ទស្សនៈព្រឹត្តិការណ៍ខ្មែរ

ធ្វើ​យ៉ាងណា​ដើម្បី​បញ្ចប់​ការ​ខ្វែង​គំនិត​រវាង​ខ្មែរ​និង​ខ្មែរ​លើ​បញ្ហា​ព្រំដែន?

សំឡេង ០៤:១២
គណៈកម្មាធិការ​ចម្រុះ​កិច្ចការ​ព្រំដែន​កម្ពុជា បង្ហាញ​ផែន​ទី​ដែល​កម្ពុជា​ប្រើ​ប្រាស់​ក្នុង​ការ​កំណត់​និង​បោះ​បង្គោល​ព្រំដែន​ជាមួយ​ប្រទេស​ជិត​ខាង នៅ​ទីស្ដីការ​គណៈរដ្ឋ​មន្ដ្រី ថ្ងៃ​ទី​០២ ខែ​កក្កដា ឆ្នាំ​២០១៥
គណៈកម្មាធិការ​ចម្រុះ​កិច្ចការ​ព្រំដែន​កម្ពុជា បង្ហាញ​ផែន​ទី​ដែល​កម្ពុជា​ប្រើ​ប្រាស់​ក្នុង​ការ​កំណត់​និង​បោះ​បង្គោល​ព្រំដែន​ជាមួយ​ប្រទេស​ជិត​ខាង នៅ​ទីស្ដីការ​គណៈរដ្ឋ​មន្ដ្រី ថ្ងៃ​ទី​០២ ខែ​កក្កដា ឆ្នាំ​២០១៥ RFI/Siv Channa
២៤ នាទី

ដំណោះ​ស្រាយ​វិបត្តិ​ព្រំដែន​កម្ពុជា​ជាមួយ​ប្រទេស​វៀតណាម​ហាក់​ដូចជា​នៅ​តែ​វិលវល់​ក្នុង​ចំណោម​អ្នក​នយោបាយ​ខ្មែរ​នៅ​ឡើយ។ ប៉ុន្តែ​ចំណុច​មួយ​ដែល​ជា​ស្នូល​នៃ​ដំណោះ​ស្រាយ​នេះ​គឺ​កត្តា​ប្រជាពល​រដ្ឋ​កម្ពុជា។​គឺ​ពលរដ្ឋ​កម្ពុជា​ត្រូវ​ចូលរួម​ដោយ​ផ្ទាល់ឬ​ដោយ​ប្រយោល​ក្នុង​ដំណើរ​ការ​ដោះ​ស្រាយ​បញ្ហា​ព្រំដែន​រវាង​ប្រទេស​ទាំង​ពីរ ហើយ​ប្រជាពលរដ្ឋ​ត្រូវ​ស្វែង​យល់​និង​សិក្សា​ឲ្យ​ច្បាស់​ពី​ភាព​ពិត​ប្រាកដ​នៃ​ផែនទី​ដ៏ច​ម្រូង​ចម្រាស់​និង​ផ្ទៃដី​ជាក់​ស្តែង។

ផ្សាយពាណិជ្ជកម្ម

ថ្វី​បើ​មាន​ការ​ពិនិត្យ​ផ្ទៀង​ផ្ទាត់​ផែនទី​ព្រំដែន​កម្ពុជា​ជាមួយ​ប្រទេស​វៀតណាម​ចំនួន​ពីរ​លើក​រួច​មក​ហើយ​ក្តី ហើយ​បើ​ទោះជា​ប្រមុខ​រដ្ឋា​ភិបាល​កម្ពុជា​លោក​ហ៊ុន សែន បាន​ប្រកាស​បិទ​បញ្ចប់​ថា​នឹង​មិន​មាន​ការ​ផ្ទៀត​ផ្ទាត់​ផែន​ទី​ព្រំដែន​រវាង​ប្រទេស​ទាំងពីរ​តទៅ​ទៀត​ក៏​ដោយ ប៉ុន្តែ​បញ្ហា​នេះ​មិន​អាច​បញ្ចប់​អាយ៉ៃ​ឆ្លើយ​ឆ្លង​រវាង​រដ្ឋាភិបាល-និយាយ​ជារួម- និយាយ​ដោយឡែក អាយ៉ៃ​រវាង​គណបក្ស​កាន់​អំណាចគឺ​គណបក្ស​ប្រជាជន​កម្ពុជា​និង​គណបក្ស​សង្គ្រោះជាតិ​ដែលជា​គណបក្ស​ប្រឆាំង​នោះ​ទេ។

ដូច្នេះ​សំណួរ សួរ​ថា​តើ​ធ្វើ​យ៉ាង​ណា​ដើម្បី​បញ្ចប់​ការ​ខ្វែង​គំនិត​រវាង​ខ្មែរ​និង​ខ្មែរ​លើ​បញ្ហា​ព្រំដែន​កម្ពុជា​-វៀតណាម​នេះ?
 
ជា​បឋម​គេ​ត្រូវ​ក្រឡេក​មើល​ឡើង​វិញ​ថា​ហេតុអ្វី​បានជា​ការ​ផ្ទៀងផ្ទាត់​ផែន​ទី​ដែល​កម្ពុជាខ្ចី​ពី​អង្គការ​សហ​ប្រជាជាតិ​និង​ខ្ចី​ពី​ប្រទេស​បារាំង​មិន​អាច​លាង​ជម្រះ​គំនិត​ផ្ទុយ​គ្នា​រវាង​អ្នក​នយោបាយ​ខ្មែរ​លើ​សំណុំ​រឿង​ផែនទី​នេះ​បាន។
 
ពិត​មែន​ហើយ​វា​ក៏​ព្រោះ​តែ​អ្នក​នយោបាយ​ខ្មែរ​ដឹង​ច្បាស់​ថា​ទំនាស់​ព្រំដែន​រវាង​ប្រទេស​វៀតណាម​ជាប់​របង​កម្ពុជា​នៅ​តែ​ជា​ឆ្នាំង​បាយ​នយោបាយ​ដែល​គេ​មិន​អាច​វាយ​បំបែក​ឆ្នាំង​នេះ​ចោល​ដោយ​ងាយៗ​នោះ​ទេ។
 
ពោល​គឺ​មិន​ថា​គណបក្ស​ប្រជាជន​កម្ពុជា​ឬ​គណបក្ស​សង្គ្រោះជាតិ​នោះ​ទេ បញ្ហា​ព្រំដែន​ជាមួយ​ប្រទេស​វៀតណាម និយាយ​ឲ្យ​ចំ​គឺ​បញ្ហា​ផែនទី​ជាមួយ​ប្រទេស​នេះ​តែម្តង គណបក្ស​ទាំងពីរ​សុទ្ធ​តែ​អាច​ទាញ​យក​ផល​ចំណេញ ស្រូប​បាន​ការគាំទ្រ​និង​ប្រជាប្រិយភាព​មួយ​ចំណែក​ណា​មួយ​នោះ​មិន​ខាន​ឡើយ។ មូលហេតុ​ដោយសារ​អ្នក​នយោបាយ​ខ្មែរ​នៅ​តែជឿ​និង​យល់​ថា​ទំនាស់​ព្រំដែន​ជាមួយ​ប្រទេស​វៀតណាម​ងាយ​នឹង​រំញោច​ទឹក​ចិត្ត​ប្រជាពលរដ្ឋ​ជាតិ​និយម​បំផុត។
 
ប៉ុន្តែ​មួយវិញ​ទៀត​រដ្ឋា​ភិបាល​ហាក់​ដូចជា​ប្រញ៉ាប់​ប្រញ៉ាល់​ពេក​ក្នុង​ការ​សន្និដ្ឋាន​​ថា​ការ​ផ្ទៀង​ផ្ទាត់​ផែន​ទី​ព្រំដែន​កម្ពុជា វៀតណាម នោះ​គ្រប់​គ្រាន់​សម​ល្មម​អាច​នឹង​ធ្វើ​ការសន្និដ្ឋាន​ចុង​ក្រោយ​បាន។ប្រញ៉ាប់​ប្រញ៉ាល់​ពេក​ដោយសារ​តែ​នៅ​ក្នុង​ផ្នត់​គំនិត​របស់​ពល​រដ្ឋខ្មែរ​ខ្លះ​នៅ​មិន​ទាន់​ទុក​ចិត្ត​ទាំង​ស្រុង មិន​ទាន់​ជឿជាក់​ទាំង​ស្រុង​លើ​សមត្ថកម្ម​របស់​រដ្ឋា​ភិបាល​ស្រប​ពេល​ដែល​គណបក្ស​ប្រឆាំង​បាន​ព្យាយាម​បង្ហាញ​ភស្តុតាង​ផ្សេងៗ​ទៀត។ ប្រញ៉ាប់​ប្រញ៉ាល់​ពេក​ដោយសារ​តែ​ពលរដ្ឋ​កម្ពុជា​ខ្លះ​នៅ​រង់ចាំ​មើល​សេចក្តី​អះអាង​ពី​អ្នក​ជំនាញ​ផែន​ទីពី​គ្រប់​ភាគី​នយោបាយ និង​សេចក្តី​បញ្ជាក់​ពី​អ្នក​ជំនាញ​ការ​អន្តរជាតិ។​
 
ទោះ​ជា​បែប​នេះ​ក្តី​ដើម្បី​បញ្ចប់​ការ​ខ្វែង​គំនិត​លើ​ផែនទី​ព្រំដែន​កម្ពុជា​វៀតណាម​នេះ មាន​តែ​ប្រជា​ពលរដ្ឋ​កម្ពុជា​ខ្លួនឯង​ទេ​ជា​អ្នក​កំណត់​និង​ស្វែងយល់​ឲ្យ​ច្បាស់​ពី​ការ​ធ្វើ​អាជីវកម្ម​ផ្នែក​នយោបាយ​បែប​ណាមួយ​លើ​ចំណោទ​ព្រំដែន​នេះ។ ​ដ្បិត​ពលរដ្ឋ​កម្ពុជា​មួយ​ចំនួន​គឺជា​សក្សីនៃ​ការ​ប្រែប្រួល​លើ​បន្ទាត់​ព្រំដែន។ ពលរដ្ឋ​កម្ពុជាគ្រប់​រូប​មាន​តួនាទី​ស្វែង​យល់ ធ្វើ​ការ​ស្រាវជ្រាវ​ឲ្យ​បាន​ច្បាស់​លាស់​ហើយ​វិនិច្ឆ័យ​ឲ្យ​ប្រាកដ​ប្រជា​ពី​ភាព​ត្រឹមត្រូវ​ពិត​ប្រាកដ​លើ​កំណត់​ព្រំដែន​កម្ពុជា​វៀតណាម ឬ​ព្រំដែន​ជា​មួយ​ប្រទេស​ជិតខាង​ដទៃទៀត​ដូចជា​ថៃ​និង​ឡាវ ជា​ដើម។ចំណេះ​ដឹង​របស់​ប្រជាពល​រដ្ឋ​កម្ពុជា​លើ​បញ្ហា​ព្រំដែន​គឺ​ជា​សម្ពាធ​មួយ​ផ្នែក​លើ​អ្នក​នយោបាយ​ឲ្យ​បញ្ចប់​ការ​ខ្វែង​គំនិត​គ្នា។
 
បន្ថែម​ពី​នោះ​ទៀត​គណបក្ស​ខ្វែង​គំនិត​គ្នា​មាន​តួនាទី​ជំរុញ​ការ​ផ្ទៀង​ផ្ទាត់​ឲ្យ​បាន​ប្រាកដ​ប្រជា​រវាង​ផែនទី​ព្រំដែន​កម្ពុជា​ វៀតណាម​ដែល​អាច​ទុកចិត្ត​បាន​នៅ​លើ​ក្រដាស ​ជាមួយ​នឹង​ផ្ទៃដី​ជាក់​ស្តែង។ ហើយ​ការ​ផ្ទៀង​ផ្ទាត់​ផែនទី​លើ​ក្រដាស​ជាមួយ​នឹង​ផ្ទៃដី​ជាក់​ស្តែង​គួរតែ​ធ្វើជា​ចំហ ដោយ​មាន​ការ​ចូល​រួមពី​តំណាង​ប្រជាពលរដ្ឋ សង្គម​ស៊ីវិល​ដែល​មាន​ជំនាញ​ព្រំដែន បក្ស​នយោបាយ​ដែល​មិន​ចុះ​សម្រុង​គ្នា រួម​ទាំង​មាន​ការ​ចូលរួម​ពី​អ្នក​ជំនាញ​ការ​ព្រំដែន​ជាតិ​និង​អន្តរជាតិ​ផងដែរ៕


អត្តបទវិភាគ​របស់​គង់ សុឋានរិទ្ធ

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI