អានតួអត្ថបទ
សិទ្ធិមនុស្ស

សិទ្ធិ​មនុស្ស​អ.ស.ប​ស្វាគមន៍​កម្ពុជា​ទទួល​យក​អនុសាសន៍​ទាំង ៩១

តំណាង​ពិសេស​អ.ស.ប.​ទទួល​បន្ទុក​សិទ្ធិមនុស្ស​ពេល​ជួប​ជាមួយ​នាយករដ្ឋមន្រ្តី​ហ៊ុន សែន
តំណាង​ពិសេស​អ.ស.ប.​ទទួល​បន្ទុក​សិទ្ធិមនុស្ស​ពេល​ជួប​ជាមួយ​នាយករដ្ឋមន្រ្តី​ហ៊ុន សែន ©វណ្ណារ៉ា
ដោយ៖ លាង ដឺលុច
១៩ នាទី

អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា​បាន​ធ្វើ​សេចក្តី​ថ្លែងការណ៍ ពី​ទី​ក្រុង​ហ្សឺណែវ កាល​ពី​ថ្ងៃ​ទី​២៩​មីនា អបអរ​ចំពោះ​កម្ពុជា​ដែល​បាន​ព្រម​ទទួល​យក​អនុសាសន៍​ទាំង ៩១​ចំនុច​របស់​អង្គការ​សហប្រជាជាតិ​ទាក់ទង​នឹង​ការលើក​តម្កើង​ការគោរព​សិទ្ធិ​មនុស្ស​នៅ​កម្ពុជា។

ផ្សាយពាណិជ្ជកម្ម

លោក​ស៊ូយ៉ា ប្រាសាទ ស៊ូបេឌី អ្នករាយការណ៍​ពិសេស​លើ​បញ្ហា​សិទ្ធិ​មនុស្ស នៅ​កម្ពុជា ដែល​ជា​អ្នកថ្លែង​ស្វាគមន៍ និង​អបអរ​សាទរ​ចំពោះ​ប្រទេស​កម្ពុជា ព្រោះ​តែ​រដ្ឋាភិបាល​កម្ពុជា​យល់ព្រម​ទទួល អនុសាសន៍ ៩១​ចំនុច​របស់​អង្គការ​សហប្រជាតិ​ស្តី​ពី​បញ្ហា​សិទ្ធ​មនុស្ស។ យោងតាម​សេចក្តី​ថ្លែងការណ៍​របស់​ការិយាល័យ​នៃ​ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា លោក​ស៊ូយ៉ា ស៊ុបេឌី​បាន​អត្ថាធិប្បាយ​ថា ការសម្រេច​របស់​រដ្ឋាភិបាល​កម្ពុជា​បាន​បង្ហាញ​ពី​ការសន្យា​ជា​សាធារណៈ​របស់​ខ្លួន ក្នុង​ការបន្ត​ការខិតខំ​ប្រឹងប្រែង​ដើម្បី​កសាង​ប្រព័ន្ធ​នីតិរដ្ឋ​មួយ ដែល​ជា​កត្តា​សំខាន់​ក្នុង​ការអភិវឌ្ឍន៍​ប្រទេស។

វា​ជា​រឿង​ធម្មតា​ដែល​អង្គការ​សហប្រជាជាតិ​ត្រូវ​កោត​សសើរ និង​លើក​ទឹកចិត្ត​ដល់​ប្រទេស​ជា​សមាជិក​របស់​ខ្លួន​ណា​ដែល​ចូលរួម​អង្គការ​កំពូល​នេះ​ក្នុង​កិច្ច​ប្រតិបត្តិការ​អ្វីមួយ។ ប៉ុន្តែ​អ្វី​ដែល​សំខាន់​ជាង​នេះ​នោះ​គឺ​ថា កម្ពុជា​គឺ​ជា​រដ្ឋ​មួយ​ក្នុង​ចំណោម​រដ្ឋ​ជា​សមាជិក​មួយ​ចំនួន​តូច​បំផុត ដែល​ក្លាហាន​បាន​អនុម័ត​យល់ព្រម​ជា​ផ្លូវការ​ទទួល​យក​អនុសាសន៍​ទាំង​៩១​ចំនុច​របស់​អង្គការ​សហប្រជាជាតិ​នេះ។

អនុសាសន៍​ទាំង​៩១​ចំនុច​នេះ ត្រូវ​បាន​តាក់តែង​ឡើង​ដោយ​រដ្ឋ​ជា​សមាជិក​អង្គការ​សហប្រជាតិ​ដែល​មាន ១៩២​ប្រទេស ហើយ​ដែល​ត្រូវ​បាន​អនុម័ត នៅ​ក្នុង​សម័យ​ប្រជុំ កាល​ពី​ខែ​ធ្នូ​កន្លង​ទៅ​នេះ។ អនុសាសន៍​ទាំងអស់​នេះ គឺ​គ្មាន​អ្វី​ក្រៅ​តែ​ពី​ការណែនាំ​អោយ​កែ​លម្អ និង​ធ្វើ​អោយ​កាន់តែ​ប្រសើរ​ឡើង​នូវ​ការគោរព​សិទ្ធិ​របស់​មនុស្ស​នោះ​ទេ។ ហើយ​ជា​គោលការណ៍ ប្រសិន​បើ​ប្រទេស​ណា​មួយ​អនុម័ត​យល់ព្រម​ទទួល​យក​អនុសាសន៍​ទាំងនេះ​ហើយ នោះ គឺ​បាន​ន័យ​ថា ប្រទេស​នោះ​គាំទ្រ និង​យល់ព្រម​យក​អនុសាសន៍​ទាំង​នោះ​មក​អនុវត្ត។

លោក​ធន សារាយ ប្រធាន​សមាគម​ការពារ​សិទ្ធិ​មនុស្ស​ឈ្មោះ​អាដហុក បាន​អបអរ​សាទរ​ចំពោះ​ការបង្ហាញ​ជំហរ​របស់​រដ្ឋាភិបាល​កម្ពុជា​យ៉ាង​ដូច្នេះ។ ចំពោះ​លោក​ធន សារ៉ាយ នេះ​គឺ​ជា​ការបង្ហាញ​ឆន្ទៈ​របស់​រដ្ឋាភិបាល​ក្នុង​ការលើក​តម្កើង​ការគោរព​សិទ្ធិ​មនុស្ស​នៅ​កម្ពុជា។ ប៉ុន្តែ​លោក​ធន សារ៉ាយ​បាន​ធ្វើការ​កត់​សម្គាល់​ថា រដ្ឋាភិបាល​កម្ពុជា​តែងតែ​ចុះ​ហត្ថលេខា​គាំទ្រ​លើ​គ្រប់​ឯកសារ​អន្តរជាតិ ដែល​ទាក់ទង​នឹង​ការ​ប្រយុទ្ធ​ប្រឆាំង​អំពើ​ខុសច្បាប់ ឧទាហរណ៍ ដូចជា​ការទទួល​យក​អនុសាសន៍​របស់​អង្គការ​សហប្រជាជាតិ​លើក​នេះ​ជាដើម។ ប៉ុន្តែ តើ​ការអនុវត្ត​មាន​ប្រសិទ្ធភាព ឬ​មិនមាន វា​ជា​រឿង​មួយ​ផ្សេង។ លោក​ធន សារ៉ាយ​បាន​ពន្យល់​ថា យន្តការ​ថ្មី​របស់​អង្គការ​សហប្រជាជាតិ​នេះ គឺ​តម្រូវ​អោយ​មាន​ការជួប​គ្នា រៀងរាល់​៤​ឆ្នាំ​ម្តង​នៃ​ប្រទេស​ជា​សមាជិក​ដើម្បី​ពិនិត្យ​មើល​ការអនុវត្ត​ការសន្យា​របស់​ប្រទេស​ជា​សមាជិក​ទាក់ទង​នឹង​ការពង្រឹង​ការគោរព​សិទ្ធិ​មនុស្ស​នេះ។ ដូច្នេះ​បើ​តាម​ការអះអាង​របស់​លោក​ធន សារាយ កម្ពុជា​មាន​ការងារ​ច្រើន​ដែល​ត្រូវ​ធ្វើ​ក្នុង​វិស័យ​សិទ្ធិ​មនុស្ស​នេះ។

នៅក្នុង​សេចក្តី​ថ្លែងការណ៍​របស់​ការិយាល័យ​សិទ្ធិ​មនុស្ស​នៃ​អង្គការ​សហ​ប្រជាជាតិ​ប្រចាំ​កម្ពុជា​ដែល​គេ​សរសេរ​ស្វាគមន៍​ជំហរ​របស់​កម្ពុជា​ចុងក្រោយ គេ​ឃើញ​ថា ប្រទេស​ជា​សមាជិក​នៅ​ក្នុង​ក្រុម​ប្រឹក្សា​សិទ្ធិ​មនុស្ស​នៃ​អង្គការ​សហប្រជាជាតិ​បាន​និយាយ​ទទួល​ស្គាល់​ពី​ការរីក​ចម្រើន​គួរ​អោយ​កត់​សម្គាល់​នៅ​កម្ពុជា បើ​ប្រៀបធៀប​ទៅ​នឹង​សាវតារ​នៃ​ប្រទេស​នេះ ដែល​បាន​ឆ្លងកាត់​សង្គ្រាម​ជាង​៣០​ឆ្នាំ​នោះ។ ពោល​គឺ ក្រុម​ប្រទេស​នានា​ទាំងនោះ​បាន​ស្វាគមន៍​ការបង្កើត​ច្បាប់​សំខាន់ៗ​ជាច្រើន ការខិតខំ​ប្រឹងប្រែង​របស់​កម្ពុជា​ក្នុង​ការពង្រឹង​ការទទួល​បាន​សិទ្ធិ​ខាង​ផ្នែក​សុខភាព ផ្នែក​អប់រំ ការលើក​ស្ទួយ​សិទ្ធិ​ស្ត្រី និង​កំណែ​ទម្រង់​លើ​វិស័យ​ផ្សេងៗ​ទៀត​ដែល​កម្ពុជា​កំពុង​ធ្វើ។

ប៉ុន្តែ ក្រុម​ប្រទេស​សមាជិក​អង្គការ​សហប្រជាជាតិ​ទាំងនោះ​ក៏​មិន​បាន​មើល​រំលង​ការខ្វះខាត​ដែល​កម្ពុជា​ត្រូវ​បំពេញ​នោះ​ដែរ។ នោះ​គឺ​ការពង្រឹង​សិទ្ធិ​ខាង​ដីធ្លី លំនៅដ្ឋាន ពង្រឹង​ឯករាជ្យភាព និង​សមត្ថភាព​នៃ​ស្ថាប័ន​តុលាការ លើក​កម្ពស់​សិទ្ធិ​ខាង​ការជួបជុំ សេរីភាព​បញ្ចេញមតិ ការជួបជុំ​រវាង​រដ្ឋាភិបាល និង​ក្រុម​សង្គម​ស៊ីវិល និង​ការការពារ​សកម្មជន​សិទ្ធិ​មនុស្ស​ជាដើម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ