កម្ពុជា-នយោបាយ

អតីត​បក្ស​ប្រឆាំង​ដាក់​ផែន​ការ​បង្កើន​ការងារ​ទូត ​ដើម្បី​ជម្រុញ​ឲ្យ​មាន​ការ​ដោះលែង​លោក​ កឹម សុខា ​និង​អ្នក​ទោស​នយោបាយ​

លោក សម រង្ស៊ី ​ជួប​ជា​មួយ​សមាជិក​ព្រឹទ្ធសភា ​សហរដ្ឋ​អាមេរិក​ លោក ​Cory​ Gardner​ នៅ​រដ្ឋធានី​វ៉ាស៊ីនតោន​ ថ្ងៃទី ​​១១ ​ធ្នូ ​២០១៩​។​
លោក សម រង្ស៊ី ​ជួប​ជា​មួយ​សមាជិក​ព្រឹទ្ធសភា ​សហរដ្ឋ​អាមេរិក​ លោក ​Cory​ Gardner​ នៅ​រដ្ឋធានី​វ៉ាស៊ីនតោន​ ថ្ងៃទី ​​១១ ​ធ្នូ ​២០១៩​។​ @សហការី

គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ ​បាន​បើក​កិច្ច​ប្រជុំ​របស់​ខ្លួន ​នៅ​ឯ​ទី​ក្រុង​ Lowell​ សហរដ្ឋ​អាមេរិក ​នៅ​ថ្ងៃទី ​១៤​ ធ្នូ ​នេះ ​ដើម្បី​រៀប​ចំដាក់​ផែន​ការ​សកម្មភាព​សម្រាប់​អនុវត្ត​នៅ​ឆ្នាំ​២០២០​ខាង​មុខ​។ ​ក្នុង​នោះ​គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ​ដឹកនាំ​ដោយ​លោក ​សម រង្ស៊ី ​បាន​ប្រកាស​ថា ​នឹង​បង្កើន​ការងារ​​ការទូត​របស់​ខ្លួន​ឲ្យ​បាន​ខ្លាំង​ក្លា​បន្ថែម​ទៀត ​ដើម្បី​ជម្រុញ​ឲ្យ​មានកា​រ​ដោះ​លែង ​និង​ទម្លាក់​ចោល​ការ​ចោទ​ប្រកាន់​លើ​លោក ​កឹម សុខា ​ព្រម​ទាំង​អ្នក​ទោស​នយោបាយ​ និង​មន​សិការ​ទាំងអ​ស់ ​ហើយ​និង​ស្តារ​ឲ្យ​អតីត​គណបក្ស​សង្គ្រោះ​ជាតិ​ដំណើរ​ការ​ឡើង​វិញ​។ 

ផ្សាយពាណិជ្ជកម្ម

ផ្អែក​តាម​សេចក្តី​ប្រកាស​ព័ត៌មាន​ស្តីពី​លទ្ធផល​នៃ​កិច្ច​ប្រជុំ​គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ​បាន​ចាត់​ទុក​ថា ​លទ្ធផល​នៃ​ការងារ​ការទូត​របស់​ថ្នាក់​ដឹកនាំ​អតីត​គណបក្ស​ប្រឆាំង​នា​ពេល​កន្ល​ងម​ក ​បាន​ជម្រុញ​ឲ្យ​សហគមន៍​អន្តរជាតិ ​យក​ចិត្ត​ទុក​ដាក់​កាន់​តែ​ខ្លាំង ​ចំពោះ​វិបត្តិ​នយោបាយ​នៅ​ប្រទេស​កម្ពុជា​។​ ហើយ​ថា ​លទ្ធផល​នេះ ​ក៏​បាន​នាំ​ឲ្យ​សហគមន៍​អន្តរជាតិ​ចាត់​វិធាន​ការ​ជាក់​លាក់ ​ដោយ​បាន​ដាក់​ទណ្ឌ​កម្ម​ទៅ​លើ​បុគ្គល​ពុក​រលួយ ​និង​រំលោភ​សិទ្ធិ​មនុស្ស​ធ្ងន់​ធ្ងរ​នៅ​ក្នុង​ប្រទេស​កម្ពុជា​ផង​ដែរ​។ ​នេះ​បើ​យោង​តាម​សេចក្តី​ប្រកាស​ព័ត៌មាន​ ស្តីពី ​លទ្ធផល​នៃ​កិច្ច​ប្រជុំ​គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ​ ដែល​បាន​ធ្វើ​ឡើង​នៅ​ឯ​ទី​ក្រុង​ Lowell​ សហរដ្ឋ​អាមេរិក​នៅ​រសៀល​ថ្ងៃទី ​១៤​ ធ្នូ​នេះ។​

យោង​តាម​សេចក្តី​ប្រកាស​ព័ត៌មាន​នេះ​ កិច្ច​ប្រជុំ​គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ​ ក៏​បាន​ប្រកាស​ដាក់​ផែន​ការ​បន្ត​ថា ​អតីត​គណបក្ស​ប្រឆាំង​មួយ​នេះ ​នឹង​បង្កើន​សកម្មភាព​ការងារ​ការទូត​របស់​ខ្លួន​ឲ្យ​កាន់​តែ​ខ្លាំង​ក្លា​ថែម​ទៀត ​ដើម្បី​ជម្រុញ​ឲ្យ​មាន​ការ​ដោះលែង ​និង​ទម្លាក់​ចោល​ការ​ចោទ​ប្រកាន់​លើ​លោក ​កឹម​ សុខា ​ព្រម​ទាំង​អ្នក​ទោស​នយោបាយ​ និង​មនសិការ​ទាំង​អស់ ​ហើយ​និង​ឲ្យ​អតីត​គណបក្ស​សង្គ្រោះ​ជាតិ​ដំណើរ​ការ​ឡើង​វិញ​។​ បន្ថែម​លើនេះ​ កិច្ច​ប្រជុំ​ដែល​ដឹកនាំ​ដោយ​លោក ​សម ​រង្ស៊ី ​នេះ ​ក៏​បាន​វាយ​តម្លៃ​ខ្ពស់​ចំពោះ​ស្មារតី ​និង​ទឹក​ចិត្ត​តស៊ូ​របស់​ប្រជាពល​រដ្ឋ​ខ្មែរ​ទាំង​ក្នុង​និង​ក្រៅ​ប្រទេស​ ជា​ពិ​សេស​ពលករ​ខ្មែរ​ដែល​កំពុង​ធ្វើការ​នៅ​ក្នុង​ប្រទេស​ថៃ ​និង​ប្រទេស​កូរ៉េខាងត្បូង​ផង​ដែរ​។ ​ក្នុង​នោះកិច្ច​ប្រជុំ​ក៏​បាន​សន្យា​ដែរ​ថា ​និង​ជួយ​រៀប​ចំ​ឲ្យ​មាន​យន្តការ​ស្រប​ច្បាប់​មួយ​ ដើម្បី​ការពារ​សិទ្ធិ ​និង​ផល​ប្រយោជន៍​របស់​ពលករ​ខ្មែរ ​ដែល​កំពុង​ធ្វើការ​នៅ​ក្នុង​ប្រទេស​ថៃ​។

​គួរ​ជំរាប​ជូន​ថា ​កិច្ច​ប្រជុំ​គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ​កាល​​ពី​ខែ​សីហាក​ន្ល​ង​ទៅ ​ក៏បា​ន​កំណត់​យុទ្ធសាស្ត្រ​ឲ្យ​លោក​ សម​ រង្ស៊ី ​ធ្វើ​មាតុ​ភូមិ​និវត្តន៍​មក​កាន់​ប្រទេស​កម្ពុជា​វិញ​ផង​ដែរ ​កាល​ពី​ថ្ងៃទី ​០៩ ​វិច្ឆិកា។​ បើ​ទោះបី​ជា​រដ្ឋាភិបាល​កម្ពុជា​បាន​ចាត់​ទុកផែ​នការ​នោះថា​ បរាជ័យ​ក្តី ​ប៉ុន្តែ​មន្ត្រី​ជាន់ខ្ពស់​អតីត​គណបក្ស​ប្រឆាំង​លោក ​អេង​ ឆៃអ៊ាង ​ធ្លាប់​បាន​​អះអាង​ថា ​ផែនការ​របស់​ខ្លួន​ទទួល​បាន​ជោគជ័យ ​បើ​ទោះបី​ជា​លោក​ សម​ រង្ស៊ី មិ​ន​អាច​ដាក់​ជើង​ជាន់​ដី​កម្ពុជា​បាន​ក៏​ដោយ​។​ នោះ​បើ​គេ​មើល​ទៅ​លើ​ការ​វិវត្តន៍​នៃ​សំណុំ​រឿង​របស់​លោក ​កឹម ​សុខា ​ការ​ខិត​កាន់​តែ​គៀក​នឹង​ការ​ដក ​ឬ​ព្យួរ​ប្រព័ន្ធ​អនុគ្រោះ​ពន្ធ ​EBA​ ពី​សហភាព​អឺរ៉ុប​ និង​ការ​ដាក់​ទណ្ឌកម្ម​បង្កក​ព្រទ្យ​សម្បត្តិ​លើ​មន្ត្រី​ជាន់​ខ្ពស់​រដ្ឋាភិបាល​កម្ពុជា​បី​រូប ​ពី​សំណាក់​រដ្ឋាភិបាល​អាមេរិក​ជា​ដើម​។​

សូម​បញ្ជាក់​ថា ​កិច្ច​ប្រជុំ​គណៈកម្មាធិការ​អចិន្ត្រៃយ៍​នៃ​អតីត​គណបក្ស​សង្គ្រោះ​ជាតិ ​ដែល​ភាគ​ច្រើន​ជា​អ្នក​ស្និទ្ធ​លោក ​សម​ រង្ស៊ី ក៏​បាន​ប្រកាស​ដែរ​ថា ​អតីត​គណបក្ស​ប្រឆាំង​មួយ​នេះ ​និង​រៀប​ចំ​កិច្ច​ប្រជុំ​មួយ​ទៀត ​ដើម្បី​កំណត់​យុទ្ធសាស្ត្រ​នយោបាយ​របស់​ខ្លួន​ នៅ​ខែ​មករា ​ឆ្នាំ​២០២០ ​ខាង​មុ​ខ​៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI