កម្ពុជា-នយោបាយ

​ក្រសួង​ការពារ​ជាតិ​នឹង​នាំ​អ្នក​កាសែត​ជាតិ​និង​អន្តរ​ជាតិ​ទៅ​បញ្ជាក់​ពី​ការ​ពិត​នៃ​មូល​ដ្ឋាន​ទ័ព​ចិន​នៅ​ព្រះ​សីហនុ​

លោក ទៀ បាញ់ រដ្ឋ​មន្ដ្រីក្រសួង​ការពារ​ជាតិ​កម្ពុជា
លោក ទៀ បាញ់ រដ្ឋ​មន្ដ្រីក្រសួង​ការពារ​ជាតិ​កម្ពុជា REUTERS

លោក​ឧប​នាយក​រដ្ឋ​មន្រ្តី​ទៀ បាញ់ រដ្ឋ​មន្រ្តី​ក្រសួង​ការពារជាតិ​កម្ពុជា​បាន​អនុញ្ញាត​ឱ្យ​ក្រុម​អ្នក​កាសែត​ជាតិ និង​អន្តរជាតិ​ចូល​ទៅ​ទស្សន​កិច្ច​នៅ​មូល​ដ្ឋាន​កង​ទ័ព​ជើង​ទឹក​រាម ក្នុង​ខេត្ត​ព្រះសីហនុ​នៅ​ថ្ងៃ​សុក្រ ស្អែក​នេះ​។ នេះ​បើ​តាម​ការ​បញ្ជាក់​ឱ្យ​ដឹង​ពី​លោក ផៃ ស៊ីផាន អ្នក​នាំ​ពាក្យ​រដ្ឋា​ភិបាល​កម្ពុជា​នៅ​ក្នុង​សន្និ​សីទ​សារព័ត៌មាន​នៅ​ទីស្តី​ការ​គណៈ​រដ្ឋ​មន្រ្តី​នៅ​ព្រឹក​មិញ​។ តាម​លោក​ផៃ ស៊ីផាន វត្តមាន​របស់​ក្រុម​អ្នក​កាសែត​នេះ គឺ​ដើម្បី​ផ្ទៀង​ផ្ទាត់​ឱ្យ​បាន​ច្បាស់​ថា តើ​មាន​ការ​សាង​សង់​មូល​ដ្ឋាន​ទ័ព​ចិន​នៅ​ទីនោះ​ដែរ​ឬ​ទេ​។ 

ផ្សាយពាណិជ្ជកម្ម

អ្នក​នាំ​ពាក្យ​រដ្ឋា​ភិបាល​កម្ពុជា លោកផៃ ស៊ីផាន បាន​បញ្ជាក់​ថា ដំណើរ​ទស្សន​កិច្ច​របស់​ក្រុម​អ្នក​កាសែត​នេះ នឹង​លាង​ជម្រះ​នូវ​ការ​សង្ស័យ​អំពី​ការ​សាង​សង់​មូល​ដ្ឋាន​កង​ទ័ព​ចិន​នៅ​ក្នុង​ខេត្ត​ព្រះ​សីហនុ និង ជា​ការ​បង្ហាញ​ពី​តម្លា​ភាព និង ភាព​ស្មោះ​ត្រង់​របស់​កម្ពុជា​ផង​ដែរ​។ បើ​ទោះ​ជា​បែប​នេះ​ក្តី លោកផៃ ស៊ីផាន បាន​គូស​បញ្ជាក់​ដែរ​ថា ដំណើរ​ទស្សន​កិច្ច​ដ៏​កម្រ​នេះ គឺ​មាន​តែ​ក្រុម​អ្នក​កាសែត​ជាតិ និង អន្តរជាតិ​តែ​ប៉ុណ្ណោះ ដោយ​មិន​អញ្ជើញ ​និង អនុញ្ញាត​ឱ្យ​មាន​ចូល​រួម​ពី​មន្រ្តី​ស្ថាន​ទូត​បរទេស ឫ​ភាគី​ណា​ទៀត​ឡើយ​។

ការ​ដឹក​នាំ​ក្រុម​អ្នក​កាសែត​ទៅ​ខេត្ត​ព្រះសីហនុ​ដោយ​ផ្ទាល់​នេះ គឺ​ជា​សក្ខីភាព​មួយ​បន្ថែម​ទៀត​របស់​រដ្ឋា​ភិបាល​កម្ពុជា​ក្នុង​ការ​លាង​ជម្រះ​ឱ្យ​ស្អាត​នូវ​ព័ត៌មាន​ដែល​កម្ពុជា និង ចិន​ចុះ​កិច្ច​ព្រម​ព្រៀង​សំងាត់​អនុញាត​ឱ្យ​ចិន​អាច​ដាក់​មូល​ដ្ឋាន​កង​ទ័ព​របស់​ខ្លួន​នៅ​ក្នុង​ខេត្ត​ព្រះសីហនុ​។ កាសែត​អាមេរិកាំង The Wall Street Journal បាន​ចុះ​ផ្សាយ​ពី​រឿង​នេះ ហើយ​បាន​លម្អិត​ថា កម្ពុជា​បាន​អនុញ្ញាត​ឲ្យ​ចិន​ប្រើ​ប្រាស់​មូល​ដ្ឋាន​យោធា​សមុទ្រ​រាម ខេត្ត​ព្រះសីហនុ រយៈ​ពេល​៣០​ឆ្នាំ ហើយ​អាច​បន្ត​សុពលភាព​ជា​ស្វ័យ​ប្រវត្តិ​រៀង​រាល់​១០​ឆ្នាំ​ម្ដង​។ កាសែត​អាមេរិក​មួយ​នេះ​បន្ត​ថា មូល​ដ្ឋាន​កង​ទ័ព​ចិន នឹង​មាន​កន្លែង​ស្ដុក​អាវុធ ព្រម​ទាំង​កន្លែង​ចត​នាវា​ចម្បាំង​ផង​ដែរ​។

ប្រមុខ​រដ្ឋា​ភិបាល ក្រសួង​ការ​បរទេស និង ក្រសួង​ការពារ​ជាតិ​កម្ពុជា សុទ្ធ​តែ​បាន​ចេញ​មក​ទាត់​ចោល​នូវ​ព័ត៌មាន​នេះ ដោយ​ចាត់​ទុក​ថា ជា​ព័ត៌មាន​ប្រឌិត​ដ៏​អាក្រក់​បំផុត​ប្រឆាំង​នឹង​កម្ពុជា​។ ចំណែក រដ្ឋាភិបាល​ចិន​ក៏​មិន​នៅ​ស្ងៀម​ដែរ​។ ក្រសួង​ការ​បរទេស និង ក្រសួង​ការពារ​ជាតិ​ចិន​តាម​រយៈ​អ្នក​នាំ​ពាក្យ​សុទ្ធ​តែ​បាន​ច្រាន​ចោល​ព័ត៌មាន​នេះ និង បាន​ប្រាប់​ទៅ​ភាគី​ពាក់​ព័ន្ធ​ដទៃ​កុំ​ឱ្យ​បក​ស្រាយ​បំផ្លើស​អំពី​កិច្ច​សហ​ប្រតិបត្តិ​ការ​រវាង​កម្ពុជា និង ចិន​។

បើ​ទោះ​បី​ចាត់​ទុក​ព័ត៌មាន​ដែល​ផ្សាយ​ដោយ​កាសែត The Wall Street Journal ថា​ជា​ព័ត៌មាន​ប្រឌិត​ប្រឆាំង​នឹង​កម្ពុជា​ក៏​ដោយ ប៉ុន្តែ​រដ្ឋា​ភិបាល​កម្ពុជា មិន​មាន​គម្រោង​ប្តឹង​កាសែត​អាមេរិក​មួយ​នេះ​ទេ​។ ផ្ទុយ​ទៅ​វិញ គឺ​រដ្ឋាភិបាល​កម្ពុជា​ចង់​ឱ្យ​បណ្តាញ​ព័ត៌មាន​ជួយ​ផ្សព្វ​ផ្សាយ​ព័ត៌មាន​ពិត​ឱ្យ​បាន​ច្រើន ដើម្បី​ឆ្លើយ​តប​ទៅ​នឹង​ព័ត៌មាន​ប្រឌិត​នេះ​។ នេះ​បើ​តាម​លោកផៃ ស៊ីផាន​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI