ទស្សនៈព្រឹត្តិការណ៍ខ្មែរ

ភាព​ល្អូក​ល្អិន ហ៊ុន សែន-កឹម សុខា ជា​វិញ្ញាសាថ្មីសម្រាប់​បក្ស​ប្រឆាំង

សំឡេង ០៤:៣៣
លោក កឹម សុខា និង លោក ហ៊ុន សែន ចាប់ដៃស្វាគមន៍​គ្នា​នៅមុន​កិច្ច​ប្រជុំ​ពេញអង្គ​រដ្ឋសភា ថ្ងៃ​ទី​០៧ ធ្នូ ២០១៦
លោក កឹម សុខា និង លោក ហ៊ុន សែន ចាប់ដៃស្វាគមន៍​គ្នា​នៅមុន​កិច្ច​ប្រជុំ​ពេញអង្គ​រដ្ឋសភា ថ្ងៃ​ទី​០៧ ធ្នូ ២០១៦ រូបភាព​ឯកសារ

ចាប់​តាំង​ពី​លោក កឹម សុខា ប្រធាន​ស្ដី​ទី​បក្សសង្គ្រោះ​ជាតិ បង្ហាញ​ភាព​ល្អូក​ល្អិន​យល់​ចិត្ត​ថ្លើម​ជាមួយ​លោក​នាយក​រដ្ឋ​មន្ដ្រី ហ៊ុន សែន នៅ​ក្នុង​រដ្ឋសភា​កាល​ពី​ថ្ងៃ​ពុធ ភាព​សង្ស័យ​បាន​ធ្លាក់​មក​ជា​បន្ត​បន្ទាប់​។ តើ​ទំនាក់​ទំនង​នេះ អាច​ធ្វើ​ឲ្យផ្ទៃ​ក្នុង​បក្ស​ប្រឆាំង​​ប្រេះ​ឆា​ថែម​ទៀត​ដែរ​ឬ​ទេ? តើ​​អនាគត​គណបក្ស​ប្រឆាំង​នឹង​ក្លាយ​ជា​យ៉ាង​ណា? ហើយ​តើ​​នរណា​ជា​អ្នក​កំណត់​ជោគ​វាសនា​នៃ​គណបក្ស​ប្រឆាំងធំ​ជាង​គេ​នៅ​កម្ពុជា?

ផ្សាយពាណិជ្ជកម្ម

ការសម្រប​សម្រួល​រវាង​គណបក្ស​នយោបាយ​មិន​មែន​ជា​រឿង​ថ្មី​អ្វីទេ នៅ​លើ​ឆាក​នយោបាយ​កម្ពុជា​។ ប៉ុន្តែ​សម្រាប់​គណបក្សនយោបាយ​ដែល​ដឹក​នាំ​ដោយ​បុរស​ខ្លាំង​២​នាក់ ការ​សម្រប​សម្រួល​នយោបាយ​ជាមួយបុគ្គល​​ម្នាក់ ដោយ​លើក​លែង​ទោស ស្វាគមន៍ ​និង​ប្រគល់​តំណែង​ថ្មី​ឲ្យ ខណៈ​ម្នាក់​ទៀត​មាន​ទោស​ជាប់​ខ្លួន​ហើយ​​ត្រូវនិរទេស​ខ្លួន​ឯង​នៅ​ក្រៅ​ប្រទេស គឺ​ជា​រឿង​ប្លែក​ថ្មី​និង​គួរ​ឲ្យ​បារម្ភ។ បារម្ភ​ព្រោះ​ ការ​សម្រប​សម្រួល​នយោបាយ ជា​ទូទៅ​មាន​ទៅ​មាន​មក​។

គណបក្ស​កាន់​អំណាច​ធ្វើ​សម្បទាន​យ៉ាង​ច្រើន​ដល់​គណបក្ស​ប្រឆាំង រាប់​ចាប់​តាំង​ពី​លើក​លែង​ទោស​លោក កឹម សុខា ប្រគល់​តំណែង​ជា​ប្រធាន​ក្រុមសំឡេង​ភាគ​តិច​នៅ​សភា និងតំណែង​ប្រធាន​ក្រុម​តំណាង​រាស្ត្រ​គណបក្ស​សង្គ្រោះ​ជាតិ​ឲ្យលោក កឹម សុខា ហើយ​ថែម​ទាំង​ដោះ​លែង​លោក មេឃុំ ស៊ាង ចែត ទៀត​។ តាម​រយៈ​សម្បទាន​អស់នេះ ច្បាស់​ណាស់ ​គណបក្ស​សង្គ្រោះ​ជាតិ​ត្រូវ​ផ្ដល់​សំណង​យ៉ាង​គាប់​ចិត្ត​​ទៅ​ឲ្យ​គណបក្ស​ប្រជាជន​វិញ។

សម្រាប់​គណបក្ស​ប្រជាជន នៅ​លើ​ឆាក​នយោបាយ​៥​អាណត្តិ​កន្លង​មក​នេះ គ្មាន​អ្វី​គួរ​ឲ្យ​គាប់​ចិត្ត​ជាង​ការ​បែក​បាក់​ដួល​រលំ​នៃ​គូ​​ប្រជែង​របស់​ខ្លួន​ឡើយ​។

កាល​ពី​ថ្ងៃ​ពុធ ទី​៧​ធ្នូ នៅ​ក្នុង​កិច្ច​ប្រជុំ​ពេញ​អង្គ​រដ្ឋសភា លោក កឹម សុខា ប្រធាន​ស្ដី​ទី​គណបក្ស​ប្រឆាំង បាន​បង្ហាញភាព​ល្អូកល្អិន​យល់​ចិត្ត​យល់​ថ្លើម​គ្នា​យ៉ាង​ខ្លាំង​ជាមួយលោក​នាយក​រដ្ឋ​មន្ដ្រី ហ៊ុន សែន​។ លោក ហ៊ុន សែន បាន​ចាត់​ទុក​លោក កឹម សុខា ថា​ជា​ដៃគូ​ពិភាក្សា​រឿង​ប្រទេស​ជាតិ​ជាមួយ​រូប​លោក ដែល​តំណែង​នេះ ពី​ដំបូង​ឡើយ​ជា​របស់​លោក សម រង្ស៊ី​។

ការ​ផ្លាស់​ប្ដូរ​នេះ បាន​ធ្វើ​ឲ្យ​មហាជន​ព្រួយ​​ថា អាច​ជះ​ឥទ្ធិពល​ដល់​ផ្ទៃ​​ក្នុង​បក្ស​ប្រឆាំង ដែល​មាន​បញ្ហា​ស្រាប់​។ គេ​ដឹង​រួច​មក​ហើយ​ថា គណបក្ស​សង្គ្រោះ​ជាតិ ប្រសូត្រ​ចេញ​ពី​ការ​ច្របាច់​បញ្ចូល​គ្នា​រវាង​គណបក្ស​សម​រង្ស៊ី និង​គណបក្ស​សិទ្ធិ​មនុស្ស​។ ដូច្នេះ​ហើយ​នៅ​ក្រោម​ដំបូល​សង្គ្រោះ​ជាតិ មាន​មនុស្ស​មក​ពី​ប្រភព​ពីរ​ផ្សេង​គ្នា ដែល​ប្រភព​ទាំង​ពីរ​នេះ ធ្លាប់​រិះ​គន់​ជេរ​ប្រមាថ​គ្នា​យ៉ាង​ចាស់​ដៃ កាល​ពី​នៅ​បក្ស​រាង​ខ្លួន​។

បើ​ទោះ​បី​ជា​គណបក្ស​ប្រឆាំង​អះអាង​ថា គ្មាន​ភាព​ប្រេះឆា​នៅ​ក្នុង​ជួរ​គណបក្ស​ខ្លួន​ក៏​ដោយ ប៉ុន្តែ​ភាព​ផុយ​ស្រួយ​នៃ​ទំនាក់ទំនង​​ផ្ទៃ​ក្នុង​បក្ស​មាន​កម្រិត​យ៉ាង​ណា​នោះ គណបក្ស​ខ្លួន​ឯង​ទើប​​ដឹង​ច្បាស់​។

កន្លង​មក ភាព​ផុយ​ស្រួយ​នៃ​ផ្ទៃ​ក្នុង​បក្ស​ប្រឆាំង បាន​ក្លាយ​ទៅជាចំណុច​ខ្សោយ​ដែល​គណបក្ស​កាន់​អំណាច​ព្យាយាម​វាយ​បំបែក​តាម​រយៈ​វិធី​ផ្សេង​ៗ និង​តួ​អង្គ​នយោបាយ​ផ្សេង​ៗ​។ កាល​ពី​ឆ្នាំ​២០១៥ តួ​អង្គ​នយោបាយ​ដែល​គណបក្សកាន់​អំណាច​ជ្រើស​យក គឺ​លោក សម រង្ស៊ី​។ ប៉ុន្តែភាព​ល្អូក​ល្អិន​ជាមួយ​​លោក សម រង្ស៊ី ទំនង​ជា​មិន​អាច​ធ្វើ​ឲ្យ​បក្ស​ប្រឆាំង​បែកជាពីរ​បាន ទើប​គណបក្ស​កាន់​អំណាច​ងាក​មក​ប្រើ​លោក កឹម សុខា វិញ​ម្ដង​។ ប្រសិន​បើ​ភាព​ល្អូក​ល្អិន​រវាង​លោក កឹម សុខា និង​ប្រមុខ​បក្ស​ប្រជាជន លោក ហ៊ុន សែន អាច​ធ្វើ​ឲ្យ​លោក សម រង្ស៊ី ដែល​នៅ​ក្រៅ​ប្រទេស​នៅ​លែង​សុខ ហើយសម្រេច​ចែក​ផ្លូវ​ជាមួយ​លោក កឹម សុខា នោះ​គណបក្ស​ប្រជាជន​បាន​ជោគជ័យ​។ ផ្ទុយ​មក​វិញ ប្រសិន​បើ​ល្បែង​មួយ​ក្ដារ​នេះ​មិន​អាច​បំបែក​សង្គ្រោះ​ជាតិ​បាន​ទេ គណបក្ស​ប្រជាជន​ប្រហែល​ជា​ត្រូវ​ខាំ​មាត់​សង្កត់​ចិត្ត ប្រកួត​ជាមួយ​សង្គ្រោះ​ជាតិ​ម្ដង​ទៀត​នៅ​លើ​សង្វៀន​ការ​បោះ​ឆ្នោត​ជាតិ​ឆ្នាំ​២០១៨​។

បក្ស​កាន់​អំណាច​មិន​ត្រូវ​ភ្លេច​ទេ​ថា ចំណុច​ខ្លាំង​របស់​គណបក្ស​សង្គ្រោះ​ជាតិគឺការ​រួប​រួម​របស់​បុគ្គល​ប្រឆាំង​ខ្លាំង​ពីរ​រូប​។ គឺ​ដោយ​សារ​តែ​ការ​រួប​រួម​នេះ​ហើយ ដែល​ធ្វើ​ឲ្យ​បក្ស​នេះ​ទទួល​បាន​ការ​គាំទ្រ​ភ្លូក​ទឹក​ភ្លូក​ដី​ពី​សំណាក់​ម្ចាស់​ឆ្នោត នៅ​ក្នុង​ការ​បោះ​ឆ្នោត​តំណាង​រាស្ត្រ​អាណត្តិ​ទី​៥ ឆ្នាំ​២០១៣​។ សង្គ្រោះ​ជាតិ បាន​ក្លាយ​ទៅ​ជា​ដៃ​គូ​តែ​មួយ​គត់​របស់​គណបក្ស​ប្រជាជន​កម្ពុជា​នៅ​ក្នុង​សភា ដោយ​ទទួល​បាន​អាសនៈ​ចំនួន​៥៥ ខណៈ​បក្ស​កាន់​អំណាច​មាន​អាសនៈ​ចំនួន​៦៨​។

មួយ​ជំហាន​ទៀត​ដល់​គោលដៅ គណបក្ស​សង្គ្រោះ​ជាតិ​ទំនង​ជា​មិនហែក​ហួរ​គ្នា​ឯង​ឡើយ​។ ទ្រាំ​រស់​នៅក្រោម​ដំបូល​តែ​មួយ​៤​ឆ្នាំ​ហើយ រឿង​អី​ទ្រាំ​២​ឆ្នាំ​ទៀតរហូត​ដល់​បោះ​ឆ្នោតជាតិ​​មិន​បាន?

សរុប​មក​វិញ ភាព​ល្អូក​ល្អិន ហ៊ុន សែន-កឹម សុខា លើក​នេះ ជា​វិញ្ញាសាថ្មី​មួយ​ទៀត​សម្រាប់​គណបក្ស​ប្រឆាំង​វាស់​ស្ទង់​ពី​ភាព​រឹង​មាំ​របស់​ខ្លួន​​​។ ប្រសិន​ឆ្លង​ផុត​វិញ្ញាសា​នេះ លោក សម រង្ស៊ី និង លោក កឹម សុខា លែង​ចាំ​បាច់​សង្ស័យ​គ្នា​ពី​ភាព​​ស្មោះ​ត្រង់​ទៀត​ហើយ​​។ អ្វី​ដែល​គណបក្ស​នេះ​ត្រូវ​ធ្វើ គឺ​ពង្រឹង​ប្រជាធិបតេយ្យ​ផ្ទៃ​ក្នុង និង​ដាក់​គោលនយោបាយ​ឈាន​ទៅ​រក​ការ​បោះ​ឆ្នោត​។

ជោគ​វាសនា​អនាគត​របស់​គណបក្ស​ប្រឆាំង គ្មាន​នរណា​អាច​កំណត់​​បាន​ទេ។ ចង់​បែក ចង់​បាក់ ឬ​ចង់​កាន់​ដៃ​គ្នា​ឆ្ពោះ​ទៅ​កាន់​ការ​បោះ​ឆ្នោត គឺ​មាន​តែ​គណបក្ស​ប្រឆាំង​ខ្លួន​ឯង​ទេ ទើប​អាចកំណត់​បាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI