កម្ពុជា

កម្មករ​ទាមទារ​ដំឡើង​ប្រាក់ខែ​ដើម្បី​រស់

កម្មករ-កម្មការិនី​ខ្មែរ ដង្ហែក្បួន​ក្នុង​ទិវា​ពលកម្ម​អន្តរជាតិ ១ ឧសភា ២០១០
កម្មករ-កម្មការិនី​ខ្មែរ ដង្ហែក្បួន​ក្នុង​ទិវា​ពលកម្ម​អន្តរជាតិ ១ ឧសភា ២០១០ ©វណ្ណារ៉ា/RFI

នៅ​ថ្ងៃ​ទិវា​ពលកម្ម​អន្តរ​ជាតិ​នេះ​ កម្មករ​រាប់​ពាន់​នាក់​ នៅ​ក្នុង​ប្រទេស​កម្ពុជា ​​បាន​ហែ​ក្បួន​បាតុកម្ម​ ដើម្បី​ទាមទារ​អោយ​រាជ​រដ្ឋាភិបាល​ជួយ​ដោះស្រាយ​បញ្ហា​មួយ​ចំនួន ​ក្នុង​នោះ​មាន​ ​ការ​ដំឡើង​ប្រាក់ខែ​ ការ​គោរព​លក្ខខណ្ឌ​ការងារ​ និង​ការ​បង្កើត​តុលាការ​ការងារ​។

ផ្សាយពាណិជ្ជកម្ម

 

សេចក្តីរាយការណ៍​របស់ គី សុខលីម ពីភ្នំពេញ

កម្មករ​-កម្មការនី​ប្រមាណ​ជា ​ពី​២​ទៅ​៣​ពាន់​នាក់ ​បាន​ចូលរួម​ដង្ហែ​ក្បួន​បាតុកម្ម​ កាល​ពី​ព្រឹកមិញ​ នៅក្នុង​ទីក្រុង​ភ្នំពេញ​ ដើម្បី​ទាមទារ​ការ​ដំឡើង​ប្រាក់​ខែ​​​ និង​ការ​គោរព​លក្ខខណ្ឌ​ការងារ​។​

​ក្បួន​ដង្ហែ​របស់​ក្រុម​កម្មករ​ទី​មួយ​បាន​ប្រមូល​ផ្តុំ​គ្នា​នៅ​វត្ត​ភ្នំ ​រួច​ហើយ​ដើរ​សំដៅ​ទៅ​កាន់​អគារ​រដ្ឋសភា​ថ្មី។ ​រីឯ​ក្រុម​កម្មករ​មួយ​ទៀត​បាន​ប្រមូល​ផ្តុំ​គ្នា​នៅ​មុខ​រដ្ឋ​សភា​ចាស់​ រួច​ហើយ​ដើរ​សំដៅ​ទៅ​អគារ​រដ្ឋសភា​ថ្មី​ដូចគ្នា​។​​​​​

​ក្រៅ​ពី​ការ​ទាមទារ​ដំឡើង​ប្រាក់ខែ​ និង​ការ​គោរព​លក្ខខណ្ឌ​ការងារ ​​​កម្មករ​បាន​ទាមទារ​​អោយ​មាន​ការ​កាត់​បន្ថយ​ម៉ោង​ធ្វើការ​របស់​កម្មករ​ ពី​៤៨​ម៉ោង​ មក​នៅ​ត្រឹម​តែ​៤៤​ម៉ោង ​ក្នុង​មួយ​សប្តាហ៍​​​​​ ទាមទារ​អោយ​បញ្ឈប់​ការ​រើសអើង​ ចំពោះ​តំណាង​សហជីព​ និង​ទាមទារ​អោយ​មាន​ការ​បង្កើត​តុលាការ​ការងារ​។​

កម្មករ​កាត់ដេរ​នៅ​ក្នុង​ប្រទេស​កម្ពុជា​ទទួល​បាន​ប្រាក់​ខែ​អប្បបរមា​ជាង​៥០​ដុល្លារ​អាមេរិក​។​​ ដោយ​សង្កេត​ឃើញ​ប្រាក់ខែ​អប្បបរមា​មាន​ចំនួន​តិចតួច​ពេក ​បើ​ប្រៀបធៀប​ទៅ​នឹង​តម្លៃ​ទំនិញ​ នៅ​លើ​ទីផ្សារ​នោះ​​ កម្មករ​​​ទាមទារ​សូម​ដំឡើង​ប្រាក់​បៀវត្សរ៍​អប្បបរមា ​២០​ដុល្លារ​បន្ថែម​ទៀត​។​​

​​​បើ​ទោះបី​ជា​ក្បួន​ដង្ហែ​របស់​កម្មករ​បាន​ចាប់​ផ្តើម​ក្នុង​កន្លែង​ខុសគ្នា​ក៏​ដោយ ​ក៏​ពួកគេ​បាន​នាំយក​ញត្តិ​ទាមទារ​របស់​ពួកគេ​ សំដៅ​ទៅ​កាន់​អគារ​រដ្ឋសភា​ដូចគ្នា​ដែរ​។​ នៅ​ទី​នេះ​តំណាងរាស្រ្ត​គណបក្ស​សម​រង្ស៊ី​ចាំ​ទទួល​យក​ញត្តិ​របស់​ក្រុម​សហជីព​សេរីកម្មករ​នៃ​ព្រះរាជា​ណាចក្រ​កម្ពុជា​។​ ចំពោះ​តំណាងរាស្រ្ត​គណបក្ស​កាន់​អំណាច​ គេ​ពុំ​ឃើញ​មាន​វត្តមាន​នៅ​ទី​នោះ​ទេ​។​

​នៅ​ថ្ងែ​នេះ​ដែរ ​គណបក្ស​សម​រង្ស៊ី​បាន​ទាមទារ​អោយ​រាជ​រដ្ឋាភិបាល​ដោះស្រាយ​បញ្ហា​មួយ​ចំនួន​ជូន​កម្មករ​ដូចជា​ ​ការ​ដំឡើង​ប្រាក់​បៀវត្សរ៍​ជូន​កម្មករ​​ ថៅកែ​ត្រូវ​តម្កល់​ប្រាក់​ សម្រាប់​បើក​ជូន​កម្មករ​ នៅ​ពេល​រោងចក្រ​បិទទ្វារ​​ និង​ការ​បង្កើត​តុលាការ​ការងារ​ជាដើម​។​

ឆ្លើយតប​ទៅ​នឹង​ការ​ទាមទារ​ខាងលើ​ លោក ទិត សុធា​ អ្នក​នាំពាក្យ​អង្គភាព​ព័ត៌មាន​ និង​ប្រតិកម្ម​រហ័ស ​របស់​ទីស្តីការ​គណៈ​រដ្ឋ​មន្ត្រី ​បាន​ពន្យល់​ថា ​រដ្ឋាភិបាល​បាន​ដំឡើង​ប្រាក់​បៀវត្សរ៍​ ជា​រៀងរាល់​ឆ្នាំ ​ជូន​មន្រ្តី​រាជការ​​ហើយ។ ​បច្ចុប្បន្ន​នេះ ​មន្រ្តី​រាជការ​មាន​ប្រាក់ខែ​ជា​មធ្យម​ជាង​៨០​ដុល្លារ​។​ ទាក់ទង​ទៅ​​នឹង​ប្រាក់​ខែ​កម្មករ​វិញ​​ ក្រសួង​ពាក់ព័ន្ធ​កំពុង​គិតគូរ​ពិចារណា​។​​ លោក​ទិត ​សុធា​ បាន​បន្ថែម​ទៀត​ថា ​កម្មករ​ទាមទារ​ដំឡើង​ប្រាក់ខែ ​ប៉ុន្តែ​ ថៅកែ​វិញ​ ពួកគេ​ក៏​ពិបាក​ដែរ ​ក្នុង​កាលៈទេសៈ​វិបត្តិ​សេដ្ឋកិច្ច​នេះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI