេញ​លិខិត​បែបនេះ​ឡើយ។ ច្បាស់​ជាងនេះទៅទៀត លិខិត​នេះ បាន​បន្លំ​ហត្ថលេខា​ខ្លី ឬ គ្រី​ហ្វ របស់លោក អេង ឆៃអ៊ាង ដែល​គាត់​ពុំមាន​វត្តមាន​នៅក្នុង​ប្រទេស​កម្ពុជា​ឡើយ។ នេះ​បើតាម​លោក មុត ចន្ថា ដែល​បាន​សរសេ​នៅលើ​គណនេយ្យ​ហ្វេ​ស​បុក​របស់លោក​នៅថ្ងៃនេះ ដែល​បាន​អំពាវនាវ​ដល់​សាធារណមតិ​ជាតិ-អន្តរជាតិ កុំ​ឲ្យ​ចាញ់​ឧបាយកល​បំបែកបំបាក់​នេះ។

ជាការ​កត់សំគាល់ ការ​បែកធ្លាយ​នូវ​លិខិត​ក្លែងក្លាយ​របស់លោក កឹម សុខា នេះ គឺ​នៅ​ចំ​ពេលដែល​មន្ត្រី​គណបក្ស​សង្គ្រោះ​ជាតិ កំពុង​ខ្វែងគំនិត​គ្នា លើ​ការរៀបចំ​បញ្ជី​ឈ្មោះ​បេក្ខជន​ឈរឈ្មោះ​បោះឆ្នោត​ជ្រើសតាំង​សមាជិក​ព្រឹទ្ធសភា ដែល​នឹង​ប្រព្រឹត្តទៅ​នៅ​ថ្ងៃទី ២៥ ខែកុម្ភៈ ខាងមុខ រហូតដល់​មានការ​លាប​ពណ៌​គ្នា​ទៅវិញទៅមក។ ប៉ុន្តែ​យ៉ាងណាក៏ដោយ លោក អេង ឆៃអ៊ាង មន្ត្រីជាន់ខ្ពស់​គណបក្ស​សង្គ្រោះ​ជាតិ ដែល​កំពុងស្ថិត​នៅឯ​ក្រៅប្រទេស បានចាត់ទុក​លិខិត​បែកធ្លាយ​នេះ​ថា ជា​លិខិត​ក្លែងក្លាយ​ដែរ ដែល​បង្កើតឡើង​ដោយ​ជន​ទុច្ចរិត​ណាមួយ សំដៅ​ដើម្បី​បំបែកបំបាក់​គណបក្ស​ស​ង្គ្រោះ​ជាតិ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI