កូរ៉េខាងជើង-អាមេរិក

ចោទ​ប្រកាន់​ជន​ដែល​វាយ​ប្រហារ​មន្ដ្រី​ទូត​អាមេរិក​នៅ​កូរ៉េ​ខាង​ត្បូង​ ពី​បទ​ប៉ុន​ប៉​ង​មនុស្ស​ឃាត​

ឯក​អគ្គរដ្ឋទូត​​អាមេរិក​រង​​ការ​វាយ​ប្រហារ​​ដោយ​​កាំបិត​នៅ​​ទីក្រុង​​ស៊េអូល​។
ឯក​អគ្គរដ្ឋទូត​​អាមេរិក​រង​​ការ​វាយ​ប្រហារ​​ដោយ​​កាំបិត​នៅ​​ទីក្រុង​​ស៊េអូល​។ REUTERS/Yonhap

ប៉ូលីស​កូរ៉េ​ខាង​ត្បូង​នៅ​ថ្ងៃ​សុក្រ​ម្សិល​មិញ ​បាន​ធ្វើ​ការ​ចោទ​ប្រកាន់​បុរស​ដែល​បាន​វាយ​ប្រហារ​ដោយ​កាំបិត​ ទៅ​លើ​ឯក​អគ្គ​រដ្ឋ​ទូត​អាមេរិក​នៅ​កូរ៉េ​ខាង​ត្បូង​ ពី​បទ​ប៉ុន​ប៉ង​មនុស្ស​ឃាត​។​ ការ​ចោទ​ប្រកាន់​នេះ ​ធ្វើ​ឡើង​ក្នុង​ខណៈ​ពេល​ដែល​មាន​ការ​ស៊ើប​អង្កេត​អំពី​ទំនាក់​ទំនង​របស់​ជន​ជាប់​ចោទ​ ជា​មួយ​កូរ៉េ​ខាង​ជើង​។​

ផ្សាយពាណិជ្ជកម្ម

ក្រៅ​ពី​បទ​ចោទ​ប៉ុនប៉ង​មនុស្ស​ឃាត ​លោក​គីម​ គី​ចុង​ អាយុ​៥៥​ឆ្នាំ ​ក៏​ត្រូវ​បាន​ចោទ​ប្រកាន់​ពី​បទ​ល្មើស​ដាច់ដោយ​ឡែក​មួយ​ផ្សេង​ទៀត​ដែរ​ គឺ​បទ​ចោទ​ប្រើ​ប្រាស់​អំពើ​ហិង្សា​ប្រឆាំង​នឹង​ប្រេសិត​បរទេស។​ ការ​ចោទប្រកាន់​ទាំង​នេះ ​ធ្វើ​ឡើង​នៅ​ថ្ងៃទី៦​ខែមីនា​ គឺ​តែ​មួយ​ថ្ងៃ​ប៉ុណ្ណោះ ​ក្រោយ​ពី​ជន​ជាប់​ចោទ ​លោក​គីម​ គី​ចុង វាយ​ប្រហារ​ដោយ​កាំ​បិត​ ទៅ​លើ​លោក​ឯក​អគ្គ​រដ្ឋទូត​អាមេរិក​ប្រចាំ​ក្រុង​សេ​អ៊ូល ​លោក​ម៉ាក​ លីព​ភើត​។

ទី​ភ្នាក់​ងារ​ព័ត៌​មាន​យ៉ុន​ហាប់​ បាន​រាយ​ការណ៍​ឲ្យ​ដឹង​ថា ​ដីកា​មួយ​សម្រាប់​ការ​ចាប់​ខ្លួន​លោក​គីម​ គី​ចុង​ ត្រូវ​បាន​ចេញ​ជា​ផ្លូវ​ការ។ ​ហើយ​ប៉ូលីស​ក្រុង​សេ​អ៊ូល​បាន​ចាប់​ជន​ជាប់​ចោទ ​យក​ទៅ​ឃុំ​ឃាំង​រួច​រាល់​ហើយ។

បើ​តាម​ប្រវត្តិ​រូប​របស់​លោក​គីម ​គី​ចុង​ ជន​ជាប់​ចោទ​រូប​នេះ ​គឺ​ជា​មនុស្ស​ដែល​មាន​ទស្សនៈ​ជាតិ​និយម​ដ៏​ខ្លាំងក្លា។ ​បុរស​ម្នាក់​នេះ​យល់​ឃើញ​ថា ​សហ​រដ្ឋ​អាមេរិក​ ជា​ឧប​សគ្គ​ដ៏​ចម្បង​មួយ​ នៅ​ក្នុង​ការ​បង្រួប​បង្រួម​ឧបទ្វីប​កូរ៉េ​។ ​ប៉ុន្តែ​នៅ​ម្ខាង ​មាន​ភស្តុតាង​សំខាន់​ដែល​បាន​បង្ហាញ​ថា ​ជន​ជាប់​ចោទ​គីម​ គី​ចុង​ អាច​ជា​មនុស្ស​របស់​កូរ៉េ​ខាង​ជើង​ ព្រោះ​គាត់​ធ្លាប់​បាន​ធ្វើ​ដំណើរ​ទៅ​កាន់​ប្រទេស​កូរ៉េ​ខាង​ជើង​ចំនួន​៦​ដង ​ក្នុង​ចន្លោះ​ឆ្នាំ​២០០៦ ​ដល់​ឆ្នាំ​២០០៧។ ​ហើយ​បន្ទាប់​ពី​អគ្គម​គ្គុ​ទេសន៍​កូរ៉េ​ខាង​ជើង ​គីម​ ជុងអ៊ីល ​ទទួល​មរណៈ​ភាព​ក្នុង​ឆ្នាំ​២០១១​ ជនជាប់​ចោទ​នេះ ​ក៏​បាន​ព្យាយាម​សាង​សង់​ស្តូប​បរម​សុខ​មួយ​ក្នុង​ទីក្រុង​សេ​អ៊ូ​ល ដើម្បី​ឧទ្ទិស​ដល់​អគ្គម​គ្គុ​ទេស​គីម ​ជុងអ៊ីល។ ​ប៉ុន្តែ​នៅ​ក្នុង​សវ​នាការ​កាល​ពី​ថ្ងៃ​សុក្រ ​ជន​ជាប់​ចោទ​គីម​ គី​ចុង ​បាន​បដិ​សេធ​ថា ​អ្វីដែល​ខ្លួន​ធ្វើ គ្មាន​ពាក់​ព័ន្ធ​អ្វី​ជា​មួយ​កូរ៉េ​ខាង​ជើង​នោះ​ទេ។

គួរ​ជម្រាប​ជូន​ថា ​រហូត​មក​ទល់​ពេល​នេះ​ ករណី​វាយ​ប្រហារ​ទៅ​លើ​ឯក​អគ្គ​រដ្ឋទូត​អាមេរិក​ លោក​ Lippert កំពុង​តែ​ស្ថិត​ក្រោម​ការ​គ្រប់​គ្រង​ដោយ​ក្រុម​ស៊ើប​អង្កេត​ពិសេស ​ដឹក​នាំ​ដោយ​ផ្នែក​ប្រឆាំង​ភេរវកម្ម​ នៃ​ការិ​យាល័យ​កណ្ដាល​ព្រះ​រាជ​អាជ្ញា​ក្រុង​សេ​អ៊ូ​ល។​ ក្រុម​ស៊ើប​អង្កេត​ពិសេស​នោះ​ ក៏​មាន​ផង​ដែរ​ ការ​ចូល​រួម​ពី ​ព្រះរាជ​អាជ្ញា​ជាង​១០០​នាក់​ ព្រម​ទាំង​មន្ដ្រី​ប៉ូលីស​ជាច្រើន​ទៀត៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI